Raica sara na lewena

Raica na lewenivola

Yalololoma—Vakaraitaki ena Vosa kei na ka Eda Cakava

Yalololoma—Vakaraitaki ena Vosa kei na ka Eda Cakava

NA YALOLOLOMA e veivakacegui, e veivakayaloqaqataki tale ga! Eda dau marau ni dua e kauaitaki keda. Eda dau taleitaka na nodra yalololoma eso, eda na bucina gona vakacava na itovo talei qo?

Na cava na yalololoma? Qori na noda kauaitaka dina na kedra ituvaki eso tale. Ena laurai qori ena noda vosa kei na ka eda cakava meda veivuke kina, ena sega gona ni caka vakarairai. Na yalololoma dina e vu ena veinanumi kei na loloma. O koya e bibi sara, ni yalololoma e dua na itovo e okati ena vua ni yalo tabu meda vakaraitaka na lotu vaKarisito. (Kala. 5:22, 23) Eda na bucina vakacava na yalololoma? Meda dikeva mada na sala rau vakaraitaka kina o Jiova kei na Luvena, kei na kena yaga vei keda.

O JIOVA E YALOLOLOMA VEI KEDA KECE

O Jiova e yalololoma qai kauaitaki keda kece, wili kina o “ira na sega ni dau vakavinavinaka kei ira na daucaka ca.” (Luke 6:35) Kena ivakaraitaki, e “vakacabea na matanisiga vei ira na daucaka ca kei na daucaka vinaka, e vakatauca tale ga na uca vei ira na yalododonu kei ira na sega ni yalododonu.” (Maciu 5:45) O koya gona, vei ira mada ga na sega ni kilai Jiova na Dauveibuli, e yaga vei ira na ka e vakarautaka mera bula kina, era marautaka tale ga.

E vakasakiti nona yalololoma o Jiova vei rau o Atama kei Ivi. Ni rau sa valavala ca, rau “cula vata na draunilolo me ubia na yagodrau tabu.” Ia e kila o Jiova ni rau vinakata na isulu me rau bula ena taudaku kei Iteni, ni sa cudruvi tu na qele ena “wavakavotona kei na soni.” E yalololoma o Jiova ni cakava nodrau “isulu balavu mai na kulinimanumanu.”—Vkte. 3:7, 17, 18, 21.

E yalololoma o Jiova vei ira “na daucaka ca kei na daucaka vinaka,” e vinakata tale ga me vakaraitaka nona yalololoma vei ira na yalodina vua. Kena ivakaraitaki ena gauna i Sakaraia, e rarawa na agilosi ni sa sega tu ni toso na taravaki ni valenisoro e Jerusalemi. E rogoci koya o Jiova qai vosa vua “ena vosa vinaka e veivakacegui.” (Saka. 1:12, 13) Qori tale ga na ka e cakava o Jiova vua na parofita o Ilaija. Dua na gauna e yalolailai qai kerea me mate. Ni kauaitaka o Jiova na ivakarau ni lomana, e tala kina e dua na agilosi me vakayaloqaqataki koya. E vakadeitaka tale ga vua ni levu tale era se yalodina tiko. E yaga vakacava vei Ilaija na vosa vakayalololoma qori kei na nona vukei? E tomana tale na nona ilesilesi. (1 Tui 19:1-18) Levu na dauveiqaravi ni Kalou era vakaraitaka na yalololoma, ia o cei e ivakaraitaki vinaka duadua?

 JISU—NA IVAKARAITAKI LEVU NI YALOLOLOMA

E kilai o Jisu ena nona yalololoma kei na veinanumi ena nona cakacaka vakaitalatala e vuravura. E sega ni dau voravora se vakacolasau. Ena nona veinanumi, e tukuna kina na vosa qo: “Ni lako mai vei au o kemuni kece oni oca, oni bikai voli ena icolacola bibi, au na vakacegui kemuni. . . . E veivakacegui na noqu ivua.” (Maciu 11:28-30) E uqeti ira vakacava na lewenivanua na nona yalololoma? Era muri koya ena vanua kece ga e lakova. Na levu ni “nona lomani ira” o Jisu, e vakani ira, vakabulai ira na tauvimate kei na malumalumu, e vakavulici ira tale ga ena “levu sara na ka” me baleti Tamana.—Mari. 6:34; Maciu 14:14; 15:32-38.

