Raica sara na lewena

Raica na lewenivola

Gauna Cava ena Veiliutaki Kina e Vuravura na Matanitu ni Kalou?

Gauna Cava ena Veiliutaki Kina e Vuravura na Matanitu ni Kalou?

Eratou via kila eso na imuri yalodina i Jisu na gauna ena tekivu veiliutaki kina na Matanitu ni Kalou. E qai kaya o Jisu ni ratou na sega ni kila na gauna ena veiliutaki kina e vuravura. (Cakacaka 1:6, 7) Ia sa tukuna oti vei ratou o Jisu ni gauna eratou na raica kina eso na ka lelevu ena yaco ena duavata ga na gauna, ratou na “kila sara ni sa voleka na Matanitu ni Kalou.” Sa kena gauna tale ga me veiliutaki kina e vuravura.—Luke 21:31.

CAVA ESO NA KA E TUKUNA O JISU NI NA YACO?

E kaya o Jisu: “Era na yaco na uneune kaukaua ena levu na vanua, ena tatara na leqa ni kakana kei na matedewa ena levu na vanua.” (Luke 21:10, 11) Nira yaco vata na ivakatakilakila kece qori, e dusia sara tu ga “ni sa voleka na Matanitu ni Kalou.” Vakacava sa bau yaco vata ga e veiyasa i vuravura na ka kece qori? Dikeva mada qo eso na kena ivakadinadina.

1. IVALU

E laurai ena ivolatukutuku ni kawatamata ni duatani duadua na vakacaca ni ivalu ena 1914! Era kaya na daunitukutuku makawa, na yabaki qori e veisautaka sara ga na ituvaki kei vuravura ni tekivu kina na imatai ni ivalu levu. Qori na imatai ni gauna e vakayagataki kina e dua na iwiliwili levu ni taqe ni ivalu, bomu, dakai, kasi gaga, kei na so tale na iyaragi vakadomobula. E qai yaco tale ga na ikarua ni ivalu levu e vakayagataki kina na iyaragi vakaniukilia. Tekivu mai na 1914, era veivaluvaluti na tamata ena veivanua, era mate tale ga kina e vica vata na milioni.

2. UNEUNE

E kaya na Britannica Academic ni “vakacaca” e veiyabaki e rauta ni 100 na uneune lelevu. E kaya tale ga na United States Geological Survey “ni tekivu mai na veiyabaki ni 1900, meda namaka ni na yaco e rauta ni 16 na uneune lelevu ena yabaki cava ga.” Eso era kaya, de dua ena qai levu ga na uneune ni tiko vei ira na misini mera kila kina na yaco ni uneune. Ke dina qori se sega, na uneune lelevu e veiyasa i vuravura e vakavuna tiko ga e levu na rarawa kei na mate.

 3. LEQA NI KAKANA

Na leqa ni kakana e veiyasa i vuravura e vu mai ena ivalu, cakacaka vakailawaki, leqa ni bula vakailavo, sega ni vakayagataki vinaka na qele, e sega tale ga na vakavakarau vinaka ni yaco na leqa tubukoso. E kaya kina na World Food Programme ena 2018: “E 821 na milioni na lewenivanua e veiyasa i vuravura e sega ni veirauti na kedra, ia e le 124 na milioni vei ira qori era walokai tu.” E veiyabaki, era mate e rauta ni le 3.1 na milioni na gone nira kana vakaca. Qori e vakavuna nodra mate e rauta ni 45 na pasede na gone e veiyasa i vuravura ena 2011.

4. TAUVIMATE KEI NA MATEDEWA

E kaya e dua na ivola ni World Health Organization: “E veitauvi vakalevu na matedewa ena ika21 ni senitiuri. E veitauvi tale tiko na mate me vaka na cholera, mate rerevaki kei na yellow fever, e laurai tale ga eso na mate vovou me vaka na SARS, matetaka, MERS, Ebola kei na Zika.” Se mani vakacava na nodra sasaga na saenitisi kei na vuniwai mera vulica e levu na ka me baleta na tauvimate, era se sega tiko ga ni kila na kedra iwali.

5. CAKACAKA VAKAVUNAU E VEIYASA I VURAVURA

Qo e dua tale na ivakatakilakila e kaya o Jisu: “Ena vunautaki mada na itukutuku vinaka qo ni Matanitu ni Kalou ena veiyasa i vuravura me ivakadinadina ina veimatanitu kece, sa na qai yaco na icavacava.” (Maciu 24:14) E vakilai tu e vuravura e levu na veika dredre, ia e sivia e walu na milioni na lewenivanua e veiyasa i vuravura era vunautaka tiko na itukutuku vinaka ni Matanitu ni Kalou ena 240 na vanua, ena sivia na 1,000 na vosa. Qori e se bera vakadua ni yaco ena volaitukutuku ni kawatamata.

 IBALEBALE NI IVAKATAKILAKILA VEI KEDA

Na ivakatakilakila kece e tukuna qori o Jisu sa yaco sara tu ga nikua. Cava meda kauaitaka kina? E kaya o Jisu: “Ni dou raica ni sa yaco na veika qo, dou kila sara ni sa voleka na Matanitu ni Kalou.”—Luke 21:31.

Sa voleka ni vakayacora na inaki ni Kalou e vuravura na Matanitu ni Kalou

Eda kila ena ivakatakilakila kece e tukuna qori o Jisu kei na ituvatuva ni gauna ena iVolatabu, ni tauyavutaka na Kalou nona Matanitu mai lomalagi ena 1914. * Qori tale ga na gauna e lesi Luvena kina o Jisu Karisito me Tui ni nona Matanitu. (Same 2:2, 4, 6-9) Sa voleka na gauna me veiliutaki kina e vuravura na Matanitu ni Kalou, ena vakarusa tale ga na veiliutaki vakavuravura qai veisautaka na vuravura me parataisi meda bula tawamudu kina.

Dua ga na gauna lekaleka qo ena vakayacori kina na masu a vakavulica o Jisu: “Me yaco mai na nomuni Matanitu. Me caka na lomamuni e vuravura me vaka e caka tiko mai lomalagi.” (Maciu 6:10) Cava gona sa cakava tiko na Matanitu ni Kalou ni tauyavu ena 1914? Cava tale ga meda namaka ni na veiliutaki e vuravura?

^ para. 17 Mo kila eso tale na ka e yaco ena 1914, raica na ivola Na Cava Eda Vulica ena iVolatabu? tabaka na iVakadinadina i Jiova, ikuri ni ivakamacala 22.