Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

Ena Yaga Vakacava Nomu Kila na Kalou?

Ena Yaga Vakacava Nomu Kila na Kalou?

Ena veika eda sa vulica mai sa matata kina se o cei na Kalou. Vakamacalataki ena iVolatabu ni yacana o Jiova, e nona itovo talei na loloma. Eda sa dikeva tale ga na veika sa cakava oti kei na veika ena vakarau cakava ena vukuda. E se levu tale na ka meda vulica me baleti koya, de dua o na taleitaka mo kila na kena yaga.

E yalataka o Jiova “ke o qarai koya o na kunei koya.” (1 Veigauna 28:9) Vakasamataka mada na iloloma talei e vakarautaki tu ni o vakasaqara qai kila vinaka na Kalou, oya nomu “veitokani voleka kei Jiova!” (Same 25:14) Ena yaga vakacava vei iko na veitokani qori?

Marau dina. O Jiova na “Kalou mamarau.” (1 Timoci 1:11) Ni o volekati koya qai vakatotomuria na nona itovo, o na marau vakalevu, ena yaga ina ivakarau ni lomamu, nomu vakasama kei na nomu bula vakayago. (Same 33:12) O rawa tale ga ni marautaka na nomu bula ni o qarauna na itovo e veivakaleqai, muria na ivakarau ni bula o na bulabula kina, qai dei tale ga nomu veiwekani kei ira eso tale. O na duavata kei na veika e kaya na daunisame: “Vei au, e vinaka noqu toro voleka vua na Kalou.”—Same 73:28.

Kauaitaki keda yadudua. E yalataka vei ira nona dauveiqaravi o Jiova: “Au na vakasalataki iko niu raici iko tiko e mataqu.” (Same 32:8) Kena ibalebale qori ni dau kauaitaki ira yadudua nona dauveiqaravi o Jiova, qai dau vakarautaka na veika era gadreva. (Same 139:1, 2) Ni sa dei nomudrau veiwekani voleka, ena tokoni iko e veigauna.

Gauna uasivi se bera mai. E vukei iko na Kalou o Jiova ena gauna qo mo marautaka na bula e veivakacegui, e vakarautaka tale ga na inuinui totoka e se bera mai. (Aisea 48:17, 18) E kaya na iVolatabu: “Ena rawata na bula tawamudu, o koya e vulica tiko ga na veika me baleti kemuni na Kalou dina duadua ga, kei Jisu Karisito oni tala mai.” (Joni 17:3) Ena gauna dredre eda bula tu kina qo, na inuinui e vakarautaka na Kalou e vaka na ikelekele me vukei keda meda “dei qai kaukaua.”—Iperiu 6:19.

Qo e vica wale ga na vuna e bibi kina na nomu kila vinaka na Kalou mo drau rawa ni veivolekati kina. Oni sureti moni veitalanoa kei ira na iVakadinadina i Jiova, se rai ena jw.org moni raica kina eso tale na itukutuku yaga.