Raica sara na lewena

Raica na lewenivola

“Ena Marautaki Jiova Vakalevu na Yalododonu”

“Ena Marautaki Jiova Vakalevu na Yalododonu”

E SA yabaki 80 vakacaca o Diana. Sa guiguileca o watina, e qaravi tale ga ena itikotiko ni malumalumu me vica na yabaki qai takali. Rau sa mate na luvena tagane, e tauvi koya tale ga na kenisa ni sucu. Ia nira raici koya na lewe ni nona ivavakoso ena Vale ni Soqoni se cakacaka vakaitalatala, e dau mamarau tu ga.

A veiqaravi vakaivakatawa dauveilakoyaki o John me sivia ni 43 na yabaki. E marautaka nona veiqaravi, e nona bula sara ga! Ia e cegu nona veiqaravi vakaivakatawa dauveilakoyaki me qarava e dua na wekana e tauvimate, sa veiqaravi tiko ga ena ivavakoso. Nira sotavi koya na mataveitacini era veikilai ena soqo ni tabacakacaka se soqo ni veiwasewase, era raica ni se mamarau tiko ga.

Na cava e uqeti Diana kei John me rau marau tiko ga? Rawa vakacava ni marau tu ga e dua ni dredre na ituvaki? Rawa vakacava ni mamarau e dua ni sa cegu ena itavi e dau mareqeta? E sauma na iVolatabu, e kaya: “Ena marautaki Jiova vakalevu na yalododonu.” (Same 64:10) Ena matata na tikina bibi qori ke da kila na ka e vakavu marau kei na kena e sega.

MARAU LEKALEKA

E macala ni dau vakavu marau eso na ka. Kena ivakaraitaki, nodrau vakamau na veiwatini. Se dua e vakaluveni, se lesi ena itavi vakalou. Na ka kece qo e vakavu marau nira isolisoli i Jiova. E tauyavutaka na vakawati, me rawa tale ga na vakaluveni, e lesia na itavi ena ivavakoso vaKarisito.—Vkte. 2:18, 22; Same 127:3; 1 Tim. 3:1.

Ena yasana adua, e rawa ni lekaleka ga na marau qori. Ena rawa ni tawayalodina na isa ni vakawati se takali. (Isik. 24:18; Osea 3:1) Era talaidredre vei Jiova eso na gone, vaka kina vei ira na nodra itubutubu, de dua era na vakasivoi sara. Kena ivakaraitaki, e sega ni vakadonuya o Jiova nodrau veiqaravi na luvei Samuela, e levu tale ga na leqa ena vuvale nei Tevita ni veibutakoci kei Pacisepa. (1 Sam. 8:1-3; 2 Sam. 12:11) Qori  e vakavu rarawa kei na yalolailai, e sega ni vakavu marau.

E va tale ga qori na itavi eda qarava na tamata ni Kalou, ena so na gauna eda na cegu, rairai ena vuku ni tauvimate, itavi ena vuvale, se veisau na ilesilesi. Levu era sotava na ituvaki qori era diva lesu na marau era dau vakila tu.

Eda raica rawa ni lekaleka ga na kena marautaki eso na ka. Ia vakacava e tiko e dua na mataqali marau ena dei tu ga ni veisau se dredre na ituvaki? Io, e laurai qori vei Samuela, Tevita kei na so tale, ni dredre na ka era sotava.

MARAU E DEI

E kila o Jisu na ibalebale ni marau. Ni se tiko mai lomalagi, e kaya na iVolatabu ni dau ‘marau tiko e matai Jiova ena gauna kece.’ (Vkai. 8:30) Ni bula e vuravura, eso na gauna e dau sotava na ituvaki dredre. Ia e marautaka me cakava na loma i Tamana. (Joni 4:34) Vakacava ni vakararawataki ni bera ni mate? Eda wilika: “Ena vuku ni marau e tu e matana, e vosota kina na kaunirarawa.” (Iper. 12:2) Levu gona na ka eda vulica ena rua na ka e tukuna o Jisu me baleta na marau dina.

Era lako vei Jisu na 70 na tisaipeli nira lesu mai na cakacaka vakavunau. Dua na ka nodra marau nira cakamana, era vakasava tale ga na timoni. E kaya vei ira o Jisu: “Me kua ni vu ni nomuni marau na nomuni vakamalumalumutaki ira na timoni, moni marau ga ni sa volai na yacamuni mai lomalagi.” (Luke 10:1-9, 17, 20) Io, eda dau marautaka eso na ilesilesi lavotaki, ia me bibi sara nona vakadonui keda o Jiova. Eratou marautaka vakalevu qori na tisaipeli yalodina.

