Raica sara na lewena

Raica na lewenivola

 ULUTAGA NI VULI 17

“Au sa Kacivi Kemudou Mo Dou Noqu iTokani”

“Au sa Kacivi Kemudou Mo Dou Noqu iTokani”

“Au sa kacivi kemudou mo dou noqu itokani, baleta na ka kece au rogoca vei Tamaqu au vakatakila vei kemudou.”—JONI 15:15.

SERE 13 Karisito na Noda iVakaraitaki

KA ENA VULICI *

1. Na cava mo cakava mo veitokani vinaka kina kei na dua?

NA CAVA mo cakava mo veitokani vinaka kina kei na dua? Na imatai ni ka mo cakava ya mo drau veimaliwai. Ni drau veivosakitaka nomudrau rai kei na lomamudrau, drau sa na veitokani. Ia ena sega ni rawarawa meda veitokani vinaka kei Jisu. Na vuna?

2. Na cava na imatai ni vuna e sega ni rawarawa kina meda veitokani kei Jisu?

2 Na imatai ni vuna e sega ni rawarawa kina meda veitokani kei Jisu, oya nida sega ni sotavi koya. Levu tale ga na lotu vaKarisito ena imatai ni senitiuri era sega ni sotavi koya. Ia e kaya na yapositolo o Pita: “Oni se sega ni raici koya, ia oni lomani koya. Oni se sega ni raici koya ena gauna qo, ia oni vakaraitaka ni oni vakabauti koya.” (1 Pita 1:8) Kena ibalebale ni rawa meda veitokani voleka kei Jisu nida sega mada ga ni sotavi koya.

3. Na cava na ikarua ni vuna e sega ni rawarawa kina meda veitokani kei Jisu?

3 Na ikarua ni vuna e sega ni rawarawa kina meda veitokani kei Jisu, oya nida sega ni vosa rawa vua. Nida masu, eda vosa vakadodonu vei Jiova. E macala ga nida masu ena yaca i Jisu, ia eda sega ni vosa vakadodonu vua. E sega ni vinakata o Jisu meda masu vua. Na vuna? Ni bibi  ena noda sokalou na masu, eda na sokalou duadua ga vei Jiova. (Maciu 4:10) Ia se rawa tiko ga nida vakaraitaka noda lomani Jisu.

4. Na cava na ikatolu ni vuna e sega ni rawarawa kina meda veitokani kei Jisu? Cava eda na veivosakitaka ena ulutaga qo?

4 Na ikatolu ni vuna e sega ni rawarawa kina meda veitokani kei Jisu, oya ni sa tiko mai lomalagi, ena sega gona ni rawa nida veimaliwai. Ia eda rawa ni kila e levu na ka me baleti Jisu nida sega mada ga ni raici koya. Eda na dikeva e va na ka meda cakava meda vaqaqacotaka kina noda veitokani kei koya. Eda na veivosakitaka e liu na vuna e bibi kina meda veitokani voleka kei Karisito.

CAVA E BIBI KINA MEDA VEITOKANI KEI JISU?

5. Na cava meda veitokani kina kei Jisu? (Raica tale ga na kato “ Eda na Veitokani kei Jiova Nida Veitokani kei Jisu” kei na “ Me Donu Noda Rai me Baleti Jisu.”)

5 E bibi meda veitokani kei Jisu ke da vinakata meda veitokani voleka kei Jiova. Dikeva mada e rua na vuna. Kena imatai, e tukuna o Jisu vei ratou nona tisaipeli: “Ni lomani kemudou o Tamaqu ena vuku ni nomudou lomani au.” (Joni 16:27) E tukuna tale ga: “Ena vukuqu ga ena qai torovi Tamaqu rawa kina e dua.” (Joni 14:6) Nida saga meda veitokani kei Jiova ia eda sega ni veitokani vinaka kei Jisu, e vaka ga nida via curu ena dua na vale nida sega ni vakayagataka na katuba. E cavuta o Jisu e dua na vosa vakatautauvata va qori me vakamacalataka ni o koya na “katuba ni sipi.” (Joni 10:7) Na kena ikarua, oya ni vakatotomuria vinaka o Jisu na itovo i Tamana. E tukuna vei ratou na nona tisaipeli:  “O koya sa raici au sa raici Tamaqu tale ga.” (Joni 14:9) Dua na sala bibi eda na kilai Jiova vinaka kina oya nida vulica na bula i Jisu. Na levu ga ni ka eda vulica me baleti Jisu, eda na lomani koya vakalevu. Na levu tale ga ni noda lomani Jisu, eda na lomani Jiova vakalevu.

