Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 ULUTAGA LEVU | O NA CIQOMA NA ILOLOMA UASIVI NI KALOU?

Cava o na Cakava ena iLoloma Uasivi Duadua ni Kalou?

Cava o na Cakava ena iLoloma Uasivi Duadua ni Kalou?

“Ni uqeti keitou na loloma i Karisito . . . e mate ena vukuda kece mera kua kina ni bula ena vukudra ga, o ira era bula tiko, mera bula ga ena vuku i koya e mate ena vukudra.”2 Korinica 5:14, 15.

NI SOLI vei keda e dua na iloloma totoka, e dodonu meda vakavinavinakataka. Qori na ka e vakabibitaka o Jisu ni vakabulai ratou oti na tini na vukavuka. E “lesu tale e dua vei ratou . . . , e vakacaucautaka na Kalou ena domolevu.” Ia e taroga o Jisu: “A sega beka ni vakabulai e le tini? I vei ga o ratou na le ciwa?” (Luke 17:12-17) Eda vulica e keri ni rawa nida guilecava totolo na veika vinaka era cakava vei keda eso tale!

E duatani duadua na isoro i Jisu, e iloloma uasivi duadua me bau vakarautaki. O na vakaraitaka vakacava ni o vakavinavinakataka na iloloma qori ni Kalou?

  • Saga mo kilai koya e solia na iloloma. E vinakati eso tale na ka me lakovata kei na isoro me qai rawa na bula tawamudu. E kaya o Jisu ena nona masu: “Ena rawata na bula tawamudu, o koya e vulica tiko ga na veika me baleti kemuni na Kalou dina duadua ga, kei Jisu Karisito oni tala mai.” (Joni 17:3) Ke o kila ni a vakabulai iko e dua na turaga ni o se gone, e macala ga ni o na via vulica e levu tale na ka me baleta na turaga qori kei na vuna e vakabulai iko kina. E vakarautaka na ivoli na Kalou ni vinakata meda kilai koya qai veiwekani voleka kei koya. E uqeti keda na iVolatabu: “Toro voleka vua na Kalou ena  qai toro voleka mai vei kemuni o koya.”—Jemesa 4:8.

  • Vakabauta na isoro. “Ena bula tawamudu o koya e vakaraitaka ni vakabauta na Luvena.” (Joni 3:36) Ni tukuni me vakaraitaki na vakabauta, kena ibalebale e tiko na ka mo cakava. E vinakati mo cakacakataka nomu vakabauta na isoro se me laurai ena ka o cakava. (Jemesa 2:17) Ni soli vei iko e dua na iloloma, ena qai nomu ga ke o dodoka na ligamu mo taura. E va tale ga qori na ivoli e vakarautaka o Jiova, ena qai yaga ga vei iko ke o ciqoma. O na ciqoma vakacava na ivoli? Vulica na ivakarau ni bula e vinakata na Kalou qai muria sara. * Kerea nona veivosoti na Kalou me savasava kina nomu lewaeloma. Vakadeitaka ni yaga dina na isoro, nira na marautaka kina na bula sautu kei na vakacegu o ira kece era vakaraitaka nodra vakabauta na isoro!Iperiu 11:1.

  • Tiko ena iVakananumi ni mate i Jisu. E tauyavutaka o Jisu e dua na soqo meda dau vakananuma kina e veiyabaki na kena vakarautaki na ivoli. E kaya o Jisu me baleta na soqo qo: “Dou dau cakava qo mo dou vakananumi au kina.” (Luke 22:19) Era na vakananuma tiko na iVakadinadina i Jiova na mate i Jisu ni dromu na siga ena Tusiti, na ika11 ni Epereli, 2017. Ena rogoci e dua na ivunau e dua na aua na kena dede, ena vakamacalataki kina na yaga ni mate i Jisu ena gauna qo kei na gauna se bera mai. Era tiko ena iVakananumi ena yabaki sa oti e rauta ni le 20 na milioni e veiyasa i vuravura. Keimami veisureti tale tu moni mai tomani keimami meda vakavinavinakataka na iloloma uasivi ni Kalou.

^ para. 7 Na sala vinaka duadua eda na kila kina na Kalou qai toro voleka vua, oya meda vulica nona Vosa na iVolatabu. Veitaratara kei ira na iVakadinadina i Jiova se rai ena neimami website na www.jw.org ke o via kila na sala mo vulica kina na iVolatabu.