Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

Na Cava sa Cakava Oti na Kalou?

Na Cava sa Cakava Oti na Kalou?

Ke o via kila vinaka e dua, ena veivuke vakalevu nomu vulica na veika sa cakava oti, kei na nona vosota na ituvaki dredre. Ke o via kila vinaka tale ga na Kalou, mo vulica na veika sa cakava oti. O na rairai kurabuitaka na yaga ni veika sa cakava oti, ena vakatau tale ga kina nomu bula se bera mai.

E BULIA NA KA KECE NA KALOU ME YAGA VEI KEDA

O Jiova na Dauveibuli Cecere, e “kilai na veika tawarairai me baleti koya, ya na nona kaukaua e sega ni vakaiyalayala.” (Roma 1:20) “O koya ga e bulia na vuravura ena nona kaukaua, o koya e vakataudeitaka na vanua bulabula ena nona vuku. O koya e tevuka . . . na lomalagi ena nona kila.” (Jeremaia 10:12) Na vakatubuqoroqoro tale ga ni nona ibulibuli na Kalou e vakavotuya ni kauaitaki keda.

Vakasamataka mada na sala e vakalougatataki keda kina o Jiova ena nona buli keda ‘meda ucui’ koya. (Vakatekivu 1:27) Kena ibalebale qori ni buli keda meda vakaraitaka eso nona itovo e sega ni vakatauvatani rawa. E buli keda meda kauaitaka na veika vakayalo, se meda kila na nona rai kei na veika e bibi vua. Nida saga meda muria na veika qori, eda na marautaka na noda bula, ena vakainaki tale ga. Koya e uasivi sara, nida na rawa ni veiwekani voleka kei koya.

Nida raica na veika buli era tu qo e vuravura, e laurai sara ga kina na rai ni Kalou me baleti keda. E kaya na yapositolo o Paula ni “laurai votu na ivakadinadina ni nona caka vinaka tiko ga, e vakatauca vei [keda] na uca mai lomalagi, e solia na gauna vinaka ni tatamusuki, e vakamamautaki [keda] ena kakana kei na loma[da] ena marau.” (Cakacaka 14:17) E sega ni vakarautaka na Kalou na ka ga meda bula kina. E levu tale na ka e vakarautaka kei na kena veimataqali meda marautaka  kina na bula. Qori e ivakaraitaki lailai ga ni veika sa nakita tu vei keda na Kalou.

E bulia na vuravura o Jiova meda bula tawamudu kina. E kaya na iVolatabu: “Sa solia na vuravura vei ira na luve ni tamata” e “sega ni bulia me lala, e bulia ga me tawa.” (Same 115:16; Aisea 45:18) O cei me tawana, me vakacava tale ga na kena dede? “O ira na yalododonu era na taukena na vuravura, era na qai bula tawamudu kina.”—Same 37:29.

O Jiova e bulia na imatai ni tagane kei na yalewa, o Atama kei Ivi qai vakatikori rau ena dua na parataisi e vuravura me rau “teivaka [rau] qarava tale ga.” (Vakatekivu 2:8, 15) E rua na itavi bibi e lesi rau kina na Kalou: “Drau vakawa, mera le levu mai, drau vakasinaiti vuravura, drau vakamalumalumutaka.” (Vakatekivu 1:28) Nodrau inuinui sara tu ga o Atama kei Ivi na bula tawamudu e vuravura. Ka ni rarawa ni rau talaidredre vua na Kalou, rau sega ni okati kina kei ira “na yalododonu” era na “taukena na vuravura.” Ia eda na vulica ni sega ni veisautaka na inaki i Jiova na ka rau cakava qori. Meda dikeva mada e dua tale na ka e cakava na Kalou.

E VAKARAUTAKA NA KALOU NA NONA VOSA

E kilai na iVolatabu ni Vosa ni Kalou. Na cava e vakarautaka kina vei keda o Jiova na iVolatabu? Kena inaki levu meda kilai koya kina. (Vosa Vakaibalebale 2:1-5) E sega ni saumi kece ena iVolatabu na taro eda rairai vaqaqa tu me baleta na Kalou, ni sega ga ni dua na ivola e cakava rawa qori. (Dauvunau 3:11) Ia na ka kece e volaitukutukutaki kina ena vukei keda meda kila vinaka na Kalou. Eda na kila nona itovo nida raica na veika e sa cakava oti se cakava tiko nikua me baleti keda. Okati kina na ka me baleti ira e taleitaka kei ira e cata. (Same 15:1-5) E vakamatatataki tale tu ga kina nona rai me baleta na sokalou, itovo kei na iyau. Eda na vulica tale ga kina na nona itovo o Jiova ena vosa i Jisu Karisito kei na ka e cakava.—Joni 14:9.

Dua tale na vuna e vakarautaka kina o Jiova na nona Vosa na iVolatabu, oya meda rawa ni kila kina na ka meda cakava meda marautaka na bula e vakainaki. E dusimaki keda o Jiova ena iVolatabu ena ka meda cakava me marau kina noda vuvale, sala meda lomavakacegu kina, kei na noda vosota na lomabibi. Me vaka ena qai vakamacalataki ena mekesini qo, ena saumi ena iVolatabu eso na taro bibi eda dau vakataroga tu: Cava sa rui levu kina na rarawa? Cava ena yaco ena veisiga se bera mai? E vakamacalataka tale ga na ka sa cakava oti na Kalou me vakayacori kina na nona inaki taumada.

