Raica sara na lewena

Raica na lewenivola

Sala Mo Vakamatauni Iko Kina ena iVavakoso Vou

Sala Mo Vakamatauni Iko Kina ena iVavakoso Vou

O SA bau toki ena dua na ivavakoso vou? Ke vaka kina, o na rairai duavata kei na ka e tukuna o Jean-Charles: “E sega ni rawarawa meda toki ena dua na ivavakoso vou, ena gauna vata ya meda vakadeitaka ni dei tiko na nodra vakabauta na lewe ni noda vuvale.” De dua ena vinakati tale ga vei ira na toki mera vaqara cakacaka, vaqara vale, se koronivuli. Kena ikuri, e vinakati mera vakamatauni ira ena duidui draki, duidui itovo vakavanua, kei na yalava vou ni cakacaka vakavunau.

E duatani toka na ka e sotava o Nicolas kei Céline. Rau vakadonuya e dua na ilesilesi mai na valenivolavola ni tabana e Varanise me rau toki ina dua na ivavakoso vou. Erau kaya: “Keirau a marautaka vakalevu na ilesilesi qori, ia ni oti ga vakalailai keirau sa nanumi ira tale na neirau itokani. Keirau se bera ni veivolekati sara kei ira na mataveitacini ena neirau ivavakoso vou.” a Ni sega ni rawarawa na toki, cava mo cakava mo marau kina qai vuavuaivinaka ena nomu veiqaravi ena ivavakoso vou? Rawa nira veivuke vakacava eso tale? Sala cava o na uqeti kina kei na sala cava o na vakayaloqaqataki ira kina ena nomu ivavakoso vou?

E VA NA KA O RAWA NI CAKAVA

Vakararavi vei Jiova

1. Mo vakararavi vei Jiova. (Same 37:⁠5) O Kazumi mai Japani, e biuta na ivavakoso e lewena tu me 20 na yabaki ni sa dua na cakacaka vou nei watina. E “tataunaka” vakacava “na [nona] sala vei Jiova”? E kaya: “Au talaucaka vakavica vei Jiova na noqu taqaya, noqu galili, kei na nuiqawaqawa. Na gauna kece au cakava kina qori, e vakaukauataki au o koya.”

Sala cava o na nuitaki Jiova kina vakalevu? Me vaka ga na kau e domica na wai kei na kakana mai na qele me rawa ni tubu kina, e vinakati tale ga me vakani vakayalo na noda vakabauta me rawa ni tubu tiko ga. Ni vakasamataka vakatitobu o ­Nicolas, sa tukuni oti mai, na nodratou ivakaraitaki ni vakuai ratou ena levu na ka o Eparama, Jisu, kei Paula me ratou cakava na loma ni Kalou, e nuidei sara ga ni na vukei koya o Jiova. Ni wasoma na nomu ituvatuva ni vuli vakataki iko, ena yaga qori mo vosota kina na ituvaki dredre ena nomu bula, o na vulica tale ga eso na ka vakayalo mo veivakayaloqaqataki kina ena nomu ivavakoso vou.

Kua ni vakatauvatana na nomu ivavakoso

2. Kua ni vakatauvatana nomu ivavakoso. (Dauv. 7:10) E vinakati me vakamatauni koya o Jules ena duidui itovo vakavanua ni biuti Benin me gole i Merika. E kaya: “E vaka meu tukuna na ka kece baleti au vei ira au se qai sotava vakadua.” Ni duidui sara qori mai na ka e matau kina, sa tekivu sega ni veimaliwai kei ira na mataveitacini ena ivavakoso. Ia ni kilai ira vinaka na mataveitacini, e veisau sara ga nona rai. E kaya: “Au sa qai kila nida tautauvata kece se vanua cava e vuravura eda tiko kina. E duidui ga na ivakarau ni nodra vosa. E bibi meda ciqomi ira.” Qarauna gona mo kua ni vakatauvatani ira kei na nomu ivavakoso makawa. Me vaka e tukuna e dua na ­tacida painia o Anne-Lise: “Au toki meu vulica eso na ka vou. Au sega ni toki meu raica tale na ka au sa biuta mai.”

E bibi tale ga vei ira na qase ni ivavakoso mera kua ni vakatauvatana na nodra ivavakoso vou kei na ivavakoso makawa. E sega ni ca ni duidui vakalailai na ka e caka ena ivavakoso vou. E ka vakayalomatua mo kila na ka e caka ena ivavakoso ni bera ni o vakatututaka eso na ka. (Dauv. 3:1, 7b) E bibi mera vuli na mataveitacini ena nomu ivakaraitaki vinaka, sega ni o usuraka na nomu rai ena ivavakoso.—2 Kor. 1:24.

Vakaogai iko ena nomu ivavakoso

3. Vakaogai iko ena nomu ivavakoso vou. (Fpai. 1:27) Na tokitoki e vinakati kina vakalevu na gauna kei na kaukaua, ia e bibi mo tiko sara ga ena soqoni ena gauna totolo duadua ke rawa. Ke ra sega ni dau raici iko na mataveitacini ena nomu ivavakoso vou, se ra raici iko vakavudua, ena rawa vakacava nira vukei iko? E nanuma lesu o Lucinda, a toki kei rau na luvena yalewa ena dua na koro levu e Sauca Aferika: “Au vakasalataki meu sasaga meu veivolekati kei ira na tacida ena ivavakoso vou, cakacaka vakavunau vata kei ira, meu saumitaro tale ga. Keitou solia tale ga na neitou vale me dau caka kina na sota ni cakacaka vakavunau.”