E kilai na yalololoma i Jisu ena nona dau veinanumi kei na veikauaitaki. So na gauna era dau vaqarai koya yani na lewenivanua ena nona gauna ni vakacegu, ia se “marautaki ira” tiko ga. (Luke 9:10, 11) Dua na gauna e tara nona isulu e sau e dua na marama sa lako tu ga vua na dra me 12 na yabaki, ni via bula. E sega ni savasava na marama qori, e rere tale ga, ia e sega ni cudruvi koya o Jisu. (Vunau 15:25-28) Ena levu ni nona yalololoma, e kaya vua: “Luvequ, sa vakabulai iko na nomu vakabauta. Lako ena vakacegu, mo bula mai na kemu mate bibi.” (Mari. 5:25-34) E dua dina na ivakaraitaki vakasakiti ni yalololoma!

YALOLOLOMA ENA NOMU CAKA VINAKA

Eda raica ena vica na ivakaraitaki qori ni laurai na yalololoma dina ena ka e caka. Ena vosa vakatautauvata ni kai Samaria dauloloma, e vakaraitaka kina o Jisu na bibi ni veivuke. Era dau veisevaki na Jiu kei ira na kai Samaria, ia na levu ni nona loloma na kai Samaria e vukea na turaga e laumoku qai voleka tu ni mate e gaunisala. Na itovo cava e uqeti koya na kai Samaria me veivuke? Na yalololoma. E vadretitaka na nona mavoa qai kauti koya ena dua na burenivulagi. E sauma tale ga na itaukei ni burenivulagi me qarava na turaga e mavoa, qai tu vakarau me sauma eso tale na ka.—Luke 10:29-37.

E rawa ni vakaraitaki tale ga na yalololoma ena vosa veiuqeti qai veinanumi. E kaya na iVolatabu: “Na nuiqawaqawa ni loma ni tamata e lomabibi kina, ia na vosa vinaka ena vakamarautaka.” (Vkai. 12:25) Nida yalololoma qai yalovinaka, ena veiuqeti na ka eda tukuna, era na marau tale ga na rogoca. * Ena kilai nida kauaitaki ira dina nida vosa vakayalovinaka. Qori ena uqeti ira mera vosota na veivakatovolei.—Vkai. 16:24.

BUCINA NA YALOLOLOMA

Nida buli meda “ucuya na Kalou,” eda rawa gona ni bucina na yalololoma. (Vkte. 1:27) Kena ivakaraitaki, ni kau vakavesu na yapositolo o Paula i Saitoni, “dua na ka nona kauaitaki” koya o Juliase na turaganivalu e Roma, “e vakatarai koya sara me lako vei ira na nona itokani mera vakacegui koya.” (Caka. 27:3) Dua tale na gauna, e voca na waqa e vodo tiko kina o Paula kei na so tale. Era vakawaqa buka mada ga na lewe i Melita mera vakatakatai kina, era ‘kauaitaki ira dina.’ (Caka. 28:1, 2) Sa bau totoka na nodra yalololoma. Io, na yalololoma dina e dodonu me vakaraitaki e veigauna.

Meda vakamarautaki Jiova tiko ga, e dodonu meda bucina na yalololoma da qai vakaitovotaka. Sa rauta me kaya o Jiova  meda “vakaisulu” ena yalololoma. (Kolo. 3:12) E sega ni rawarawa meda vakaitovotaka na itovo vakalou qo. De dua eda dau mamadua, sega ni nuidei, tusaqati, se so na gauna eda nanumi keda ga. Ia eda na rawa ni vorata qori ke da nuitaka na yalo tabu, da qai vakatotomuria na ivakarau ni yalololoma i Jiova.—1 Kor. 2:12.