E ivola vakasakiti dina na iVolatabu ni vakavuna sara ga na Kalou na kena volai, qai rawa ni vakadinadinataki ena levu tale na sala. E volai ena loma ni 1,600 na yabaki era vola e le 40 na tagane, e dua ga na kena usutu bibi, oya ni vakavuna ga na Kalou. (2 Timoci 3:16) E duidui vei ira na ivola makawa tale eso ni maroroi vinaka ena veitabagauna sa sivi, me vaka e vakadinadinataki ena vica vata na udolu na ivolavivigi ni iVolatabu. Koya e vakasakiti sara oya ni sega ni tarovi rawa na kena vakadewataki, veisoliyaki kei na kena wiliki. Nikua, e ivola veisoliyaki qai vakadewataki vakalevu duadua. Na kena se tiko ga qo na iVolatabu e vakadinadinataka sara ga ni “vosa ni noda Kalou e tudei me tawamudu.”—Aisea 40:8.

E VAKADEITAKA NA KALOU NA NONA INAKI

Dua tale na ka talei e cakava na Kalou, oya na nona vakadeitaka ni na vakayacori dina na nona inaki me baleti keda. Me vaka sa cavuti oti mai, e nona inaki na Kalou meda bula tawamudu e vuravura. Ia na nona talaidredre vua na Kalou o Atama qai valavala ca, e sega ni rawata kina na bula tawamudu, o ira tale ga na nona kawa. “Ena vuku ni dua ga na tamata e curu kina i vuravura na ivalavala ca, kei na mate ena vuku ni ivalavala ca, mani dewa na mate vei ira na tamata kece ga ni sa valavala ca na tamata kece ga.” (Roma 5:12) E vakalewai gona na inaki ni Kalou ena nona talaidredre. Ia na cava e qai cakava o Jiova?

E sega ni dau veiveisau o Jiova ena ka e cakava kei na nona itovo. E lewadodonu vei rau o Atama kei Ivi ena ka rau cakava, e vakarautaka tale ga vakayalololoma na inuinui me baleta nodrau kawa.  Ni Kalou vuku e kila vinaka na ka me cakava ena ituvaki qori, totolo ga nona vakarautaka na kena iwali. (Vakatekivu 3:15) Eda na qai sereki ga ena ivalavala ca kei na mate ena vuku i Jisu Karisito, na Luve ni Kalou. Cava e okati kina?

Meda sereki mai na ca ni nona talaidredre o Atama, e talai Jisu mai vuravura o Jiova me vakavulici keda ena sala ina bula, me “solia tale ga na nona bula me kedra ivoli e le levu.” * (Maciu 20:28; Joni 14:6) O Jisu ga e rawa ni vakarautaka na ivoli baleta ni uasivi me vakataki Atama. Ia e sega ni vakatotomuri Atama, ni dei ena nona yalodina me yacova nona mate. Ni sega ni dodonu me mate, e vakaturi koya tale kina o Jiova me lai bula i lomalagi. E cakava gona o Jisu na ka e sega ni cakava rawa o Atama, me vakarautaka na bula tawamudu vei ira na kawatamata talairawarawa. “Ena nona talaidredre gona e dua ga na tamata e okati kina e levu mera ivalavala ca, ia na nona talairawarawa e dua ga na tamata era na okati kina e levu mera yalododonu.” (Roma 5:19) Ena vuku ni isoro ni veivoli i Jisu ena vakayacora kina na Kalou na nona inaki, oya meda bula tawamudu e vuravura.

Eda vulica e levu na ka baleti Jiova ena ka e cakava ni talaidredre o Atama. Eda raica ni sega ni dua na ka e rawa ni tarova na ka e tekivuna o Jiova, ena “yaco dina” ga na nona vosa. (Aisea 55:11) Eda vakavinavinakataka na levu ni nona lomani keda. “E kilai na loloma ni Kalou ena ka e yacovi keda ni tala mai vuravura na Kalou na Luvena e duabau ga e vakatubura, meda vakabulai kina ena vukuna. Na loloma qo e sega ni vakatau ena noda lomana na Kalou, o koya ga e lomani keda qai tala mai na Luvena me isoro ni noda ivalavala ca meda veiyaloni kina kei koya.”—1 Joni 4:9, 10.

Na Kalou “e sega mada ga ni bureitaka na Luvena ia e soli koya ena vukuda kece,” eda vakadeitaka kina ni na “solia tale ga vei keda ena nona loloma levu na veika tale eso,” me vaka ga e yalataka. (Roma 8:32) Na cava e yalataka na Kalou ni na cakava? Wilika na kena isau ena ulutaga e tarava.

NA CAVA SA CAKAVA OTI NA KALOU? E buli keda o Jiova meda bula tawamudu e vuravura. E vakarautaka na iVolatabu meda vulica kina na veika me baleti koya. E vakarautaka o Jiova na isoro ena vuku i Jisu Karisito, e vakadeitaka kina ni na vakayacori dina ga na nona inaki

^ para. 16 Me ikuri ni vakamacala me baleta na ivoli, raica na wase 5 ni ivola Na Cava Eda na Vulica ena iVolatabu?, tabaka na iVakadinadina i Jiova. Sa tu tale ga ena internet ena www.jw.org.