Raica sara na lewena

Raica na lewenivola

“Volia na ka Dina Mo Kua ni Volitaka”

“Volia na ka Dina Mo Kua ni Volitaka”

“Mo volia na ka dina mo kua ni volitaka, vaka kina na vuku, na ivakavuvuli, kei na yalomatua.”—VKAI. 23:23.

SERE: 94, 96

1, 2. (a) Na cava na noda iyau mareqeti duadua? (b) Na ka dina cava eda mareqeta, na vuna? (Raica na imatai ni iyaloyalo.)

NA CAVA na nomu iyau mareqeti duadua? O na via sosomitaka kei na dua na ka e sega soti ni yaga? Nida dauveiqaravi yalayala i Jiova, e noda iyau mareqeti duadua na noda veiwekani kei koya. Eda na sega sara ga ni via sosomitaka kei na dua tale na ka. Eda mareqeta tale ga na ka dina vakaivolatabu nida veivolekati kina kei Jiova.—Kolo. 1:9, 10.

2 Vakasamataka na levu ni ka e vakavulica vei keda na Dauniveivakavulici Levu ena nona Vosa na iVolatabu! E vakaraitaka na bibi ni yacana, na nona itovo talei, kei na uasivi ni ka e rawati ena ivoli ni solia na Luvena ena levu ni nona lomani keda. E vakavulici keda me baleta na Matanitu vakaMesaia qai yalataka na inuinui ni bula i lomalagi vei ira na lumuti kei na bula e vuravura vei ira na ‘so tale na sipi.’ (Joni 10:16) E vakaraitaka tale ga na itovo meda bulataka. Eda mareqeta vakalevu na ka dina nida veivolekati kina kei na Dauveibuli, e vakainaki tale ga noda bula.

3. E rawa ni voli ena ilavo na ka dina?

 3 O Jiova e Kalou lomasavu ni solia na Luvena me rawa nida rawata na bula. E sega ni bureitaka na ka vinaka vei ira na via kila na ka dina. E kila na Kalou nida sega ni rawa ni volia ena ilavo na ka dina. Ni saga mada ga e dua na turaga o Saimoni me volia vei Pita na kaukaua ni yalo tabu, e cudruvi koya o Pita: “Mo drau rusa vata mada ga kei na nomu siliva, ni o nanuma ni o rawa ni volia na isolisoli wale ni Kalou ena ilavo.” (Caka. 8:18-20) Ia na cava na ibalebale ni kena tukuni meda “Volia na ka dina”?

IBALEBALE NI NODA “VOLIA NA KA DINA”

4. Na cava eda na vulica me baleta na ka dina?

4 Wilika Vosa Vakaibalebale 23:23. E vinakati na sasaga meda kila na ka dina ena Vosa ni Kalou. Eda na yalorawarawa gona ni vakuai keda ena ka kece me rawa nida kila. E vakaraitaka o koya e vola na Vosa Vakaibalebale ni bibi meda qaqarauni meda kua ni “volitaka” se biuta na ka dina eda sa “volia” se “rawata.” Meda veivosakitaka mada na ibalebale ni noda “volia” na ka dina kei na veika eda na rawa ni vakuai keda kina. Eda na mareqeta kina vakalevu na ka dina, ena uqeti keda tale ga meda kua vakadua ni “volitaka.” Eda na raica tale ga ni sega ni matewale noda vakuai keda ena vuku ni ka dina.

5, 6. (a) Na cava na ibalebale ni noda volia na ka dina? Vakatauvatana. (b) E yaga vakacava na ka dina?

5 E vinakati na sasaga ke soli wale mada ga e dua na ka. Na vosa vakaIperiu e vakadewataki me “volia” ena Vosa Vakaibalebale 23:23 e kena ibalebale tale ga na “rawata.” Na vosa ruarua qori e dusia ni vinakati na sasaga, oya noda vakuai keda meda rawata e dua na ka mareqeti. Qo e dua na kena ivakatautauvata me matata vei keda. Kaya mada ke soli wale na jaina ena makete. Vakacava ena tutu ga e basika vakasauri e vale na jaina qori? Sega. Eda na sasaga ina makete meda lai kauta mai. E soli wale na jaina, ia se vinakati tiko ga noda sasaga kei na gauna meda gole ina makete. E va tale ga qori noda kila na ka dina, e sega ni voli ena ilavo ia e vinakati kina na sasaga.

