Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

1 Veivuke me Kua ni Yaco na Leqa

1 Veivuke me Kua ni Yaco na Leqa

E kaya na iVolatabu ni vakavuna na Kalou na kena ivakasala, qai “yaga me veivakavulici, me veivunauci, me veivakadodonutaki.” (2 Timoci 3:16) E vakadinadinataki qori ena nodra ivakaraitaki eso. A vukei ira na ivakasala ena iVolatabu mera muduka totolo eso na ivalavala e rawa ni vakaleqai ira.

GUNU SIVIA

E vakila o Delphine a cavuti ena imatai ni ulutaga ni vakavuna tiko nona gunu sivia na lomaocaoca. E sega ni vakatabuya na iVolatabu na vakayagataki vakalailai ni alakaolo. Ia e kaya: “Mo kua ni maliwai ira na gunu waini vakasivia.” (Vosa Vakaibalebale 23:20) Na gunu sivia sa vakavuna na nodra tauvimate bibi e levu, e vakacacana na veimaliwai kei na vakawati, era matedole tale ga kina e vica vata na milioni e veiyabaki. Ena sega ni yaco na leqa kece qori ke muri na ivakasala yaga ena iVolatabu.

A vakadinadinataka qori o Delphine. E kaya: “Au raica ni sega ni walia noqu leqa na alakaolo. Au muria na ivakasala ena Filipai 4:6, 7, e tukuni kina: ‘Kua ni lomaocaocataka e dua na ka, ia . . . me vakaraitaki vua na Kalou.’ Au dau vakamamasu vei Jiova e veibogi niu vakila ni tuburi au na nuiqawaqawa se niu veinanuyaka e levu na ka. Au talaucaka vua na lomaqu, na veika au cudruvaka, kei na veika e vakamosia na lomaqu se vakayalolailaitaki au. Au kerei Jiova me vukei au me donu tiko ga noqu rai. Au dau saga me sa veisau na noqu rai kei na ivakarau ni lomaqu niu yadra ena dua na mataka vou. Noqu masu wasoma vei Jiova e vukei au meu vakasamataka ga na veika au rawa ni cakava, meu kua ni lomaocaocataka na veika au sega ni rawata. Au vakatulewataka meu kua tale ni gunu alakaolo, baleta au sega ni vinakata e dua na ka me vakaleqa na vakacegu au sa kunea.”

 VEIYACOVI TAWADODONU

E dau vakavuna vakalevu na kavoro kei na rarawa na veiyacovi tawadodonu. Ia e veiuqeti na ivakavuvuli vakaivolatabu meda cata na ka e rawa ni vakavuna na veiyacovi tawadodonu, kena ivakaraitaki na wede kei na iyaloyalo vakasisila. E kaya e dua na cauravou o Samuel: “E rawarawa sara mo wedeva e dua. E sega ni dau vu ni noqu wede ena so na gauna niu taleitaka e dua na yalewa, au dau cakava ga ya keu raica ni taleitaki au.” E sega ni nakita o Samuel ena so na gauna me wede, eso tale na gauna sa nakita sara ga nona wede ni sa matau vua. Ia ni vakasamataka nona ivakarau, e kaya ena gauna qo o Samuel ni “sega ni vinaka” na wede “baleta e vakavotui kina na yalo ni nanumi koya ga.”

A wilika o Samuel e dua na ulutaga me baleti ira na itabagone ena website na jw.org. E vakavure vakasama vua na ka e tukuni ena Vosa Vakaibalebale 20:11: “E kilai na gone ena ka e cakava, e savasava se dodonu na nona ivalavala.” E vukei Samuel na tikinivolatabu qori me raica ni sega ni savasava qai sega ni dodonu na wede. E kaya ena gauna qo: “Au vulica tale ga ke dau wede e dua ni se itabagone, sa bucina tiko e dua na itovo e rawa ni vakaleqa nona bula vakawati ena dua na gauna e muri. Au vakasamataka sara keu sa mani vakawati, cava ena nanuma o watiqu ke raica niu wedeva e dua tale na yalewa. Qori e vakadeitaka vei au ni sega ni vinaka na wede. E rawarawa na wede, ia e sega ni dodonu.” A veisautaka nona ivakarau o Samuel. Na nona tagutuva na wede e taqomaki koya mai na veiyacovi tawadodonu.

E rawarawa sara nona coriti ena veiyacovi tawadodonu e dua tale na tagane o Antonio ni dau sara iyaloyalo vakasisila. Dua na ka nona lomani watina, ia e dau sikalutu vakalevu ena sara iyaloyalo vakasisila. E kaya ni vukei koya na nona vakasamataka na ka e kaya na 1 Pita 5:8: “Moni yalomatua, ni yadra tiko. E veilakoyaki voli na kemuni meca, na Tevoro, me vaka na laione e tagi, e vakasaqara tiko e dua me tiloma.” E kaya o Antonio: “E tu vakarawarawa na iyaloyalo vakasisila e veiyasa i vuravura, qai dau dredre me taqusi mai na noda vakasama na veika eda raica. E vakaraitaka vei au na tikinivolatabu ya se o cei e vakarautaka tiko na iyaloyalo vakasisila. Au raica ni bibi meu kua ni dau guilecava ni vakarautaka na Tevoro na iyaloyalo vakasisila. Au kila ni o Jiova ga ena vukei au meu ‘yadra tiko qai yalomatua,’ meu rawa ni cavuraka laivi na iyaloyalo vakasisila mai na noqu vakasama, lomaqu, kei na noqu vakawati.” A ciqoma o Antonio na veivuke me muduka na nona ivakarau ca, qai taqomaki koya qori mai na levu tale na leqa a rawa ni sotava.

Io, na ivakasala yaga ena iVolatabu e rawa ni taqomaki keda mai na leqa. Ia vakacava na leqa sa vakawakana tu vei keda qai dredre me wali? Meda raica mada na sala e rawa ni veivuke kina na Vosa ni Kalou ena ituvaki va qori.

Na ivakasala yaga ena iVolatabu e rawa ni itataqomaki mai na leqa