6. Na cava e dua tale na vuna meda veitokani kina kei Jisu? Vakamacalataka.

6 E bibi meda veitokani kei Jisu me qai rogoci na noda masu. Kena ibalebale ni tiko eso tale na ka meda cakava, meda kua ni cavuta wale ga ena noda masu na matavosa ‘ena yaca i Jisu.’ Meda kila tiko na sala e vakayagataki Jisu kina o Jiova me rogoca na noda masu. E kaya o Jisu vei ratou na nona yapositolo: “Na ka kece . . . dou kerea ena yacaqu, au na cakava.” (Joni 14:13) O Jiova ga ena rogoca na noda masu, ena sauma tale ga. Ia e solia vei Jisu na lewa me vakayacora na loma i Tamana. (Maciu 28:18) Ni bera gona ni sauma na Kalou na noda masu, ena vakadeitaka mada ke da sa muria tiko na ivakasala i Jisu. Kena ivakaraitaki, e kaya o Jisu: “Ke dou vosoti ira era cala vei kemudou, ena vosoti kemudou na Tamamudou vakalomalagi, ia ke dou sega ni vosoti ira era cala vei kemudou, ena sega tale ga ni vosoti kemudou na Tamamudou.” (Maciu 6:14, 15) E bibi gona meda dau caka vinaka vei ira na tacida, me vaka ga erau cakava vei keda o Jiova kei Jisu!

7. Ena yaga vei cei na isoro ni veivoli i Jisu?

7 O koya e veitokani voleka kei Jisu ena yaga vua na nona isoro ni veivoli. Eda kila vakacava? E kaya o Jisu ni na “solia nona bula ena vukudra na nona itokani.” (Joni 15:13) O ira na qaravi Jiova ena yalodina ni bera ni bula e vuravura o Jisu e vinakati mera vulica na veika me baleti koya, mera lomani koya tale ga. Kena ivakaraitaki, era na vakaturi na tagane kei na yalewa me vakataki Eparama, Sera, Mosese, kei Reapi. Ena vinakati tale ga mera veivolekati kei Jisu me rawa nira na bula tawamudu.—Joni 17:3; Caka. 24:15; Iper. 11:8-12, 24-26, 31.

8-9. Na cava eda na marautaka ke da veitokani kei Jisu? Cava e bibi kina qori me vaka e cavuti ena Joni 15:4, 5?

8 Eda marau meda cakacaka vata kei Jisu ena vunautaki ni itukutuku vinaka ni Matanitu ni Kalou kei na veivakavulici. E qasenivuli o Jisu ena gauna e tiko kina e vuravura. Me vaka ni ulu ni ivavakoso, e dusimaka tiko ga na vunautaki ni itukutuku vinaka kei na veivakavulici ni sa lesu i lomalagi. E kila gona o Jisu na nomu sasaga, e mareqeta tale ga nomu vukea e levu mera kilai koya kei Tamana. Io, eda na vakayacora vinaka ga na cakacaka qo ena veivuke i Jiova kei Jisu.—Wilika Joni 15:4, 5.

9 E vakamatatataka na Vosa ni Kalou ni vinakati meda lomani Jisu tiko ga me rawa nida vakamarautaki Jiova. Meda veivosakitaka mada e va na ka meda cakava meda veitokani kina kei Jisu.

