Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

O Rawa ni Bula Tawamudu e Vuravura

O Rawa ni Bula Tawamudu e Vuravura

INUINUI TOTOKA! E yalataka na Dauveibuli nida na bula tawamudu ena vuravura ga qo. Ia e dredre vei ira e levu mera vakabauta qori. Era kaya ni sa tiki ga ni noda bula meda sucu mai, bula ga vakalekaleka, da mate tale. Eso tale era vakabauta nida rawa ni bula tawamudu, ia ena sega ni marautaki qori ena vuravura qo. Era kaya ni o na lai bula tawamudu i lomalagi ena gauna o mate kina. Na cava o nanuma?

E vinaka meda raica mada e liu na ka e kaya na iVolatabu me baleta na tolu na taro qo: E kilai vakacava mai na sala e buli kina na tamata na balavu ni nona bula? Na cava na inaki taumada ni Kalou me baleta na vuravura kei na kawatamata? Na cava eda mate kina?

IBULIBULI VAKASAKITI DUADUA

Eda ibulibuli vakasakiti duadua ni Kalou ni vakatauvatani kei na veika tale eso e bulia. Ena sala cava? E kaya na iVolatabu ni o keda ga eda buli meda ‘ucuya’ qai “vakataki” koya na Kalou. (Vakatekivu 1:26, 27) Kena ibalebale na Kalou e buli keda meda vakatotomuri koya kei na nona itovo, me vaka na loloma kei na lewadodonu.

E rawa nida vakasama meda kila kina na ka vinaka kei na ka ca, meda veiwekani tale ga kei na Kalou. E rawa nida qoroya na totoka ni lomalagi, na veika bula era tu wavoliti keda, droini, ivakatagi, kei na serekali. Na ka e talei duadua me baleti keda, oya nida rawa ni sokaloutaka na Dauveibuli. Qori na ka kece e vakaduiduitaki keda mai na veika bula tale eso e vuravura.

Vakasamataka mada: Ke nona inaki na Kalou me lekaleka wale na gauna ni noda bula, vakacava ena buli keda meda vakatotomuria nona itovo? Ena solia vei keda na gauna meda bucina qai vakavinakataka tiko ga noda vakaraitaka na itovo qori? E levu na ka vinaka e cakava ena vukuda na Kalou me rawa nida marautaka na bula tawamudu e vuravura.

INAKI TAUMADA NI KALOU

Eso era kaya ni sega ni inaki ni Kalou meda bula tawamudu e vuravura. Era kaya ni buli na vuravura me tiko vakawawa kina na tamata, me vakatovolei kina ke veiganiti me lai bula tawamudu kei na Kalou e lomalagi. Ke dina na vakasama ya, kena ibalebale e vakavuna na Kalou na veika ca kei na rarawa e vuravura. Ia qori e veicalati kei na ka e  kilai kina na Kalou, ni kaya na iVolatabu me baleti koya: “[E] dodonu na nona sala kece. E Kalou yalodina, e sega vakadua ni lewacala, e yalododonu qai daudina o koya.”—Vakarua 32:4.

E vakamatatataka na iVolatabu na inaki ni Kalou me baleta na vuravura ni kaya: “E nei Jiova na lomalagi, ia sa solia na vuravura vei ira na luve ni tamata.” (Same 115:16) Io, na Kalou e bulia e dua na vuravura totoka me itikotiko dei ni kawatamata, e vakarautaka tale ga na veika e gadrevi me vakainaki qai tawamudu kina na bula.—Vakatekivu 2:8, 9.

“E nei Jiova na lomalagi, ia sa solia na vuravura vei ira na luve ni tamata.”​—Same 115:16

E matata na ka e kaya na iVolatabu ena inaki ni Kalou me baleti keda. Erau vakaroti na imatai ni veiwatini me rau ‘vakasinaiti vuravura qai vakamalumalumutaka,’ me rau “lewa tale ga . . . na kabula kece ga era veitosoyaki voli e vuravura.” (Vakatekivu 1:28) Dua dina na itavi dokai e lesi vei rau me baleta na vuravura, me rau vakatetea tale ga na Parataisi me robota na vuravura taucoko! Io, e yalataki vei Atama kei Ivi vaka kina na nodrau kawa na bula tawamudu e vuravura, sega ni bula e lomalagi.

VUNA EDA MATE KINA

Na cava eda mate kina? E kaya na iVolatabu ni dua na kabula vakayalo e saqata na ituvatuva ni Kalou e Iteni, mani vakatokai me dauveivorati o Setani na Tevoro. A yaco vakacava qori?

O Setani e temaki rau na imatai ni veiwatini o Atama kei Ivi me rau talaidredre vua na Kalou. E kaya o Setani ni bureitaka vei rau na Kalou e dua na ka vinaka, oya me rau lewa na ka ca kei na ka vinaka. Ni rau digia me rau muri Setani qai talaidredre vua na Kalou, rau mate kina me vaka ga e vakarota na Kalou. E kau tani tale ga vei rau na inuinui ni bula tawamudu ena vuravura Parataisi.—Vakatekivu 2:17; 3:1-6; 5:5.

E tarai keda tu me yacova mai qo na ca ni nodrau talaidredre o Atama kei Ivi. E kaya na Vosa ni Kalou: “Ena vuku ni dua ga na tamata [Atama] e curu kina i vuravura na ivalavala ca, kei na mate ena vuku ni ivalavala ca, mani dewa na mate vei ira na tamata kece ga.” (Roma 5:12) E sega ni ‘lalawa’ vuni ni Kalou se sa lewa oti tu meda ivalavala ca qai mate, erau vakadewa ga qori vei keda na vuda.

O RAWA NI BULA TAWAMUDU E VURAVURA

E sega ni vakaseva na inaki taumada ni Kalou me baleta na vuravura kei na kawatamata na veivorati e Iteni. Nona loloma na Kalou kei na nona lewadodonu e vakarautaka kina na sala me sereki keda mai na ivalavala ca kei na mate. E kaya na yapositolo o Paula: “Na isau ni ivalavala ca na mate, ia na iloloma ni Kalou na bula tawamudu ena vuku i Karisito Jisu na noda Turaga.” (Roma 6:23) Na nona yalololoma na Kalou e “solia kina na Luvena e duabau ga e bulia [Jisu Karisito], mera kua ni rusa kina o ira na vakaraitaka nodra vakabauti koya, mera rawata ga na bula tawamudu.” (Joni 3:16) E rawa ga ni vakalesui kece mai na ka e vakayalia o Atama ni yalorawarawa o Jisu me cabora nona bula me ivoli. *

Sa voleka na gauna me vakayacora kina na Kalou nona yalayala e vuravura. O rawa ni bula ena vuravura totoka qo ke o muria na ka e kaya o Jisu: “Dou curu ina matamata qiqo, ni rabalevu na matamata qai galala na sala e basika ina rusa, e le levu tale ga era muria tiko, ia e qiqo na matamata qai rabalailai na sala e basika ina bula, e le lailai tale ga era kunea.” (Maciu 7:13, 14) Nomu bula ena veigauna se bera mai e vakatau ena vakatulewa o cakava. O na vakatulewa gona vakacava?

^ para. 17 Me ikuri ni vakamacala me baleta na yaga ni isoro, raica na wase 5 ni ivola Na Cava Eda na Vulica ena iVolatabu? tabaka na iVakadinadina i Jiova, sa tu tale ga ena website na www.jw.org.