Raica sara na lewena

Raica na lewenivola

Ena Marautaki Tale na Bula

Ena Marautaki Tale na Bula

A mate na wati Faizal, ia oti e dua na yabaki a vinakati me sele nona uto. E kaya: “Niu wilika na vola i Jope, au kila ni biuta qori o Jiova ena dua na inaki. Nida lomabibi, ena seavu na mosi noda wilika nona ivakaraitaki e dua e tukuni ena iVolatabu e sotava tale ga na ituvaki qori.” E tomana: “Ena marautaki tiko ga kina na bula.”

Se gone o Tarsha sa mate o tinana, e kaya: “Levu na leqa au sotava, ia e vakainaki noqu bula, au marau tale ga niu kila na Dauveibuli. Eda nuidei ni na tokoni keda tu ga o Jiova, ena vukei keda tale ga e veisiga.”

E VAKAMACALATAKI ena ulutaga sa oti eso na ituvaki rarawataki qai mosimosi, e dredre kina meda vosota rawa. Ni o vosota tiko na veika dredre, de dua o na vaqaqa ena marautaki tale na bula, se dua e kauaitaki iko tiko se sega. Mo nuidei ni kauaitaka na Kalou nomu rarawa, o nona ibulibuli talei tale ga.

E nuitaka na Kalou o koya e vola na ika86 ni Same, e kaya: “Au kaci yani vei kemuni ena siga ni noqu leqa, ni oni na rogoci au mai.” (Same 86:7) O na rairai vaqaqa, ‘Ena rogoci au vakacava na Kalou “ena siga ni noqu leqa”?’

E macala ga ni na sega ni kauta laivi na Kalou na noda leqa ena gauna qo. Ia e vakadeitaka nona Vosa ena iVolatabu ni na solia vei iko na lomavakacegu mo vosota kina. E kaya: “Moni kua ni lomaocaocataka e dua na ka, ia na ka kece me vakaraitaki vua na Kalou ena masu kei na kerekere salavata kei na vakavinavinaka, ena qai taqomaka na lomamuni kei na nomuni vakasama na vakacegu ni Kalou e uasivia na vakasama kece.” (Filipai 4:6, 7) Dikeva mada qo na veitikinivolatabu e vakadeitaka ni kauaitaki keda dina na Kalou.

E Kauaitaki Iko na Kalou

“Na Kalou e sega ni guilecava e dua [na siparo]. . . . Kua gona ni rere ni dou uasivi ira na siparo.”​Luke 12:6, 7, ivakamacala e ra.

VAKASAMATAKA MADA: Era sega ni dau kauaitaki vakalevu na manumanuvuka lalai, ia e mareqeti ira na Kalou. E kilai ira vinaka mada ga na siparo lalai, qai ka talei vua na veika buli kece. Ia ni vakatauvatani kei ira na siparo eda uasivi sara vua na Kalou. Eda nona ibulibuli talei ena vuravura qo, eda buli tale ga meda ‘ucui’ koya. E rawa kina nida bucina qai vakaraitaka nona itovo totoka o Jiova.—Vakatekivu 1:26, 27.

“Kemuni Jiova, oni sa vakasaqaqara vinaka e lomaqu, oni qai kilai au. . . . Oni kila na noqu vakanananu . . . Digovi au, moni kila na nuiqawaqawa ni noqu vakanananu.”​Same 139:1, 2, 23.

VAKASAMATAKA MADA: E kilai iko vinaka na Kalou. E kila na ka e tu e lomamu, kei na ka o kauai kina. Era na rairai sega ni kila eso na nomu leqa, kei na nomu nuiqawaqawa. Ia e kauaitaki iko na Kalou, e vinakata tale ga me vukei iko. O na marautaka kina nomu bula.

 E Vakainaki Nomu Bula

“Kemuni Jiova, ni rogoca noqu masu, me yaco yani vei kemuni na noqu masu ni kere veivuke. . . . Ni vakala mai na daligamuni vei au, ni rogoci au mai vakatotolo niu kaci yani. . . . Ni na rogoca o koya na nodra masu na vakaloloma.”​Same 102:1, 2, 17.

VAKASAMATAKA MADA: E vaka ga ni se qai tekivu na rarawa ni kawatamata, sa volatukutukutaka tiko o Jiova na wainimata kece e drodro. (Same 56:8) E okati kina na wainimatamu. Ni o ibulibuli talei ni Kalou, e sega vakadua ni guilecava na veika dredre kece o sotava, kei na nomu tagi.

“Kua ni taqaya niu nomu Kalou. Au na vakaukauataki iko, io, au na vukei iko . . . O yau o Jiova na nomu Kalou, au . . . tukuna vei iko, ‘Kua ni rere. Au na vukei iko.’”​Aisea 41:10, 13.

VAKASAMATAKA MADA: E tu vakarau na Kalou me vukei iko. Ke o bale, ena vukei iko mo duri tale.

iNuinui Totoka ena Veigauna se Bera Mai

“Na levu ni nona lomani vuravura na Kalou e solia kina na Luvena e duabau ga e bulia, mera kua ni rusa kina o ira na vakaraitaka nodra vakabauti koya, mera rawata ga na bula tawamudu.”​Joni 3:16.

VAKASAMATAKA MADA: Na levu ni nona lomani iko na Kalou e yalorawarawa ni solia na Luvena o Jisu me mate ena vukumu. Na isoro qori e rawa ni o nuitaka kina na bula marau, qai vakainaki me tawamudu. *

O na rairai lomabibi qai sega ni vosota rawa na ituvaki dredre o sotava tiko. Ia ni o vulica wasoma na Vosa ni Kalou, ena vakamarautaki iko, o na nuidei ni vakainaki na bula, ena dei tale ga nomu vakabauta na yalayala ni Kalou.

^ para. 19 Mo kila e levu tale na ka me baleta na isoro i Jisu kei na kena yaga vei iko, raica na vidio lekaleka, Vakananuma na Mate i Jisu ena www.jw.org. Rai ena KA E VAKARAUTAKI > VIDIO > NODA BULA VAKARISITO KEI NA CAKACAKA VAKAITALATALA.