Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

Rawa ni Veivakabulai na Muri Totolo ni iVakasala!

Rawa ni Veivakabulai na Muri Totolo ni iVakasala!

ENA ika26 ni Tiseba , 2004, a yaco na uneune e Simeulue, e dua na yanuyanu ena baravi ni vualiku donuya na ra kei Sumatra mai Idonisia. E 9.1 na kena kaukaua. Era vakararai i waitui na lewenivanua ni totolo na kena suka tiko na wai ina vanua titobu. Sega ni bera nodra cici ena veiulunivanua o ira na vakaitikotiko e kea, ra qai kailavaka, “Smong! Smong!” e kena ibalebale ualoka. Ena loma ga ni 30 na miniti, sa tekivu vakacacana e levu na vale kei na veikorokoro na ua.

Na yanuyanu o Simeulue e imatai ni vanua me vakacaca kina na ualoka. Era le 78 na udolu na kena lewenivanua, ia e le 7 ga e ratou mate. Cava era sega ni mate kina e levu? * E dua nodra ivosavosa ena yanuyanu qo: ‘Ke yaco e dua na uneune kaukaua qai suka na wai, cici ina veiulunivanua, ni na totolo ga na cabe ni ua i vanua.’ Ena veika era sa yaco oti, era kila na lewe i Simeulue na cabe ni ualoka nira raica ga na veiveisau e waitui. Nodra raica totolo na ivakatakilakila qo e rawa kina nira bula.

Na iVolatabu e tukuna ni na vakarau yaco e dua na ituvaki leqataki, oya na “veivakararawataki levu ena ivakatagedegede e sega ni bau vakilai vakadua mai na ivakatekivu kei vuravura me yacova mai qo, io, ena sega tale ni qai yaco e muri.” (Maciu 24:21) Ia na noda vuravura ena sega ni rusa ena vuku ni veika ca eda vakavuna se na kena yaco vakasauri na leqa tubukoso—baleta ni inaki ni Kalou me tu ga na vuravura me tawamudu. (Dauvunau 1:4) Ena siga ni veivakararawataki levu qori, na Kalou ena “vakawabokotaki ira tale ga na vakarusai vuravura tiko.” Ena oti kina vakadua na ca kei na rarawa. (Vakatakila 11:18; Vosa Vakaibalebale 2:22) Sa bau dua dina na ka ni veivakalougatataki!

Kena ikuri, era na sega ni mate o ira e sega nodra cala me vaka e dau yaco ena ualoka, uneune, se ni kacabote na ulunivanua. E kaya na iVolatabu ni “Kalou ga na loloma,” e yacana o Jiova, e yalataka tu ni “o ira na yalododonu era na taukena na vuravura, era na qai bula tawamudu kina.” (1 Joni 4:8; Same 37:29) Na cava mo cakava mo bula sivia kina na veivakararawataki levu, mo marautaka tale ga na ka ni veivakalougatataki sa yalataki tu? E bibi ga mo: Muria totolo na ivakasala e vakarautaki!

YADRA TIKO

Eda sega ni kila na gauna ena oti kece kina na ca kei na rarawa, ni tukuna o Jisu: “E sega ni dua e kila na siga ya kei na kena aua, era sega ni kila na agilosi mai lomalagi, e sega ni kila na Luvena, e kila duadua ga o Tamana.” Ia e uqeti keda o koya meda “yadra tiko.” (Maciu 24:36; 25:13) Na cava meda yadrava? E vakamacalataka na iVolatabu na ituvaki kei vuravura ni bera ni mai vakataulewa  na Kalou. Me vaka ga na nodra kila rawa na lewenivanua e Simeulue na cabe ni ualoka ena nodra raica na suka totolo ni ua, na veiveisau tale ga e yaco tu nikua e dusia nida sa volekata na icavacava. Na kato e toka ena tabana qo e vakaraitaka eso na veiveisau e tukuni tu ena iVolatabu.

Eso na veika era volai ena kato qo era yaco ena veigauna sa oti. Ia e tukuna o Jisu ni gauna eda raica kina na “ka kece qo,” eda na kila ni sa voleka sara na icavacava. (Maciu 24:33) Tarogi iko mada, ‘Vakacava na ivakatakilakila kece sa tukuni mai qo, sa bau yaco mada ena dua na gauna (1) e veiyasa i vuravura, (2) ena dua vata ga na gauna, kei na (3) kena ivakatagedegede e ca duadua?’ E matata vinaka nida sa bula donuya sara tu ga na gauna qori.

