Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

Yaga Tawamudu na iVakavuvuli ena iVolatabu

Yaga Tawamudu na iVakavuvuli ena iVolatabu

RAITAYALOYALOTAKA MADA: O sarasara tiko ena dua na vale ni iyaya maroroi era tu kina e levu na iyaya makawa. E levu na iyaya era sa qaraqara tu, sa veisau na kedra irairai kei na rokadra ena vuku ni draki, era sa vuca, se sa yali eso na tikina. Ia e dua na iyaya e duatani sara, e sega ni bau veisau na kena irairai se yali e dua na tikina. O tarogi koya na dauveivakasarasarataki: “E ka vou na iyaya qo?” E sauma na dauveivakasarasarataki: “Sega, qori e iyaya makawa duadua, e se sega ni bau vakavoutaki.” O tukuna sara vua: “Kena ibalebale, dou sa maroroya dina vakavinaka.” E kaya na dauveivakasarasarataki: “Sega, na iyaya makawa qori e sa donuya mai eso na draki ca lelevu, era via vakacacana tale ga eso.” O veinanuyaka kina, ‘E buli mai na cava na iyaya qo?’

Na iVolatabu e via vaka sara ga na iyaya makawa qori. E ivola makawa ni vakatauvatani kei na levu tale na ivola. E tu eso tale na ivola makawa, ia sa tu vakaca na kena ituvaki me vaka ga e dua na iyaya sa vuca. Kena ivakaraitaki, na ivakamacala vakasaenisi ena ivola makawa va qori e duidui sara mai na kilaka vakasaenisi ena gauna qo. Eso na ivakasala vakavuniwai e ririkotaki qai sega ni yaga. E levu tale ga na ivola makawa e sa yali eso na tikina.

E duatani duadua na iVolatabu. A se tekivu volai sara ena 3,500 na yabaki sa oti, ia e se sega ni yali e dua na tikina. A vakamai se vakatabui na iVolatabu ena veisenitiuri sa sivi, ra qai nanuma e levu ni sa sega ni yaga. Levu na ka e sagai me caka ena iVolatabu, ia e duadua tu ga na iVolatabu. Ni vakatauvatani kei na kilaka sa tu nikua, e vakadinadina taki ni yaga sara na iVolatabu.​—Raica na kato “iVolatabu kei na Veika Vakasaenisi.”

IVAKAVUVULI YAGA ME MURI

Ke o dau vaqaqa ke se yaga tiko ga ena gauna qo na ivakavuvuli vakaivolatabu, vakasamataka mada: ‘Na leqa cava eda sotava tu nikua? Na leqa cava e vakavu kauai vakalevu?’ De dua o na vakasamataka na ivalu, benuci ni vuravura, basulawa, se na cakacaka vakailawaki. Dikeva mada e vica na ivakavuvuli vakaivolatabu qai vakasamataka ke na vinaka na ituvaki kei vuravura ni muri na ivakavuvuli qori.

VEIYALONI

“Era marau o ira na saga na veisaututaki, nira na vakatokai mera luve ni Kalou.” (Maciu 5:9) “Ke rawa, saga moni veiyaloni kei ira na tamata kece.”​—Roma 12:18.

YALOLOLOMA, VEIVOSOTI

“Era marau na dauloloma, nira na lomani.” (Maciu 5:7) “Moni dau yalorawarawa, ni dau veivosoti tale ga vakarawarawa ke dua e didivaka e dua na ka vua e dua tale. Moni dau veivosoti me vaka ga na nona vosoti kemuni vakarawarawa o Jiova. *”​—Kolosa 3:​13.

DUAVATA

Na Kalou e “bulia na matatamata kece mai na dua ga na tamata, mera tawana na yasa i vuravura kece.” (Cakacaka 17:26) “Ni sega ni dau veivakaduiduitaki na Kalou, ia e vakadonui ira era dokai koya ra qai cakava na ka e vinakata mai na veivanua kece.”​—Cakacaka 10:​34, 35.

RAI ME BALETA NA VURAVURA

“E kauta na tagane na Kalou o Jiova qai biuti koya ena were o Iteni, me teivaka me qarava tale ga.” (Vakatekivu 2:​15) Na Kalou ena “vakawabokotaki ira . . . na vakarusai vuravura tiko.”​—Vakatakila 11:18.

