Ke sega ni vakavuna na Kalou na rarawa, na cava ga e yaco tiko kina na lauqa, dravudravua, ivalu, tauvimate, kei na leqa tubukoso? E vakaraitaka na iVolatabu e tolu na vuna eda sotava tiko kina na rarawa:

1. Tawaveinanumi, Kocokoco, kei na Veicati. Ni “veiliutaki . . . na tamata e tini ga ina leqa.” (Dauvunau 8:9) Eda dau rarawa ena vuku ni nodra itovo ca eso, nodra nanumi ira ga, kei na nodra tawayalololoma.

2. Gauna kei na Veika Tawanamaki. Era rarawa eso “ni dau yacovi ira kece na gauna kei na ka e sega ni namaki.” (Dauvunau 9:11) Qori ni cala na vanua era tu kina se na gauna era tu kina e kea. E rairai sotavi e dua na vakacalaka, se vakavuna nona rarawa e dua na nona lewa cala se na nona biuti koya ga ena dua na ituvaki leqataki.

3. Na iLiuliu ca kei Vuravura. E vakamatatataka na iVolatabu na vu ni noda rarawa ni kaya: “E lewa tiko na vunica na vuravura taucoko.” (1 Joni 5:19) Na “vunica” qori o Setani na Tevoro. A dua tu na kabula vakayalo e liu qai dua vei ira na agilosi ni Kalou, ia e “sega ni dei ena dina.” (Joni 8:44) Eso tale na agilosi era tomani Setani ra qai talaidredre vua na Kalou, era vakatokai mera timoni nira vakaliuca ga nodra gagadre. (Vakatekivu 6:1-5) Me tekivu mai na gauna era talaidredre kina, sa qai kaukaua ga nodra veivakamuai kei na nodra veivakatotogani e vuravura o Setani kei ira na timoni. E vakadinadinataki sara ga qori nikua. E cudru vakalevu na Tevoro, qai “vakacala tiko na vuravura taucoko.” Sa rauta me “rarawa na vuravura.” (Vakatakila 12:9, 12) Io, e iliuliu voravora o Setani. E marau ni raici keda nida rarawa. O Setani ga e vakavuna na rarawa ni kawatamata, sega ni Kalou.

VAKASAMATAKA: O koya ga e sega vua na loloma, e daulawaki, qai dau caka ca ena vakavuna nodra rarawa o ira e sega nodra cala. Ia e duidui na ka e kaya na iVolatabu: “Ni Kalou ga na loloma.” (1 Joni 4:8) Ni dauloloma, “e sega ni rawa vua na Kalou dina me caka ca, me cala o koya e Kaukaua Duadua!”—Jope 34:10.

De dua o na veinanuyaka, ‘Ena vakacava na dede ni nona vakalaiva tiko na Kalou Kaukaua Duadua me veiliutaki o Setani?’ Me vaka eda sa dikeva mai, na Kalou e cata na veika ca qai mositi koya na rarawa eda sotava. E uqeti keda tale ga nona Vosa: “Biuta vua na nomuni lomaocaoca kece, ni kauaitaki kemuni o koya.” (1 Pita 5:7) Na Kalou e lomani keda qai tu vua na kaukaua me vakaotia na rarawa kei na veika tawadodonu me vaka ena vakamacalataki ena ulutaga tarava. *