Raica sara na lewena

Raica na lewenivola

Rokova “na ka sa Vauca Vata na Kalou”

Rokova “na ka sa Vauca Vata na Kalou”

“Na ka sa vauca vata na Kalou me kua ni tawasea na tamata.”​—MARI. 10:9.

SERE: 131, 132

1, 2. Na cava e uqeti keda kina na Iperiu 13:4?

O DAU vinakata mo rokovi Jiova? Io, e dodonu ga mo rokovi koya! E yalataka ni na qai rokovi iko. (1 Sam. 2:30; Vkai. 3:9; Vkta. 4:11) E vinakata tale ga meda dau veirokovi, meda rokovi ira mada ga na vakailesilesi ni matanitu. (Roma 12:10; 13:7) Ia e dua tale na ka meda rokova vakalevu, oya na vakawati.

2 E vola na yapositolo o Paula: “Meda rokova kece na vakawati, me kua tale ga ni vakadukadukalitaki na imocemoce ni vakawati.” (Iper. 13:4) A sega ni vosa raraba tu ga o Paula. Ia e uqeti keda tiko na lotu vaKarisito meda rokova na vakawati, meda raica ni dua na ka talei. E dau va tale ga qori nomu rai, vakabibi ke o vakawati?

3. Na ivakasala bibi cava me baleta na vakawati e tukuna o Jisu? (Raica na imatai ni iyaloyalo.)

3 Ke o raica na vakawati me dua na ka talei, o sa vakatotomuri Jisu sara tiko ga, ni dau rokova na vakawati. Nira tarogi koya na Farisi me baleta na veisere, e tukuna ga na ka e cavuta na Kalou me baleta na imatai ni vakawati: “Oya na vuna ena biuti tamana kina kei tinana o tagane, me rau sa na lewe dua ga.” E  tomana o Jisu: “Na ka sa vauca vata na Kalou me kua ni tawasea na tamata.”—Wilika Marika 10:2-12; Vkte. 2:24.

4. Na cava e nakita o Jiova me baleta na vakawati?

4 E vakadinata o Jisu ni tauyavutaka na Kalou na vakawati, e vakabibitaka ni dodonu me dei. E sega ni tukuna na Kalou vei Atama kei Ivi ni rawa ni tinia nodrau vakawati na veisere. E tauyavutaka o Jiova na vakawati ena were o Iteni me dua ga na isa ni vakawati, oya me rau duavata na “lewe rua” me tawamudu.

ESO NA VEISAU

5. E vakaleqa vakacava na vakawati na mate?

5 Eda kila ni levu na veisau ena gauna e valavala ca kina o Atama. Kena ivakaraitaki na mate, ni vakaleqa na bula vakawati. Eda kila qori ena ka e vola na yapositolo o Paula ni vakamacalataka nira sega ni vauci ena Lawa e vola o Mosese na lotu vaKarisito. E tukuna ni mate na isa ni vakawati, sa galala o koya e bula tiko me vakawati tale.—Roma 7:1-3.

6. E laurai vakacava ena Lawa e vola o Mosese na rai ni Kalou me baleta na vakawati?

6 E vakamatatataki na vakawati ena Lawa ni Kalou vua na matanitu o Isireli. E vakatara me dua e levu na watina, qori na ivakarau sa muri tiko ni bera ni vakarautaka na Kalou na Lawa vei ira na Isireli. Ia e taqomaki ira na yalewa kei na gone mera kua ni vakalolomataki. Kena ivakaraitaki, ke dua na tagane ni Isireli e vakawatitaka na bobula, oti qai dua tale na watina, ena sega ni vakawalena na ka me bula kina na imatai ni watina, me vaka na kakana, isulu, kei na itavi ni vakawati. E vinakata na Kalou me karoni watina, me taqomaki koya tale ga. (Lako 21:9, 10) Eda sega ni vauci ena Lawa, ia eda kila kina ni talei vei Jiova na vakawati. Qo e uqeti keda meda rokova.

7, 8. (a) Na cava e tukuni ena Vakarua 24:1 me baleta na veisere? (b) E raica vakacava o Jiova na veisere?