6 Wilika Aisea 55:1-3. Na vosa i Jiova e vola o Aisea e vakamatatataka eso na ka me baleta noda volia na ka dina. E vakatauvatana o Jiova na nona vosa ina wai, sucu kei na waini. E veivakacegui na ka dina me vaka noda gunuva na wai batabata e savasava. Na sucu e vakaukauataka na yagoda, e yaga tale ga ena nodra tubu na gone. Na ka dina ena Vosa i Jiova e vakaukauataki keda meda matua vakayalo. Na vosa i Jiova e vaka tale ga na waini. Ena sala cava? E tukuni ena iVolatabu ni waini e vakamarautaka na loma ni tamata. (Same 104:15) Ni tukuna gona o Jiova meda “volia na waini,” e vakadeitaka ni vakavu marau nida muria nona vosa. (Same 19:8) Na ivakatautauvata qo e vukei keda meda kila na yaga ni ka dina kei na noda bulataka! Na noda volia na ka dina e vinakati kina na sasaga. Meda dikeva mada e lima na ka eda na rairai vakuai keda kina meda volia na ka dina.

VAKUAI KEDA MEDA VOLIA NA KA DINA

7, 8. (a) Na cava e vinakati kina na gauna meda volia na ka dina? (b) E vakuai koya vakacava e dua na gonevuli me volia na ka dina, cava e qai yaco?

7 Gauna. E vinakati na gauna meda volia na ka dina. Oya meda rogoca na  itukutuku ni Matanitu ni Kalou, wilika na iVolatabu, ivola vakaivolatabu, vuli vakataki keda, vakavakarau kei na noda tiko ena soqoni. Ena vinakati meda “volia kece” na gauna, oya nida vakuai keda mai na veika e sega ni bibi. (Wilika Efeso 5:15, 16 kei na ivakamacala e ra.) Me vakacava na levu ni gauna eda vakayagataka meda kila kina na yavu ni ivakavuvuli vakaivolatabu? Ena vakatau sara ga ena keda ituvaki yadua. E sega ni vakaiyalayala na ka meda vulica me baleta na vuku i Jiova, nona sala kei na nona cakacaka. (Roma 11:33) Na imatai ni itabataba ni Vale ni Vakatawa vakavalagi e vakatauvatana na ka dina kei na dua na “senikau lailai totoka.” E tukuni kina: “Kua ni nanuma ni dua ga na senikau ni ka dina. Ke a veirauti ga me dua, ke a sega ni so tale na kena ikuri. Kumukumuni tiko ga, vaqaqara tiko ga.” Meda taroga, ‘E vakacava na levu ni ka dina au sa kila?’ Nida bula tawamudu mada ga, ena levu tiko ga na ka meda vulica me baleti Jiova. Ia nikua, e bibi meda vakayagataka vinaka noda gauna meda volia se vulica kina e levu na ka dina. Dikeva mada nona ivakaraitaki e dua na goneyalewa e via kila sara ga na ka dina.

8 O Mariko * e goneyalewa ni Japani, e gole i Merika me lai vuli e Niu Yoka. A lewena voli e dua na lotu a tauyavu e Japani ena veiyabaki ni 1950. E sotavi Mariko e dua na tacida yalewa painia ni vunau yani e veivale, rau mani vuli iVolatabu. Na levu ni nona taleitaka na ka e vulica e kerea kina me vuli vakarua e veimacawa. E cakacaka vagauna, dau levu tale ga nona ka ni vuli ia e gole rawa ena soqoni. E vakuai koya ena so na soqo me volia kece na gauna qori me vulica kina na ka dina. Ni cakava na veiveisau, e totolo kina nona toso vakayalo mani papitaiso ena loma ga ni dua na yabaki. Oti e ono na vula sa painia sara, e painia tiko me yacova mai nikua.

9, 10. (a) Ena vakacava noda rai me baleta na rawaka vakayago nida volia na ka dina? (b) Tukuna na veika e vakuai koya kina e dua na goneyalewa, na cava e vakila kina?

9 Rawaka vakayago. Eda na rairai vakatulewataka meda biuta na cakacaka saulevu meda volia na ka dina. Ni sureti Pita kei Adriu o Jisu me rau “gonedau ni tamata,” erau mani “biuta na nodrau lawa.” (Maciu 4:18-20) E sega ni kena ibalebale ya mera biuta nodra cakacaka o ira kece na vulica na ka dina, ni tiko na nodra itavi vakalou. (1 Tim. 5:8) Ia na ka dina eda vulica me veisautaka noda rai me baleta na rawaka vakayago kei na ka meda vakaliuca. Qori sara ga na ka e vakamatatataka o Jisu, e kaya: “Kua ni kumuna e vuravura na nomu iyau . . . Ia mo kumuna na nomu iyau mai lomalagi.” (Maciu 6:19, 20) Dikeva mada nona ivakaraitaki e dua na goneyalewa.

