Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

E Bibi Nomu Vakatulewa!

E Bibi Nomu Vakatulewa!

SA LEWAI OTI TU NA NOMU BULA? Eso era vakabauta ni sa lewai oti tu na nodra bula, e sega kina ni rawa mera digia na ka mera cakava. Nira sega ni rawata na nodra isausau, era sega ni via tovolea tale nira nanuma ena guce ga nodra sasaga. Era kaya: “Sega beka ga ni kena inaki!”

Eso tale era yalolailai nira nanuma era na sega ni drovaka rawa na veivakalolomataki kei na veika tawadodonu e yaco tu e vuravura. De dua era saga mera vakavinakataka nodra bula, ia e vakaleqa nodra lalawa ena levu na gauna na ivalu, basulawa, leqa tubukoso, kei na tauvimate. Era na rairai kaya, ‘E sega na betena.’

Eso na ituvaki o sotava ena nomu bula e rawa ni vakaleqa na ka o lalawataka. (Dauvunau 9:11) Ia nomu bula tawamudu ena gauna se bera mai e vakatau ena ka o vakatulewataka. Meda raica mada se vakadinadinataka vakacava qori na iVolatabu.

Nira vakarau curuma na Vanua Yalataki na Isireli, e kaya vei ira o Mosese: “Niu sa biuta e matamu na bula kei na mate, na veivakalougatataki kei na veicudruvi, mo qai digia na bula mo rawa ni bula, o iko kei ira na nomu kawa, ni o lomani Jiova na nomu Kalou, ni o rogoca na domona, o kabiti koya tale ga.”Vakarua 30:15, 19, 20.

“Niu sa biuta e matamu na bula kei na mate, na veivakalougatataki kei na veicudruvi, mo qai digia na bula.”​—Vakarua 30:19

E vakabulai ira na Isireli na Kalou mai na nodra vakabobulataki tu e Ijipita. E yalataka tale ga vei ira na bula galala kei na marau ena Vanua Yalataki. Ia e tiko na ka mera cakava, ena vinakati mera “digia na bula” ke ra via vakalougatataki. Era na digia na bula nira ‘lomana na Kalou, rogoca na domona, qai kabiti koya tiko ga.’

Na nomu bula ena gauna se bera mai ena vakatau ena nomu vakatulewa ena gauna qo. Ke o vakatulewataka mo lomana na Kalou, rogoca na domona, qai kabiti koya, o sa digia tiko mo bula tawamudu ena vuravura parataisi. Na cava e okati ena nomu lomana na Kalou, rogoca na domona, qai kabiti koya tiko ga?

DIGIA MO LOMANA NA KALOU

Na loloma e itovo talei duadua ni Kalou. E kaya na yapositolo o Joni ena veidusimaki ni yalo tabu ni “Kalou ga na loloma.” (1 Joni 4:8) Qori na vuna e kaya kina o Jisu me baleta na ivakaro levu duadua: “Mo lomani Jiova na nomu Kalou ena lomamu taucoko, ena nomu vinaka taucoko, kei na nomu vakasama taucoko.” (Maciu 22:37) Na veiwekani kei na Kalou o Jiova e dodonu me yavutaki ena loloma, me kua ni yavutaki ena rere se talairawarawa vakamataboko. Na cava meda digia kina meda lomani koya?

Nona lomani keda o Jiova e rawa ni vakatauvatani ina nodra lomani luvedra na itubutubu. Era ivalavala ca na itubutubu, ia era veivakasalataki vakayalololoma, veiuqeti, veitokoni, qai veivakavulici nira vinakata mera marautaka na luvedra na nodra bula, me rawa vinaka nodra sasaga. Na cava era vinakata na itubutubu vei ira na luvedra? Era vinakata na itubutubu mera lomani, mera muria tale ga na gone na veika era tuberi kina me rawa nira vakila na kena yaga. Ena vakasama vata qori, e vinakata na Tamada vakalomalagi meda lomani koya meda vakaraitaka kina nida vakavinavinakataka na veika e cakava ena vukuda.