Eda na rawa ni vakavinakataka vakacava na noda yalololoma? Bibi meda taroga: ‘Au dau vakarorogo vinaka? Au dau kauaitaka na ka era gadreva eso tale? Gauna cava au a caka vinaka kina vua e dua e sega ni wekaqu, se dua e sega ni noqu itokani voleka?’ Rawa nida biuta eso noda isausau. Dua meda kilai ira vinaka eso tale vakauasivi o ira na tacida ena ivavakoso. Qori ga na sala eda na kila kina na kedra ituvaki kei na ka era vinakata. Kena ikarua, meda vakaraitaka na yalololoma me vaka ga eda vinakata me caka vei keda. (Maciu 7:12) Kena ikatolu, ena vukei keda o Jiova meda bucina na yalololoma ke da kerea nona veitokoni.—Luke 11:13.

E VEIUQETI NA YALOLOLOMA

Eso na ka e vola na yapositolo o Paula me vakadinadinataka kina ni italatala ni Kalou, e dua vei ira na “yalovinaka” se yalololoma. (2 Kor. 6:3-6) Era volekati Paula e levu ni dau kauaitaki ira dina ena nona itovo vinaka kei na ka e tukuna. (Caka. 28:30, 31) E rawa tale ga nira mai kila na ka dina e levu ena noda itovo vinaka. Nida dau yalololoma, vei ira tale ga na dau tusaqati keda, eda rawa ni vakaotia nodra yalokaukaua mera yalomalumalumu. (Roma 12:20) De dua era na mai vulica na iVolatabu ni toso na gauna.

Ena Parataisi, era na marau na vica vata na milioni era vakaturi nira vakila na yalololoma dina. De dua era se qai vakila vakadua. Nira taleitaka na ka e caka vei ira, era na via vakaraitaka tale ga. Ke dua e sega ni vakaraitaka na yalololoma ena vuravura vou qai sega ni veivuke, ena sega ni rawata na bula tawamudu. Ia o ira na dau veilomani qai yalololoma ena vakadonuya na Kalou mera bula tawamudu. (Same 37:9-11) Sa na dua dina na vuravura ni vakacegu kei na marau! Ia ena gauna mada ga qo, eda na vakalougatataki vakacava nida dau yalololoma?

YAGA NI YALOLOLOMA

E kaya na iVolatabu: “Na tamata yalovinaka e caka vinaka ga vua.” (Vkai. 11:17) Era taleitaki vakalevu na dau yalololoma se o ira na yalovinaka, ena vakaraitaki tale ga vei ira na itovo qori. E kaya o Jisu: “Na ivakarau oni vakarautaka ena vakarautaki tale vei kemuni.” (Luke 6:38) Kena ibalebale, ena rawarawa sara vei ira na dau yalololoma mera kunea nodra itokani, era na veivolekati tiko ga.

E uqeti ira na ivavakoso e Efeso o Paula mera ‘veilomani, veinanumi, mera yalorawarawa ni veivosoti.’ (Efeso 4:32) Ena laurai na toso ena ivavakoso nira dau yalololoma na lotu vaKarisito, era veivukei tale ga. Era na sega vakadua ni vosa kaukaua, veivakalewai se vosa mosimosi. Era na sega ni vakauvosa, ia era na vakayagataka na yamedra mera veiuqeti kina. (Vkai. 12:18) Qori ena vakaukauataki ira na mataveitacini ena ivavakoso, era na qaravi Jiova tale ga ena marau.

Io, ena laurai na yalololoma ena ka eda tukuna kei na ka eda cakava. Nida yalololoma, eda sa vakatotomuria tiko na nona veikauaitaki o Jiova kei na nona lomasavu. (Efeso 5:1) Eda na vakaukauataka gona na ivavakoso, eda na uqeta eso tale mera qaravi Jiova. Me keda idivi mada ga na yalololoma!

^ para. 13 Ena qai tabaki malua na itovo na yalovinaka, e okati tale ga ena vua ni yalo tabu.