10 E dau taleitaka o Maria na qito golf ni se bera mada ga ni vuli. E vinaka nona ivakarau ni qito ni sa vuli ena sekeneri, mani soli vua e dua na sikolasivi me vuli ena univesiti. E bibi vei Maria na qito qori, e nona isausau me kenadau kina ni ivurevure ni ilavo vinaka. Ia e qai vulica na iVolatabu, e taleitaka tale ga na veika e mai kila. Dua na ka nona marau ni veisautaka nona bula na ka dina. E kaya: “Na levu ga ni veisau au cakava ena noqu bula kei na noqu ivakarau ni rai meu muria na ivakatagedegede  vakaivolatabu, na levu tale ga ni noqu marau.” E liaca o Maria ni dredre me saga ruarua na rawaka vakayago kei na rawaka vakayalo. (Maciu 6:24) E mani vakuai koya ena nona isausau vakayago me volia na ka dina. Sa painia tiko ena gauna qo qai marautaka nona bula, e kaya ni “bula marautaki duadua, e vakainaki tale ga.”

11. Na cava ena rairai yaco nida volia na ka dina?

11 iTokani kei ira na wekada. Ena rairai veisau na ivakarau ni noda veimaliwai kei ira na noda itokani se wekada nida bulataka na ka dina. Na vuna? E vakamacalataka qori o Jisu ni masulaki ratou nona imuri, e kaya: “Ni vakasavasavataki ratou ena ka dina, e ka dina na nomuni vosa.” (Joni 17:17) Ni tukuni “vakasavasavataki ratou” e kena ibalebale tale ga me ratou “duatani.” Nida bulataka na ka dina, sa na duatani sara na noda itovo vei ira e vuravura. Era na raica ni sa veisau na ka eda vakaliuca nida muria na ivakatagedegede vakaivolatabu. Eda sega ni via veileti kei ira noda itokani se vuvale, ia era na rairai sega ni taleitaki keda eso kei na ka dina eda vulica. Eda na sega ni kurabui ni tukuna o Jisu: “Era na meca ni tamata yadua na lewe sara ga ni nona vuvale.” (Maciu 10:36) Ia e vakadeitaka ni na uasivi na ka eda vakalougatataki kina ni vakatauvatani kei na veika eda vakuai keda kina.—Wilika Marika 10:28-30.

12. Na cava e sotava e dua na Jiu ni volia na ka dina?

12 E dua na daunibisinisi o Aaron, e Jiu. Ni se gone, e vulica ni tabu me cavuti na yaca ni Kalou. Ia e gu na lomana me kila na ka dina. Dua na tacida e vakaraitaka vua na kena biu vata na votu ena va na matanivola vakaIperiu ni yaca ni Kalou, e rawa ni cavuti qori me “Jiova.” Ena levu ni nona marau e gole i valenilotu me tukuna na ka e vulica vei ira na rapai. E nanuma sara ga nira na taleitaka nona sa kila na yaca ni Kalou, ia era kasiviti koya ra qai sevaki koya. E sega ni vinaka tale ga nona veimaliwai kei ratou nona vuvale. Ia e sega ni soro, e vulica tiko ga na ka dina, yaco sara me iVakadinadina i Jiova. E yalodina tiko ga ena vo ni nona bula. Me vakataki Aaron, eda na muria tiko ga na ka dina ke ra raici keda mada ga vakatani na noda vuvale se so tale.

13, 14. Eda na veisautaka vakacava noda rai kei na itovo meda volia na ka dina? Tukuna e dua na ivakaraitaki.