SALA MO VEITOKANI KINA KEI JISU

O na veitokani kei Jisu ni o (1) saga mo kilai koya vinaka, (2) vakatotomuria nona rai kei na ka e cakava, (3) tokoni ira na taci Karisito, (4) tokona tale ga na ituvatuva ni ivavakoso (Raica na parakaravu 10-14) *

10. Na cava na imatai ni ka meda cakava meda veitokani kina kei Jisu?

10 (1) Saga mo kilai Jisu vinaka. Eda na cakava qori nida wilika na ivola i Maciu, Marika, Luke, kei Joni. Nida vakasamataka vakatitobu na itukutuku me baleti Jisu ena iVolatabu, eda na lomani koya, eda na dokai koya tale ga ni dau caka vinaka vei ira ena gauna ya. Kena ivakaraitaki, eratou vakatokai koya na nona tisaipeli me nodratou Turaga, ia e sega vakadua ni nanuma ni ratou bobula.  E tukuna mada ga vei ratou na nona rai kei na lomana. (Joni 15:15) Ni ratou rarawa, e tagi vata kei ratou. (Joni 11:32-36) Era vakadinata mada ga na kena meca nira nona itokani o ira na vakabauta na nona itukutuku. (Maciu 11:19) Nida vakatotomuri Jisu ena ka e cakava vei ratou na nona tisaipeli, ena vinaka na noda veimaliwai, eda na lomavakacegu, marau, eda na lomani Karisito tale ga vakalevu.

11. Na cava na ikarua ni ka meda cakava meda veitokani kina kei Jisu? Cava e bibi kina?

11 (2) Vakatotomuria na rai nei Jisu kei na ka e cakava. Nida kilai Jisu vinaka qai vakatotomuria na nona rai, eda na veitokani vinaka kei koya. (1 Kor. 2:16) Eda na vakatotomuri Jisu vakacava? Vakasamataka mada e dua na ivakaraitaki qo. E bibi vei Jisu na nona vukea eso tale, e sega ni nanumi koya ga. (Maciu 20:28; Roma 15:1-3) Ni va qori na nona rai, e vakuai koya kina, e dau veivosoti tale ga. E sega ni totolo nona cudruvaka na ka era tukuna eso me baleti koya. (Joni 1:46, 47) E sega ni raicalataki ira tiko ga eso tale ena vuku ni nodra cala makawa. (1 Tim. 1:12-14) E kaya o Jisu: “Era na kila kece kina ni dou noqu tisaipeli, ke dou veilomani.” (Joni 13:35) E vinaka gona mo taroga, “Au sa muria tiko na ivakaraitaki i Jisu niu saga ena noqu vinaka meu veiyaloni tiko ga kei ira na taciqu?”

12. Na cava na ikatolu ni ka meda cakava meda veitokani kina kei Jisu? Ena sala cava?

12 (3) Tokoni ira na taci Karisito. E okata o Jisu na ka eda cakava vei ira na tacina lumuti me vaka sara ga eda cakava tiko vua. (Maciu 25:34-40) Na itavi bibi cava eda tokoni ira kina na lumuti? Oya nida vakaitavi vakalevu ena vunau kei na veivakatisaipelitaki e vakarota o Jisu. (Maciu 28:19, 20; Caka. 10:42) Ena vuku ga ni nodra veitokoni na ‘so tale na sipi’ era na vakayacora vinaka kina na taci Karisito na cakacaka vakavunau e vuravura raraba. (Joni 10:16) Ke o lewe ni so tale na sipi, na gauna kece o vakaitavi kina ena cakacaka qo, o sa vakaraitaka tiko ni o lomani ira na lumuti kei Jisu.