7 Na cava e tukuni ena Lawa me baleta na veisere? E rokova o Jiova na vakawati, ia e vakadonuya ena so na ituvaki na veisere. (Wilika Vakarua 24:1.) E rawa ni sereki watina e dua na tagane ni Isireli ke raica vua e dua na “ka tawakilikili.” E sega ni vakamacalataki ena Lawa na ka e okati ena “ka tawakilikili” qori. Kena irairai ni dua na itovo vakamadua se cala bibi, sega ni cala lailai. (Vkru. 23:14) Ka ni rarawa ena gauna i Jisu, e levu na Jiu era veisere “ena dua ga na yavu e rawa.” (Maciu 19:3) Eda na sega sara ga ni via cakava qori.

8 E vakamacalataka na parofita o Malakai na rai ni Kalou me baleta na veisere. E matau ena gauna ya mera vakaisini watidra na tagane, ya mera sereka na yalewa era ‘vakawatitaka nira se cauravou,’ me rawa nira vakawatitaka na yalewa gone era sega ni qaravi Jiova. E vola o Malakai na rai ni Kalou: “[Au] cata na veisere.” (Mala. 2:14-16) Qori e salavata kei na ka e cavuta o Jiova me baleta na imatai ni vakawati: “Ena kabiti watina [o tagane], erau na lewe dua ga.” (Vkte. 2:24) E duavata o Jisu kei na rai i Tamana me baleta na vakawati ni kaya: “Na ka sa vauca vata na Kalou me kua ni tawasea na tamata.”—Maciu 19:6.

YAVU DUADUA GA NI VEISERE

9. Na cava na ibalebale ni vosa i Jisu ena Marika 10:11, 12?

9 De dua era na taroga eso, ‘E tiko na yavu me sereki watina kina na lotu vaKarisito qai vakawati tale?’ Rogoca mada na ka e cavuta o Jisu me baleta na veisere: “Na tagane e sereka na watina qai vakawati tale sa veibutakoci, sa cala o koya vei watina,  na yalewa tale ga e sereki watina qai vakawati tale e sa veibutakoci.” (Mari. 10:11, 12; Luke 16:18) E matata ni rokova o Jisu na vakawati, e vinakata tale ga meda cakava qori. Na tagane e sereka na watina yalodina (se na yalewa e sereka na watina yalodina) ena yavu ga e rawa qai vakawati tale, e sa veibutakoci. Na vuna? Ni sega ni tinia na vakawati na veisere. Ena mata ni Kalou, erau se “lewe dua” tiko ga. E tukuna tale ga o Jisu, ke sereki watina yalodina o tagane, e rawa ni veibutakoci o yalewa. E rawa vakacava? Ena rairai vinakata na yalewa e sereki me vakawati tale me vukei kina vakailavo. Nona vakawati tale e okati me veibutakoci.

10. Na yavu cava e rawa ni veisere kina na lotu vaKarisito qai vakawati tale?

10 E cavuta o Jisu na yavu e rawa ni veisere kina e dua: “Au tukuna vei kemuni, na tagane e sereka na watina qai vakawati tale e sa wili me veibutakoci ke sega ni veiyacovi tawadodonu [vaKirisi, por·neiʹa] o watina.” (Maciu 19:9) E vakavulica tale ga na tikina qori ena Vunau ena Ulunivanua. (Maciu 5:31, 32) Ena gauna ruarua qori, e cavuta o Jisu na “veiyacovi tawadodonu.” Na matavosa qo e okati kina na ivalavala ni veiyacovi ena taudaku ni vakamau: na veibutakoci, saqamua, nodrau veiyacovi na sega ni vakamau, veimoceri vakatagane se vakayalewa, kei na veiyacovi kei na manumanu. Kaya mada ke veiyacovi tawadodonu o tagane vakawati, ena vakatulewataka o watina me sereki koya se kua. Ke sereki watina o yalewa, sa na tini kina na nodrau vakawati ena mata ni Kalou.