Ena dua tale na gauna ni vosa tiko o Jisu vei ira na ilala levu, e qoroya e dua na marama Jiu nona veivakavulici mani tukuna ni na marau vakalevu na tinai Jisu. Ia e vakadodonutaki koya o Jisu, e kaya: “Sega,  era marau o ira na rogoca na vosa ni Kalou ra qai muria tiko ga!” (Luke 11:27, 28) E totoka nira marautaki luvedra na itubutubu, ia mera marautaka sara vakalevu ni vinaka nodra veiwekani kei Jiova ra qai talairawarawa vua.

Dua na vuna meda marau kina oya nida kila ni vakadonui keda o Jiova. Ena dei tu ga na marau qori nida sotava na ituvaki dredre. Eda na marau ga vakalevu nida vosota da qai yalodina tiko ga. (Roma 5:3-5) Kena ikuri, o Jiova e dau solia nona yalo tabu vei ira na nuitaki koya, e dua gona na itovo e okati ena vua ni yalo tabu na marau. (Kala. 5:22) Sa rauta me cavuti ena Same 64:10: “Ena marautaki Jiova vakalevu na yalododonu.”

Na cava e uqeti John me marau tiko ga?

Sa rauta me rau marau tiko ga o Diana kei John, sa cavuti oti mai, ni rau sotava na ituvaki dredre. E kaya o Diana: “Au dau vakararavi ga vei Jiova, me vaka nona nuitaki rau na nona itubutubu e dua na gone.” E kila vakacava ni vakadonui koya na Kalou? “E vakalougatataki au meu rawa ni marautaka tiko ga noqu vunau vakawasoma.” E gugumatua o John ena cakacaka vakaitalatala ni cegu mai na itavi e dau mareqeta, na ivakatawa dauveilakoyaki. E vakamacalataka na ka e uqeti koya: “Niu lesi ena 1998 meu veivakavulici ena Koronivuli ni Vuli Veiqaravi Vakaitalatala, sa qai levu ga noqu vuli vakataki au.” Ni vosa ena vukudrau vakaveiwatini, e kuria: “E rawarawa ni keirau veisau ni keirau dau yalorawarawa ni cakava na ka e lesia vei keirau o Jiova. E sega ni dua na ka keirau veivutunitaka.”

E levu tale ga era vakadinadinataka na ka e volai ena Same 64:10. Kena ivakaraitaki, e dua na veiwatini rau veiqaravi ena Peceli e Merika me 30 vakacaca na yabaki. Erau mani lesi me rau painia lavotaki. Rau kaya: “E dau mositi keda ni kau tani eso na ka eda taleitaka. Ia eda na sega ni rarawa tu ga.” Ni rau yaco ena nodrau ilesilesi, rau vakaitavi sara ena cakacaka vakaitalatala kei ira ena ivavakoso. Rau kaya tale: “Keirau dau vakamatatataka eso na ka ena neirau masu. E vakayaloqaqataki keirau ni rogoci na neirau masu, keirau marau tale ga. Sega ni dede era painia eso ena ivavakoso, keirau kalougata tale ga ni toso vinaka e rua neirau vuli iVolatabu.”

‘MARAU ME TAWAMUDU’

Eda vakadinata ni na sega ni maravu tu ga na itosotoso, so na gauna e vinaka, so tale na gauna e sega. Ia e veivakacegui na vosa i Jiova ena Same 64:10. Nida yalolailai, eda nuidei nira na “marautaki Jiova vakalevu” na “yalododonu” era yalodina tiko ga ni veisau na ituvaki. Eda vakanamata tale ga me vakayacori na vosa ni yalayala i Jiova me baleta na “lomalagi vou kei na vuravura vou.” Sa na oti vakadua na ivalavala ca. Era na “reki” kece na tamata ni Kalou, era na “marautaka me tawamudu” na ka e bulia se vakarautaka.—Aisea 65:17, 18.

Vakasamataka mada qo: eda sa na bulabula vinaka, eda na sega ni oca. Se cava ga e vakararawataki keda ena gauna sa oti, sa na sega tale ni vakamosia na lomada. E vakadeitaka o Jiova ni na “sega tale ni nanumi na ka makawa, ena sega ni tiko e lomamuni.” Eda na kidavaki ira na wekada era vakaturi mai. Vica vata na milioni era na vakataki rau na itubutubu ni goneyalewa yabaki 12 e vakatura o Jisu: “Dua na ka na [nodrau] marau.” (Mari. 5:42) Era sa na uasivi kece na “yalododonu” e vuravura ra qai “marautaki Jiova vakalevu” me tawamudu.