Raica sara na lewena

Raica na lewenivola

Vuna e Levu Kina na Veicati

Vuna e Levu Kina na Veicati

Cava sa qai kaukaua tiko ga kina na veicati e vuravura? Me rawa ni saumi na taro qori, e bibi meda kila mada i liu na cava na veicati, na vuna e yaco kina, kei na cava era veicati kina e levu.

Na Cava na Veicati?

Qori na noda cata se sevaka e dua na tamata se dua na ilawalawa. Na ivakarau ni yalo qo e rawa ni vakawakana tu e lomada ena dua na gauna balavu.

VUNA E YACO KINA NA VEICATI

Levu na ka e rawa ni vakavuna na veicati. E levu era cati ga nira lewe ni dua na ilawalawa tamata, sega ni ka era cakava. O ira na cati era dau raici tu mera tamata ca, e ca nodra inaki, se dredre mera tokona na veisau. Era dau raici tale ga mera tamata beci, e rawa nira uqeta na veileqaleqati se ra vakavuna sara ga. O ira na dauveicati a rairai caka vei ira eso na itovo kaukaua, veika tawadodonu, se so tale na ka e vakavuna mera bucina kina na yalo qori.

CAVA ERA VEICATI KINA E LEVU?

Eso era cati ira eso tale era se bera mada ga ni sota. Kena ivakaraitaki, e dua e rawa ni vakamurimuria nona raicala e dua tale, baleta ga ni dokai koya se rau veivolekati. E dau rawarawa gona mera rawai e levu mera veicati. Toso na gauna sa ra tokona tale ga na raicala qori eso tale.

Nida kila na rawarawa ni kena veirawai na veicati, ena qai matata vei keda na vuna era veicati kina e levu. Ia me rawa nida valuta na yalo ni veicati, e bibi meda kila na vuna levu duadua e yaco kina na veicati. Qori e vakamatatataki tu ena iVolatabu.

TUKUNA NA IVOLATABU NA VU NI VEICATI

E SEGA NI TEKIVUTAKA NA TAMATA NA VEICATI. A tekivu na veicati ena gauna e saqata kina na Kalou e dua nona agilosi mai lomalagi. Na agilosi qori e qai vakatokai me o Setani na Tevoro. “E daulaba o koya mai na ivakatekivu” ena gauna e talaidredre kina. E kilai ni “daulasulasu, e tama ni lasu tale ga.” Sa rauta me uqeta tiko na veicati kei na itovo kaukaua. (Joni 8:44; 1 Joni 3:11, 12) E kaya na iVolatabu ni dau vakatubu ca, cudrucudru, qai voravora.—Jope 2:7; Vakatakila 12:9, 12, 17.

NIDA KAWA IVALAVALA CA E RAWARAWA MEDA VEICATI. E tokoni Setani o Atama na imatai ni tamata mani valavala ca tale ga. E vakadewa kina vei keda na ivalavala ca kei na bula e sega ni uasivi. (Roma 5:12) O Keni na ulumatua nei Atama e cati tacina o Epeli qai labati koya. (1 Joni 3:12) Eso nikua era dau loloma qai veinanumi. Ia me vaka nida kawa ivalavala ca, e dua na iwiliwili levu era dau nanumi ira ga, vuvu qai dokadoka. Qori na itovo e uqeta na veicati.—2 Timoci 3:1-5.

NA VEIVAKADUIDUITAKI E UQETA NA VEICATI. Na itovo ca kei na veivakalolomataki e dau uqeta na veicati ena vuravura qo. Kena ivakaraitaki, dua na ka na levu ni veivakaduiduitaki, vosa veibeci, veivakasagai, kei na vakacaca. Na cava e yaco kina qori? “Ni lewa tiko na vu ni ca na vuravura taucoko,” qori o Setani na Tevoro.—1 Joni 5:19.

Ia e sega ni tukuna ga na iVolatabu na vuna e yaco kina na veicati. E tukuna tale ga na kena iwali.