11. Na cava ena rairai sega ni via veisere kina na lotu vaKarisito e veiyacovi tawadodonu o kena isa?

11 A sega ni tukuna tiko o Jisu ke veiyacovi tawadodonu na isa ni vakawati me sereki koya sara na kena isa e yalodina tiko. Kena ivakaraitaki, ena rairai vakatulewataka o yalewa me tiko vata ga kei watina e veiyacovi tawadodonu. De dua se domoni koya tiko ga, ena rawa ni vosoti koya rau  qai cakacaka vata me vinaka nodrau vakawati. Ia ke sereki tagane qai sega ni vakawati tale, ena dredre vua na ituvaki. Kena ivakaraitaki, vakacava na veika me bula kina kei na nona gagadre ni veiyacovi? Ena galili? Vakacava o ratou na gone? Ena rawarawa me susugi ratou ena dina? (1 Kor. 7:14) E macala ni na dredre vua na ituvaki.

12, 13. (a) Na cava e yaco ena vakawati nei Osea? (b) Cava e ciqomi Komera tale kina? Cava eda vulica kina?

12 E levu na ka eda vulica vua na parofita o Osea. E tukuna vua o Jiova me lai vakawatitaki Komera, na “yalewa saqamua” me ‘so kina na luvena ni sala.’ E “kunekune” o Komera, e “vakasucuma sara e dua na [luvei Osea] tagane.” (Osea 1:2, 3) Toso na gauna, e vakasucuma o Komera e dua na luvena yalewa kei na dua na tagane, kena irairai ni duatani na tamadrau. E veibutakoci vakavica o Komera, ia e yalodina tiko ga vua o Osea. Oti e biubiu me yalewa bobula. E voli koya tale mai o Osea. (Osea 3:1, 2) E vakayagataki Osea o Jiova me vakaraitaka na nona vosoti ira tu ga na Isireli ena nodra sega ni yalodina vua. Na cava eda vulica ena ivakaraitaki qo?

13 Ke veibutakoci na isa ni vakawati lotu vaKarisito, ena vinakati me vakatulewa na kena isa e yalodina tiko. E cavuta o Jisu na yavu me sereki watina kina o koya e yalodina qai vakawati tale. Ia e rawa tale ga ni vosoti kena isa. E donu qori. A ciqomi Komera tale o Osea. Ni lesu yani, e sega ni dodonu me veiyacovi tale kei na dua na tagane. A “sega ni veiyacovi” kei Komera o Osea ena loma ni dua na gauna. (Osea 3:3, vmr.) Toso na gauna a rairai veiyacovi tale kei Osea. Qori e vakaraitaka nona yalorawarawa o Jiova me ciqomi ira tale na nona tamata, me vinaka tale na nodra veiwekani kei koya. (Osea 1:11; 3:3-5) Na cava eda vulica kina me baleta na vakawati nikua? Ke vakatulewataka na isa ni vakawati yalodina me tiko vata ga kei watina, nodrau veiyacovi tale e vakaraitaka nona veivosoti. (1 Kor. 7:3, 5) Sa na sega na yavu me sereki watina kina. E vinakati me rau cakacaka vata, me rau doka tale ga na vakawati.

ROKOVA NA VAKAWATI KE DREDRE MADA GA

14. Me vaka e volai ena 1 Korinica 7:10, 11, na cava e rawa ni yaco ena vakawati?

14 E dodonu meda rokova kece na lotu vaKarisito na vakawati me vakataki Jiova kei Jisu. Ia nida sega ni uasivi, eso era beca na vakawati. (Roma 7:18-23) Meda kua gona ni kidroataka ni vica na lotu vaKarisito ena imatai ni senitiuri e leqa tale ga na nodra bula vakawati. E vola o Paula me “kua ni biuti watina na yalewa vakawati,” ia e dau yaco qori ena so na gauna.—Wilika 1 Korinica 7:10, 11.

Na cava me caka me vinaka kina na vakawati? (Raica na parakaravu 15)

15, 16. (a) Ni leqa na bula vakawati cava me nodrau inaki, na vuna? (b) E yaga vakacava qo ke sega ni qaravi Jiova e dua vei rau?