 ROGOCA NA DOMONA

Ena vosa taumada e volai kina na iVolatabu, na “rogoca” e tiko kina na vakasama ni “talairawarawa.” Na vosa vata qori e dau tukuni vua e dua na gone, “Vakarorogo vei rau nomu itubutubu.” Koya gona, noda rogoca na domo ni Kalou e kena ibalebale noda vulica qai talairawarawa ina ka e tukuna. Eda na sega ni rogoca dina na domo ni Kalou, ia eda sa rogoca tiko na domona nida wilika qai bulataka na ka e volai ena nona Vosa na iVolatabu.—1 Joni 5:3.

E vakaraitaka ena dua na gauna o Jisu na vuna e bibi kina meda rogoca na domo ni Kalou, e kaya: “E sega ni bula na tamata ena madrai wale ga, e bula ga ena vosa kece e lako mai na gusu i Jiova.” (Maciu 4:4) E yaga na kakana vei keda, ia e yaga sara vakalevu na noda vulica na veika me baleta na Kalou. Ni vakamacalataka na vuna na tui vuku o Solomoni, e kaya: “E itataqomaki na vuku me vaka ga ni itataqomaki na ilavo, ia qo na yaga ni kilaka: Na vuku e vakabula na kena itaukei.” (Dauvunau 7:12) Na kilaka me baleta na Kalou kei na nona veivakavukui ena taqomaki keda nikua, ena vukei keda tale ga meda vakatulewa vinaka meda rawa ni bula tawamudu ena gauna se bera mai.

KABITI KOYA TIKO GA

Vakasamataka mada na vakatautauvata i Jisu eda raica ena ulutaga sa oti, e tukuni kina: “E qiqo na matamata qai rabalailai na sala e basika ina bula, e le lailai tale ga era kunea.” (Maciu 7:13, 14) Nida muria tiko na sala qori, eda vinakata me dusimaki keda e dua e nuitaki da qai kabiti koya tiko ga me yacova nida sa rawata na bula tawamudu. E bibi gona meda kabita tiko ga na Kalou. (Same 16:8) Eda na cakava vakacava qori?

Sa tu rawa e levu na ka meda cakava e veisiga, sa qai tu tale e levu na ka eda vinakata tu meda cakava. Ke da ogataka vakasivia na veika qori se vakalaiva me vakawelei keda, ena lailai se sega sara ga na gauna meda cakava kina na ka e vinakata na Kalou. Qori na vuna e vakasalataki keda kina na iVolatabu: “Ni qarauna matua na nomuni ilakolako, ni kua ni vakataki ira na lialia, ni vakataki ira ga na vuku, ni vakayagataka vakavinaka na nomuni gauna, nida sa bula tu ena veisiga ca.” (Efeso 5:15, 16) Eda na kabita tiko ga na Kalou ke da vakaliuca ena noda bula na noda veiwekani kei koya.—Maciu 6:33.

NOMU NA VAKATULEWA

O na sega ni rawa ni veisautaka na veika e yaco ena veigauna sa oti, o rawa ga ni cakava eso na ka me vinaka kina nomu bula kei na nodra bula na wekamu ena gauna se bera mai. E kaya na iVolatabu ni lomani keda na Tamada vakalomalagi na Kalou o Jiova, e vakaraitaka tale ga vei keda na ka e vinakata meda cakava. Raica mada na ka e kaya na parofita o Maika:

“Sa tukuna oti vei iko, na tamata, na ka vinaka. Na cava tale e vinakata vei iko o Jiova? Mo lewadodonu ga, mo mareqeta na yalodina, mo yalomalumalumu tale ga ni o lako vata kei na nomu Kalou!”​Maika 6:8.

Vakacava o na ciqoma na veisureti i Jiova mo lako vata kei koya qai vakalougatataki tawamudu me vaka ga e yalataka? E nomu na vakatulewa!