Ni o “cuqena” se ogataka na veika vakayalo kei ira na mataveitacini ena nomu ivavakoso vou, e sala vinaka mo tokona kina “na vakabauta e yavutaki ena itukutuku ­vinaka.” Kena ivakaraitaki, era uqeti Anne-Lise, sa tukuni oti mai, na nona qase ni ivavakoso me saga me vunau kei ira kece ena ivavakoso. Na kena yaga? E kaya: “E totolo ga noqu liaca ni qori na sala vinaka duadua meu veikilai kina kei ira ena ivavakoso.” Kena ­ikuri, nomu bole ena so na itavi me vaka na sasamaki kei na vakavinakataki ni Vale ni Soqoni ena vakaraitaka ni o sa okata qori me nomu ivavakoso. Na levu ga ni nomu vakaogai iko, era na ciqomi iko ­totolo na mataveitacini, o na vakila tale ga nira nomu vuvale vou vakayalo.

Me so nomu itokani vou

4. Me so nomu itokani vou. (2 Kor. 6:11-13) Nomu dau veikauaitaki e sala ­vinaka duadua mo veitokani kina. E bibi gona mo yaco totolo yani ni bera ni tekivu na soqoni, mo tiko tale ­vakalekaleka ni sa oti mo rawa ni veivosaki kei ira, mo kilai ira ­vinaka tale ga. Saga mo kila na yacadra. Ni o nanuma na yacadra na mataveitacini, o kauaitaki ira qai torovi rawarawa, era na vinakata mera kilai iko, o na rawa tale ga ni nodra itokani dredre.

Vakaliuliu mera kilai iko na mataveitacini, kua ni leqataka nodra ciqomi iko se sega. Mo cakava na ka e tukuna o Lucinda: “Sa levu na neitou itokani dredre ena gauna qo baleta ni keitou vakaliuliu me keitou veisureti i vale.”

“DAU VEICIQOMI”

Ena rairai dredre vei ira eso mera curu ena Vale ni Soqoni era tu kina e levu era sega ni veikilai. Na cava mo cakava me rawarawa kina vei ira na ka vou? E kaya na yapositolo o Paula: “Moni dau veiciqomi me vaka ga nona ciqomi keda o Karisito.” (Roma 15:7) Nira vakatotomuri Karisito na qase ni ivavakoso, ena rawa nira vukei ira na ka vou mera kila nira kauaitaki. (Raica na kato “Ka me Caka ni o Toki.”) Ia e noda itavi kece na lewe ni ivavakoso, wili kina o ira na gone me so na noda itokani.

Noda veiciqomi e okati kina noda veisureti i vale, vaka tale ga kina noda veivuke. Kena ivakaraitaki, e vakayagataka e dua na tacida yalewa na nona gauna me vakasarasarataka e dua tale na tacida yalewa e toki vou yani e tauni, e vakamacalataka tale ga na sala me vodo kina ena basi kei na sitimanivanua. Qori e uqeta sara ga na tacida yalewa ya me vakamatauni koya ena vanua vou qori.

RAWA NI O TOSO KINA VAKAYALO

Ni tubu tiko na vodre, ena veisautaka vakavica na kulina me qai rawa ni vuka. Ni o toki tale ga ena dua na ivavakoso vou, e vinakati mo biuta tani eso na ka o lomaleqataka ena vakaleqa nomu ‘vuka’ vakayalo ena nomu qaravi Jiova. E kaya o Nicolas kei ­Céline: “E dua na ka ni vuli vinaka na toki. Me rawa nida vakamatauni keda ena vanua vou kei ira na lewena, e vinakati meda vakaraitaka eso na itovo vou.” E kaya o Jean-Charles, sa tukuni oti mai, na kena yaga vei ratou vakavuvale: “Ena neitou ivavakoso vou, rau toso vakayalo na gone, rau veivolekati tale ga kei Jiova. Oti ga e vica na vula, sa vakaitavi o luvei keirau yalewa ena soqoni ena lomanimacawa, o luvei keirau tagane e sa dautukutuku bera ni papitaiso.”

Na cava mo cakava ke o sega ni rawa ni toki ena vanua e vinakati kina vakalevu na veivuke ena vuku ni kemu ituvaki? O rawa sara ga ni muria eso na vakatutu sa tukuni oti mai ena nomu ivavakoso makawa. Ni o vakararavi vei Jiova, mo vakaogai iko ena itavi ena ivavakoso ni o tuvanaka mo veitomani kei na so tale ena cakacaka vunau, saga me so nomu itokani vou, se vaqaqacotaka nomu veitokani sa tiko rawa. O rawa sara ga ni vakaliuliu mo vukei ira na ka vou kei ira na leqa tu ena veika era gadreva vakayago. Nira kilai tani na lotu vaKarisito dina ena nodra veilomani, nomu vukea eso tale o na rawa ni veivolekati kina kei Jiova. (Joni 13:35) Mo nuidei ni “taleitaka na Kalou na isoro va qori.”​—Iper. 13:16.

E sega ni rawarawa na toki, ia e levu na lotu vaKarisito era marautaka nodra toki ena dua tale na ivavakoso vou, o rawa tale ga ni marautaka! E kaya o Anne-Lise: “E yaga ni veisau na noqu ivavakoso niu vulica kina meu dau lomasavu.” E vakadeitaka o Kazumi ni nona toki e “vakadinadinataka kina na veitokoni i Jiova e se bera vakadua ni vakila.” Ia vakacava o Jules? E kaya: “Sa levu sara na noqu itokani, au sa sega ni galili tale tiko. Au sa veivolekati kei ira ena noqu ivavakoso vou, sa na dredre me keimami veibiu.”

a Na ivakasala me baleta ”Na iWali ni Vakanananu i Vale nida Qarava na Kalou,” raica na ulutaga ena Vale ni Vakatawa ni Me 15, 1994.