Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

Na iVolatabu kei na Gauna se Bera Mai

Na iVolatabu kei na Gauna se Bera Mai

RAITAYALOYALOTAKA mada ni o taubale tiko e gaunisala ena dua na bogi. Sa buto na vanua, ia o raica rawa nomu gaunisala ni tiko nomu cinalivaliva. Ni o cina sobu, o raica vinaka sara ga na ka e toka e matamu. Ni o cina i liu, dua na vanua yawa e yacova na nomu cinalivaliva ena kena ramase.

Na iVolatabu tale ga e vaka na cinalivaliva. Eda sa dikeva mai ena tolu na ulutaga sa oti ni na vukei keda na Vosa ni Kalou ena leqa eda sotava e veisiga ena vuravura veilecayaki qo. Ia dua tale na ka e yaga kina na iVolatabu. E vakararamataka noda rai me baleta na veigauna se bera mai, qai dusimaki keda ina sala ena rawati kina na marau kei na vakacegu tawamudu. (Same 119:105) Na sala cava e cakava kina qori na iVolatabu?

Meda raica mada e rua na sala e vukei keda kina na iVolatabu me baleta na inuinui ni gauna se bera mai: 1 E vukei keda na ka eda vulica kina me vakainaki noda bula, 2 e veidusimaki ena sala meda veitokani tawamudu kina kei na Dauveibuli.

1 VAKAINAKI NA BULA

Na ivakasala ena iVolatabu ena vukei keda meda walia noda leqa, ia e sega ni inaki ga qori e vakarautaki kina. E veiuqeti tale ga na iVolatabu me kua ni qiqo noda rai, meda kua ni kauaitaka ga na veika me baleti keda. Ena qai vakainaki kina noda bula.

Qo e dua na ivakaraitaki ni ivakavuvuli vakaivolatabu: “E marau vakalevu o koya e solia na ka, vakalailai o koya e taura na ka.” (Cakacaka 20:35) O se nanuma tiko na gauna o vukea kina e dua, se o vakarogoci nomu itokani ni talaucaka vei iko na lomana? De dua o vakila na lomavakacegu ni o vakamarautaki koya ena ka o cakava.

Eda na marau vakalevu ke da sega ni namaka me saumi lesu vei keda na ka eda solia. E kaya e dua na dauvolaivola: “Ke o namaka me saumi lesu na ka o solia, kua ni nanuma ni na levu cake mai na ka  o solia na ka e saumi lesu vei iko, vakavo ke o soli ka o qai sega ni namaka me saumi lesu vei iko.” Ia eda dau vakalougatataki nida soli ka, vakabibi vei ira era sega ni rawa ni sauma lesu. E rabailevu na yaga ni noda soli ka. Eda na veivolekati kina kei na Dauveibuli, qai okata o koya na noda soli ka me vaka eda soli ka vua. (Vosa Vakaibalebale 19:17) E talei vua na ka eda cakava vei ira na vakaloloma. E yalataka tale ga ni na vakalougatataki keda ena gauna se bera mai meda bula tawamudu e vuravura!—Same 37:29; Luke 14:12-14. *

E kaya na iVolatabu ni na vakainaki noda bula nida sokaloutaki Jiova na Kalou dina. E uqeti keda nona Vosa meda vakalagilagi koya, rokovi koya, qai talairawarawa vua. (Dauvunau 12:13; Vakatakila 4:11) Qori na sala vinaka duadua meda vakamarautaka kina na Dauveibuli. Io, e uqeti keda sara ga o koya: “Mo vuku . . . mo vakamarautaka na lomaqu.” (Vosa Vakaibalebale 27:11) Vakasamataka mada, na cava e marau kina na Tamada vakalomalagi nida yavutaka noda vakatulewa ena ivakavuvuli ena iVolatabu? Baleta ni kauaitaki keda, e vinakata tale ga me yaga vei keda nona veidusimaki. (Aisea 48:17, 18) Io, ena vakainaki noda bula nida sokaloutaki koya na Turaga Cecere ni lomalagi kei vuravura, da qai muria na ivakarau ni bula ena vakamarautaka na lomana.

2 VEITOKANI KEI NA DAUVEIBULI

E uqeti keda na iVolatabu meda veitokani kei na Dauveibuli ni kaya: “Toro voleka vua na Kalou ena qai toro voleka mai vei kemuni o koya.” (Jemesa 4:8) De dua eda na vakatitiqataka ni rawa meda veitokani kei na Dauveibuli kaukaua. Ia e vakadeitaka vei keda na iVolatabu ke da “vakasaqara na Kalou,” eda na “kunei koya” ni “sega ni yawa o koya vei keda yadua.” (Cakacaka 17:27) Ena yaga vakacava ena gauna se bera mai na ivakasala vakaivolatabu meda veitokani kei na Kalou?

Vakasamataka mada: Se mani vakacava noda sasaga, e sega nida drovaka rawa na iotioti ni meca o mate. (1 Korinica 15:26) Ia e tawamudu nona bula na Kalou. Ena sega vakadua ni mate, e vinakata tale ga mera bula tawamudu nona itokani. E totoka na ka e kaya na iVolatabu ni vinakata o Jiova mera marautaka o ira era vakasaqarai koya: “Mo marautaka mada ga na bula me tawamudu.”—Same 22:26.

E rawa vakacava ni o veitokani tawamudu kei na Kalou? Vulica tiko ga ena iVolatabu na veika me baleti koya. (Joni 17:3; 2 Timoci 3:16) Kerea nona veivuke ena kena vakamatatataki na veika o wilika ena iVolatabu. E vakadeitaka na iVolatabu ni na soli vei keda na vuku ke da “kerea tiko ga vua na Kalou” mai vu ni lomada. * (Jemesa 1:5) Saga mo bulataka na ka o vulica, me ‘cina ina yavamu’ qai “rarama ena [nomu] sala” na Vosa ni Kalou ena gauna qo me tawamudu.—Same 119:105.

^ para. 8 Me ikuri ni ivakamacala ni yalayala ni Kalou me baleta na bula tawamudu ena Parataisi, raica na wase 3 ni ivola Na Cava Eda na Vulica ena iVolatabu?, tabaka na iVakadinadina i Jiova.

^ para. 13 Ke o via kila e levu tale na ka ena iVolatabu, era rawa ni vakavulici iko wale na iVakadinadina i Jiova. Raica na icakacaka ni vuli ena vidio Na Cava e Caka ena Vuli iVolatabu?, ena website na www.jw.org. (Rai ena KA E VAKARAUTAKI VIDIO)

E tawamudu nona bula na Kalou, e vinakata tale ga mera bula tawamudu nona itokani