IVAKARAITAKI NI LOLOMA NI KALOU

“Na totolo ni kena soli na ivakasala . . . e taqomaka na bula,” e kaya e dua na peresitedi vakacegu ni Merika. Ni oti na ualoka ena 2004, e vakarautaki ena veivanua era vakacacani e dua na ituvatuva me rawa kina nira taqomaki ena dua tale na gauna se bera mai. Na Kalou tale ga e vakarautaka tu na ivakasala ni bera ni yaco na icavacava. Sa tukuna tu na iVolatabu: “Ena vunautaki mada na itukutuku vinaka qo ni Matanitu ni Kalou ena veiyasa i vuravura me ivakadinadina ina veimatanitu kece, sa na qai yaco na icavacava.”—Maciu 24:14.

Ena yabaki sa oti, era vakayagataka na iVakadinadina i Jiova e sivia ni 1.9 na bilioni na aua ena kena vunautaki na itukutuku vinaka ena 240 na vanua ena sivia na 700 na vosa. Qori e dua na ivakadinadina levu ni sa voleka na icavacava. Nira lomani ira na wekadra, era solia kece kina nodra igu na iVakadinadina i Jiova mera veivakasalataki ni sa voleka na siga ni veilewai ni Kalou. (Maciu 22:39) Na yaga ni itukutuku qo e vakaraitaka na nona lomani iko o Jiova. Nanuma tiko, “ni sega ni vinakata [na Kalou] me rusa e dua, e vinakata ga moni veivutuni kece.” (2 Pita 3:9) Vakacava o na ciqoma na loloma ni Kalou qai muria totolo na ivakasala e sa vakarautaka tu?

 DRO MO BULA!

Na gauna ga era raica kina na lewenikoro era tiko ena baravi kei Simeulue ni sa suka na ua, era sega tale ni waraka me lesu mai nira sa dro ena kena vanua cecere. E vakabulai ira nodra vuki totolo. Me rawa nida bula sivia na veivakararawataki levu, e bibi tale ga meda dro ina vanua cecere vakaivakatakarakara de da qai bera. Ena sala cava? E uqeti vakalou na parofita o Aisea me vola e dua na veisureti veiuqeti e baleta tale ga na “veisiga mai muri,” na gauna sara ga eda bula tu kina qo. E tukuni kina: “Ni lako mai meda lai cabe ina ulunivanua i Jiova . . . Ena vakavulici keda o koya ena nona ivalavala, eda na muria na nona sala.”—Aisea 2:2, 3.

Ni o gole ena dua na ulunivanua, o na rawa ni raica vinaka kina na ka, e vanua vinaka tale ga mo taqomaki kina. E via tautauvata qori kei na nodra vukei e milioni e veiyasa i vuravura ena iVolatabu mera kila na sala ni Kalou, mera cakava kina na veiveisau ena nodra bula. (2 Timoci 3:16, 17) Na nodra cakava qo, era ‘muria tiko kina na sala ni Kalou,’ ra marautaka tale ga na nona loloma kei na veitaqomaki.

Vakacava, o na ciqoma na veisureti qori me rawa ni taqomaki iko vakayalololoma na Kalou ena gauna dredre eda sa donuya tu qo? Keimami uqeti kemuni moni dikeva vakavinaka na ivakadinadina vakaivolatabu ni “iotioti ni veisiga” e tiko ena kato qo. Era na marau na iVakadinadina i Jiova oni tiko veivolekati mera vakamatatataka na tikinivolatabu era tiko ena kato, kei na sala moni bulataka kina. E rawa tale ga ni saumi eso na nomuni taro ni oni rai ena neimami website, na www.jw.org. Rai ena IVAKAVUVULI VAKAIVOLATABU > SAUMI NA TARO VAKAIVOLATABU.

^ para. 3 Era mate ena 2004 e sivia e 220 na udolu na lewenivanua mai na veivanua e cabe kina na ualoka—qo e dua na vakacaca levu duadua ni ualoka me bau volatukutukutaki.