13. Eda na muria vakacava na ivakasala i Jisu ena Luke 16:9?

13 Eda na veitokani tale ga kei rau o Jiova kei Jisu nida cau vakailavo meda tokona na cakacaka erau dusimaka tiko. (Wilika Luke 16:9.) Kena ivakaraitaki, nida cau me baleta na cakacaka e vuravura raraba, ena vakailavotaki kina na vunautaki ni itukutuku vinaka ena veivanua yawa, na tara kei na vakavinakataki ni vale e tokoni kina na sokalou dina, era vukei tale ga na tacida era vakaleqai ena leqa tubukoso. Eda na tokona tale ga vakailavo na noda ivavakoso qai vukei ira eda kila nira leqa tu. (Vkai. 19:17) Qori eso na sala eda tokoni ira kina na taci Karisito.

14. Me vaka e cavuti ena Efeso 4:15, 16, na cava na ikava ni ka meda cakava meda veitokani kina kei Jisu?

14 (4) Tokona na ituvatuva ni ivavakoso vaKarisito. Eda vaqaqacotaka na noda veitokani kei Jisu na ulu ni ivavakoso nida tokoni ira na lesi mera karoni keda. (Wilika Efeso 4:15, 16.) Kena ivakaraitaki, e sagai me vakayagataki vinaka na Vale ni Soqoni kece. Oya na vuna era cokovata kina e vica na ivavakoso, e veisau tale ga na mape. Na ituvatuva qo e bula kina e levu na ilavo e  cautaki ina isoqosoqo. Ia eso na dautukutuku e vinakati mera vakamatauni ira ena veisau qo. De dua sa vakayabaki nodra veiqaravi tu ena so na ivavakoso, era veitokani vinaka tale ga kei ira na mataveitacini. Ia qo era kerei mera veiqaravi ena dua tale na ivavakoso. Ena marau vakalevu o Jisu ni raica na nodra tokona na tacida yalodina qori na ituvatuva qo!

VEITOKANI KEI JISU ME TAWAMUDU

15. Ena dei vakacava na noda veitokani kei Jisu ena gauna se bera mai?

15 E nodra inuinui na lumuti mera na tiko kei Jisu me tawamudu, oya mera veiliutaki kei koya ena Matanitu ni Kalou. Kena ibalebale nira na raici koya, vosa vua, era na veimaliwai tale ga. (Joni 14:2, 3) Vakacava o ira na nuitaka na bula e vuravura? Era na vakila tale ga na loloma kei na veikauaitaki i Jisu. Era na sega ni raici koya, ia sa na qai dei ga na nodra veitokani nira marautaka na bula e vakarautaka vei ira o Jiova kei Jisu.—Aisea 9:6, 7.

16. Eda vakalougatataki vakacava nida veitokani kei Jisu?

16 Nida ciqoma na veisureti i Jisu meda nona itokani, eda na vakalougatataki vakalevu. Kena ivakaraitaki, eda vakadinadinataka ena gauna qo na nona loloma kei na veitokoni. Eda nuitaka tale ga na bula tawamudu. Koya e bibi sara, eda na marautaka na iyau mareqeti duadua, oya meda veitokani vinaka kei Jiova, na tamai Jisu. Eda kalougata dina nida vakatokai meda itokani i Jisu!

SERE 17 “Au Vinakata”

^ para. 5 E vica na yabaki nodratou cakacaka vata kei Jisu na yapositolo, ratou dau veitalanoa, eratou veitokani vinaka sara. E vinakata tale ga o Jisu meda nona itokani, ia e sega ni rawarawa meda veitokani kei koya me vakataki ratou na yapositolo. Ena veivosakitaki ena ulutaga qo eso na ka e vakadredretaka noda veitokani kei Jisu, kei na vica na vakatutu meda muria meda veitokani tiko ga kina kei Jisu.

^ para. 55 IVAKAMACALA NI IYALOYALO: (1) Ena sokalou vakavuvale, eda rawa ni vulica na bula i Jisu kei na nona cakacaka vakaitalatala. (2) Ena ivavakoso, eda saga meda veiyaloni kei ira na tacida. (3) Nida vakaitavi vakalevu ena cakacaka vakaitalatala, eda tokoni ira tiko na taci Karisito. (4) Ni cokovata na ivavakoso, eda tokona tiko nodra vakatulewa na qase ni ivavakoso.