Raica sara na lewena

Raica na lewenivola

“Dou talei sara.”—MACIU 10:31

E Kauaitaki Iko na Kalou

E Kauaitaki Iko na Kalou

KA EDA VULICA ENA VEIKA BULI

Ni sucu oti ga e dua na gone, e bibi me vakavolekati koya sara vua o tina. Na vuna? Na nodrau veivolekati na veitinani ena gauna qori ena veivuke vakalevu ena nona bula o gone kei na nona tubu. *

Na cava e kauaitaka qai lomana kina na luvena sucuvou e dua na tina? E vakamacalataka na vuna o Parofesa Jeannette Crenshaw ena ivola The Journal of Perinatal Education. E kaya ni dau toso cake ena gauna ni vakasucu na levu ni hormone e vakatokai na oxytocin. Qori e “vakavurea na loloma vakatina ni tarai luvena sucuvou o tina, ni vakaraici koya toka, se vakasucumi koya.” Dua tale na hormone e vakadrodroya na yago ena gauna qori e “uqeti tina me kauaitaki luvena,” qai vakavolekati rau vakaveitinani. Na cava eda vulica e keri?

E inaki ni Dauveibuli na Kalou o Jiova * me rau veivolekati o tina kei na luvena. E kaya o Tui Tevita ni kauti koya “mai na katonigone” na Kalou, qai vakacegui koya ena loloma vakatina. E kaya ena masu: “Niu se qai sucu au sa tataunaki tu vei kemuni, oni sa noqu Kalou niu se tu ena katonigone i tinaqu.”—Same 22:9, 10.

VAKASAMATAKA: E veivakurabuitaki na ka e cakava na Kalou vua e dua na tina, me rawa ni kauaitaki luvena qai vakarautaka na ka e vinakata. “Nida luve ni Kalou,” sa qai wacava sara nona kauaitaki keda yadua o koya.—Cakacaka 17:29.

KA E KAYA NA IVOLATABU

O Jisu ga e kila vinaka duadua na Dauveibuli. E rawa kina ni kaya: “E sega ni volitaki e rua na siparo ena dua na ilavo lailai? Ena sega ni lutu ina qele e dua vei rau me sega ni kila na Tamamudou. Ia e kilai vinaka na iwiliwili ni drauniulumudou. Dou kua gona ni rere, dou talei sara vei ira na siparo.”—Maciu 10:29-31.

E levu vei keda e sega ni bau kauai me raici ira na manumanuvuka, sa qai yawa sara meda kauai ke ‘lutu ena qele e dua vei ira.’ Ia na Tamada vakalomalagi e kauaitaki ira yadua! Eda talei sara vua na Kalou ni vakatauvatani kei ira na manumanuvuka. Me uqeti keda vakacava qori? Meda “kua  gona ni rere” se leqataka ni sega ni kauaitaki keda na Kalou baleta e kauaitaki keda vakalevu o koya!

E kauaitaki keda dina na Kalou, qai karoni keda vakayalololoma

E kaya na iVolatabu

  • “Na mata i Jiova e tiko ena veivanua kece, e vakaraici ira tiko na ca kei ira na vinaka.”—VOSA VAKAIBALEBALE 15:3.

  • “Na mata i Jiova sa dei tu ga vei ira na yalododonu, na daligana tale ga e rogoca na nodra tagi ni kere veivuke.”—SAME 34:15.

  • “Au na marau vakalevu ena dei ni nomuni loloma, ni oni sa raica na noqu rarawa, oni kila tu na levu ni noqu leqa.”—SAME 31:7.

“AU NANUMA NI SEGA NI LOMANI AU O JIOVA”

E rawa ni veisau noda rai me baleta na bula ke da vakadeitaka ni kauaitaki keda na Kalou, qai karoni keda vakayalololoma. E vakadinadinataka qori o Ana * mai Igiladi, e kaya:

“Levu na gauna au nanuma ni sega ni lomani au o Jiova, e sega tale ga ni saumi noqu masu. Au nanuma ni vakavuna qori na lailai ni noqu vakabauta. Au nanuma niu totogitaki se sega ni kauaitaki ni sega na kequ yaga. Au nanuma ni sega ni kauaitaki au na Kalou.”

Ia sa veisau na rai nei Ana me baleta na nona kauai kei na nona loloma o Jiova. Na cava e veisautaka nona rai? E kaya: “Au vakila vakalalai na veisau. Au vakasamataka e dua na ivunau vakaivolatabu au rogoca ena vica na yabaki sa oti. E vakamacalataki kina na isoro ni veivoli i Jisu, e tarai au sara ga na ivunau ya niu vakadeitaka kina ni lomani au o Jiova. Levu na gauna au dau tagi ni saumi noqu masu, niu kila kina e lomani au dina o Jiova. Au kila tale ga e levu na ka me baleti Jiova, nona itovo, kei na nona rai me baleti keda niu vulica na iVolatabu qai tiko ena soqoni vaKarisito. Au vakadinata ena gauna qo ni dau veitokoni o Jiova, e lomani keda kece, qai vinakata me karoni keda yadua.”

E veivakayaloqaqataki dina na ivakamacala i Ana. Ia o vakadeitaka vakacava ni kilai iko vinaka na Kalou qai kauaitaka na ka e tu e lomamu? Ena saumi qori ena ulutaga tarava.

^ para. 3 Nodra lomabibi eso na tina nira vakasucu oti e vakavuna nodra cavuka, qai vakadredretaka qori nodra veivolekati kei luvedra. Ia e sega ni bale vei ira na tina qori. E kaya na isoqosoqo na U.S. National Institute of Mental Health, ni rawa ni vakavuna na cavuka “eso na veiveisau e yaco ena yagoi tina kei na so na ituvaki e vusolo kina na lomana . . . E sega ni vakavuna na cavuka na ka e cakava se sega o tina.” Ena ikuri ni ivakamacala, raica na ulutaga vakavalagi “Understanding Postpartum Depression” ena Awake! ni 8 June, 2003.

^ para. 5 E tukuni ena iVolatabu ni yaca ni Kalou o Jiova.—Same 83:18.

^ para. 15 Sa veisau eso na yaca ena vica na ulutaga veitaravi qo.