15 E sega ni vakamacalataka o Paula na vu ni veibiu. E sega ni veiyacovi tawadodonu o tagane, me sereki koya kina o yalewa qai vakawati tale. E vola o Paula, na yalewa e biuti tagane “me kua ga ni vakawati, ke sega me lesu ga vei watina.” Kena ibalebale ni rau se duavata tiko ga ena mata ni Kalou. E veivakasalataki o Paula ke sega ni vu ni leqa na veiyacovi tawadodonu, e dodonu me rau veivakameautaki na veiwatini. Rawa ni rau kere ivakasala vei ira na qase ni ivavakoso. Era na sega ni veitovaki na qase, ia e rawa nira veivakasalataki ni yavutaki ena iVolatabu.

16 Ena dredre sara ke dua ga na isa ni vakawati e qaravi Jiova, e saga tiko  me muria nona ivakatagedegede. Ke leqa nodrau bula vakawati, vakacava e kena iwali me rau veibiu? Me vaka sa cavuti oti, na yavu duadua ga vakaivolatabu e rawa kina na veisere oya na veiyacovi tawadodonu, e sega ga ni tukuna na yavu ni veibiu. E vola o Paula: “Na yalewa tale ga e duatani na vakabauta i watina, qai vakadonuya o tagane me rau tiko vata ga, me kua ni biuti koya o yalewa.” (1 Kor. 7:12, 13) E yaga tale ga nikua na ivakasala qori.

17, 18. Na cava era yalodina tiko ga kina eso na lotu vaKarisito ni dredre nodra bula vakawati?

17 Ena so na gauna, ena vakaraitaka o ‘tagane e duatani nona vakabauta’ ni sega ni vinakata me “rau tiko vata ga” kei watina. Kena ivakaraitaki, de dua e dau voravora, e leqataki kina na bula i watina. Ena rairai sega ni tokoni yalewa kei ratou na vo ni vuvale, se tarova nona toso vakayalo. Ena ituvaki qori, era vakatulewataka eso na yalewa lotu vaKarisito mera veibiu, se mani cava ena rairai tukuna o tagane, ni sega ni “vakadonuya . . . me rau tiko vata ga.” Ia eso tale na lotu vaKarisito era sotava tiko na ituvaki qori era sega ni veibiu, era vosota tiko ra qai saga me vinaka na nodra bula vakawati. Na vuna?

18 Ni rau veibiu mada ga, erau se veiwatini tiko ga. Ni rau dui tutu, erau na sotava na ituvaki sa tukuni oti mai. E vakamacalataka na yapositolo o Paula na vuna me rau duavata tiko ga kina. E vola: “E vakasavasavataki na tagane vakawati e sega ni vakabauta ena vuku i watina, e vakasavasavataki na yalewa vakawati e sega ni vakabauta ena vuku i watina e vakabauta, ke sega, era na sega ni savasava na luvedrau, ia qo era sa savasava.” (1 Kor. 7:14) Levu na lotu vaKarisito yalodina era tiko vata ga kei watidra e duatani nodra vakabauta nira sotava na ituvaki dredre. Era vakadinata ni yaga dina, vakabibi nira mai qaravi Jiova tale ga na watidra.—Wilika 1 Korinica 7:16; 1 Pita 3:1, 2.

19. Na cava e levu kina ena ivavakoso vaKarisito na veiwatini mamarau?

19 E veivakasalataki o Jisu ena ka e vauca na veisere, e uqeti vakalou tale ga na yapositolo o Paula me veivakasalataki ena ka e vauca na veibiu. Erau vinakata ruarua meda doka na vakawati. Ena ivavakoso lotu vaKarisito e veiyasa i vuravura, era tu kina e levu na veiwatini era marautaka nodra vakawati. De dua e levu ena nomu ivavakoso na tacida tagane era lomani watidra kei na yalewa era rokovi watidra, era vakaraitaka kece nira rokova na vakawati. Eda marau nira vakaraitaka e vica vata na milioni na dina ni vosa ni Kalou qo: “Oya na vuna ena biuti tamana kina kei tinana o tagane me kabiti watina me rau na lewe dua ga.”—Efeso 5:31, 33.