KOCOKOCO, VEIYACOVI TAWADODONU

“Ni qarauni kemuni mai na ivakarau ni yalokocokoco kece, ke levu mada ga na ka e tu vua e dua, ena sega ni vakatau na nona bula ena veika e taukena.” (Luke 12:15) “Me vaka ni oni dauveiqaravi ni Kalou, me kua mada ga ni cavuti ena kemuni maliwa na veiyacovi tawadodonu, na ka dukadukali kece se kocokoco.”​—Efeso 5:3.

DAUDINA, CAKACAKA VAKAUKAUA

“Keitou vinakata me keitou dina ena ka kece.” (Iperiu 13:18) “Me muduka nona butako o koya e butako tiko, me cakacaka ga vakaukaua.”​—Efeso 4:​28.

VEIVAKACEGUI

“Vosa vakayalovinaka vei ira na yalolailai, vukei ira na malumalumu, vosoti ira na tamata kece.” (1 Cesalonaika 5:​14) “Meda qaravi ira na luveniyali kei ira na yada era rarawa tu.”​—Jemesa 1:​27.

E tiko na inaki ni kena volai ena iVolatabu na ivakavuvuli kece qori. Ke da muria, eda na vakila na kena yaga, eda na sega tale ga ni sotava e levu na leqa nikua. Kena ibalebale e yaga tawamudu na ivakavuvuli ena iVolatabu! Ena yaga vakacava vei iko ena gauna qo na ivakavuvuli vakaivolatabu?

KENA YAGA ENA GAUNA QO

E kaya o koya e uasivi ena vuku: “Ena kilai na vuku ena ka e cakava.” (Maciu 11:19) Vakacava o vakabauta ni na laurai na vuku ke o bulataka na ka o vulica? O na rairai veinanuyaka, ‘Au na vakila vakacava na yaga ni ka e volai ena iVolatabu? Ena vukei au vakacava ena leqa au dau sotava?’ Dikeva mada e dua na kena ivakaraitaki.

A dau marautaka voli o Delphine * nona bula. Ia sega ni dede sa sotava veitaravi na leqa. E mate na luvena goneyalewa, kavoro nona bula vakawati, qai sotava na leqa vakailavo. E nanuma lesu: “E veilecayaki sara ga na noqu bula ni mate o luvequ, biuti au o watiqu qai sega na vanua meu tiko kina. Sa sega ni vakainaki noqu bula.”

E vakadinadinataka o Delphine na vosa qo: “Na balavu ni neimami bula e 70 na yabaki, se 80 ke kaukaua sara e dua. Ia era vakasinaiti ena leqa kei na rarawa, e totolo ga na kena tasiri, keimami qai vuka yani.”​—Same 90:10.

E rai ena iVolatabu o Delphine me vukei koya ena gauna dredre e donuya. E vakasakiti na ka e vakila kina. Eda na raica ena tolu na ulutaga e tarava na sala e vukei ira kina eso nodra muria na ivakavuvuli vakaivolatabu. Era vakabauta ni vaka sara ga na iyaya makawa e cavuti ena itekitekivu ni ulutaga qo na iVolatabu. E duatani sara na iVolatabu ni vakatauvatani kei na ivola makawa tale eso sa sega na kedra yaga. Na cava e duatani duadua kina na iVolatabu? Baleta ni volai kina na rai ni Kalou, sega ni nanuma ni tamata.​—1 Cesalonaika 2:​13.

O na rairai vakadinata ni lekaleka wale na bula, qai salavata mai kei na levu na leqa. Ni basika na leqa, o dau qara i vei na veivuke o vinakata, na vakacegu, kei na ivakasala nuitaki?

Raica mada qo e tolu na sala ena rawa ni veivuke kina na iVolatabu ena nomu bula. Ena dusimaki iko mo

  1. kua ni cakava na ka o rawa ni sotava kina na leqa.

  2. walia na leqa ke mani basika.

  3. vosota na ituvaki dredre o sega ni drovaka rawa.

Ena vakamacalataki qori ena tolu na ulutaga e tarava.

^ para. 10 E tukuni ena iVolatabu ni yaca ni Kalou o Jiova.​—Same 83:18.

^ para. 24 Sa veisau eso na yaca ena ulutaga qo, kei na tolu na ulutaga e tarava.