13 Rai kei na itovo dukadukali. Meda kila na ka dina qai bulataka na ivakatagedegede vakaivolatabu, e vinakati meda yalorawarawa ni veisautaka noda rai kei na itovo. Ni vakamacalataka na veisau qori o Pita, e kaya: “Me vaka na gone talairawarawa, ni kua ni muria tiko na gagadre ca a tu vei kemuni e liu ni oni a lecaika, ia . . . me savasava . . . na nomuni ivalavala kece.” (1 Pita 1:14, 15) E vinakati vei ira e Korinica mera cakava na veisau lelevu ni takalevu na itovo vakasisila. (1 Kor. 6:9-11) Levu tale ga nikua era biuta na itovo dukadukali mera volia na ka dina. E tukuna o Pita vei ira na lotu vaKarisito: “Sa rauta na gauna sa oti, oni a vakaogai kemuni voli ena veika era dau vakayacora na tamata ni vuravura, ena ivalavala vakasisila, ena nomuni garosa, gunu waini vakasivia, soqo ni marau vakalialia, veisisivi gunu, kei na ivakarau vakasisila ni qaravi matakau.”—1 Pita 4:3.

 14 Vica vata na yabaki nodrau daumateni o Devynn kei Jasmine. E daunifika o Devynn, ia e sega ni dei ena dua na cakacaka ni daumateni. O Jasmine e dau cudrucudru, e voravora tale ga. Dua na siga ni mateni tu e gaunisala, e sota sara kei na rua na tacida daukaulotu. E mani tuvanaki me rau vuli iVolatabu ena macawa tarava ena vale nei Devynn, ia rau mateni tu ni rau yaco yani na daukaulotu. Erau sega ni namaka me rau kauaitaki va qori, me rau veisiko yani e vale na daukaulotu. Ia e veisau na ituvaki ena veisiko tarava. Tekivu mai na imatai ni nodrau vuli, rau raica vakabibi o Jasmine kei Devynn na veika rau vulica ena iVolatabu, rau bulataka tale ga. Ena loma ga ni tolu na vula, sa biu vakadua na gunu rau vakamau sara. Levu era raica na veiveisau rau cakava, era mai vulica kina na iVolatabu e levu ena nodrau koro.

15. Na ka dredre cava eda na rairai cakava meda volia na ka dina?

15 iValavala se soqo e cata o Jiova. Ena sega ni rawarawa toka meda biuta na ivalavala se soqo e vakacala na iVolatabu nida volia na ka dina. De dua ena rawarawa vei ira eso mera muduka nodra marautaka na ivalavala se soqo va qo nira mai kila na rai i Jiova. Ia ena rairai dredre vei ira eso tale nira veitusaqati na vuvale, cakacaka vata kei na itokani voleka. Era kila ni bibi na ivalavala qori vei ira e levu, vakauasivi na soqo mera vakamarautaki kina na wekadra era sa mate. (Vkru. 14:1) Ena uqeti keda na nodra ivakaraitaki ni yaloqaqa ena gauna vakaivolatabu meda cakava na veisau. Meda raica mada nodra doudou eso na lewenivanua e Efeso ena imatai ni senitiuri.

16. Na cava era cakava eso e Efeso mera volia na ka dina?

16 E levu na daucakaisausau e Efeso. Ia eso era tavuki mera lotu vaKarisito. Na cava era cakava mera muduka kina na ivalavala qori mera volia na ka dina? E vakamacalataka na iVolatabu: “E levu sara ga na daucakaisausau era kauta yani na nodra ivola ra qai lai vakama e matadra kece. Era cakacakataka na kena isau kece e 50,000 na tikinisiliva. Na ka qo e gumatua qai tete sara kina vakalevu na vosa i Jiova.” (Caka. 19:19, 20) Era yalorawarawa na lotu vaKarisito yalodina qori mera vakarusa na ivola saulevu, mani vakalougatataki ira o Jiova.

17. (a) Na cava eda cakava meda volia kina na ka dina? (b) Na taro cava ena saumi ena ulutaga tarava?

17 Na cava o cakava mo volia kina na ka dina? Eda vakayagataka na gauna meda kumuna na senikau ni ka dina. Eso era volia na ka dina nira vakuai ira ena rawaka vakayago, era vosota tale ga nodra veitusaqati na itokani se wekadra. Levu era veisautaka nodra ivakarau ni rai kei na itovo, era sega tale ga ni qai marautaka na ivalavala kei na soqo e cata o Jiova. Se mani cava eda vakuai keda kina, eda kila ni sega ni matewale na noda volia na ka dina nida mai veiwekani voleka kina kei Jiova, qori na noda iyau mareqeti duadua. Nida vakasamataka na veika kece eda vakalougatataki kina, eda kidroa nira volitaka se vakanadakuya eso na ka dina. E rawa vakacava? Eda na qaqarauni vakacava meda kua ni coko ena cala bibi qori? Eda na veivosakitaka na kena isau ena ulutaga tarava.

^ para. 8 Sa veisau eso na yaca ena ulutaga qo.