Raica sara na lewena

Raica na lewenivola

O Bau Kila?

O Bau Kila?

Era caka vakacava na ivolavivigi ena gauna vakaivolatabu, ra qai vakayagataki vakacava?

iVola vakaivolatabu i Esiteri e volai ena ivolavivigi ni kulinimanumanu, mai na ika18 ni senitiuri G.V.

E tukuni ena Kosipeli i Luke ni a cereka na ivolavivigi i Aisea o Jisu, e wilika, oti qai viviga tale. Ena itinitini ni nona Kosipeli o Joni, e cavuta tale ga na ivolavivigi ena nona vakamacalataka ni sega ni okata rawa kece kina na cakamana i Jisu.—Luke 4:16-20; Joni 20:30; 21:25.

Era caka mada vakacava na ivolavivigi? Era vakabiri vata ena drega na tikitiki ni kulinimanumanu leca me rawa nira vivigi. Ena qai viviraki tale ena dua na kau me tiko i loma na vanua e caka kina na volavola. E leleka qai tuvai sobu na ka e volai. Ke balavu na kulinimanumanu se kuta ena vakaitautauri na muana ruarua, me rawarawa kina nona cereka na tikina me wilika o koya e dau wiliwili, oti me viviga tale.

E kaya na Anchor Bible Dictionary ni “yaga na ivolavivigi ni rawa ni balavu sara [levu na gauna e rauta ni 10 na mita] rawa tale ga ni biu kece kina na veika e volai tu ena dua na ivola levu.” Kena ivakaraitaki, e tukuni ni Kosipeli i Luke e rawa ni 9.5 na mita na balavu ni kena ivolavivigi. Ena so na gauna, e dau koti vakamatau na tutu ni ivolavivigi kece, e masiraki ena vatu varovaroa, qai rokataki.

O cei o ira na “iliuliu ni bete” era tukuni ena iVolatabu vaKirisi vaKarisito?

Mai na gauna e tauyavutaki kina na veiliutaki vakabete e Isireli, dau dua ga e vakaitavi tiko vakabete levu ena loma ni dua na gauna, ena balavu tale ga nona qarava tiko na ilesilesi qori. (Tiko Voli Mai na Lekutu 35:25) O Eroni e imatai me lesi kina. Kena ivakarau me dau sosomitaki ira ga na luvedra tagane ulumatua. (Lako Yani 29:9) Levu gona na kawa i Eroni tagane era bete, e vica ga era bete levu.

Nira mai veiliutaki e Isireli eso tale na matanitu, era lewa tu ga na gauna me vakacegui se digitaki kina e dua na bete levu e Jiu. Ia e laurai ni o ira na lesi vou era digitaki mai na vuvale kilai se rogo, levu ga na gauna era kawa i Eroni. Na icavuti gona “iliuliu ni bete” e vakaibalebaletaki sara tiko ga vei ira na veiliutaki ena veiqaravi vakabete. Na iliuliu ni bete era rawa ni okati kina o ira na iliuliu ni 24 na iwasewase era veiqaravi tiko vakabete, ira na lewe ni vuvale rogo era cavutu mai na vuvale era bete, se o ira na veiqaravi tu vakabete levu ia sa ra vakacegui, me vakataki Anasa.​—1 Veigauna 24:1-19; Maciu 2:4; Marika 8:31; Cakacaka 4:6.