Raica sara na lewena

Raica na lewenivola

“Au na Lako ena Nomuni Dina”

“Au na Lako ena Nomuni Dina”

“Vakavulici au, i Jiova ena nomuni sala. Au na lako ena nomuni dina.”—SAME 86:11.

SERE: 31, 72

1-3. (a) Me vakacava noda rai me baleta na ka dina? Vakatauvatana. (Raica na imatai ni iyaloyalo.) (b) Na taro cava eda na dikeva ena ulutaga qo?

LEVU na gauna e dau vakasukai lesu na ka e voli mai. Ena so na vanua, e laurai ena vakadidike ni dau vakasukai e rauta ni 9 na pasede na iyaya e voli ena sitoa qai sivia na 30 na pasede na kena e voli ena Internet. Na vuna? Ni sega ni yacova na ivakatagedegede e namaki, e ca tu se sega ga ni taleitaki. Ena sosomitaki gona na iyaya qori se kerei me vakasukai na kena isau.

2 De dua eda na vakasuka na iyaya eda volia me soli tale mai na kena isau, ia eda na sega vakadua ni via vakasuka se “volitaka” na ka dina eda “volia” nida mai “kila” na iVolatabu. (Wilika Vosa Vakaibalebale 23:23; 1 Tim. 2:4) Me vaka eda vulica ena ulutaga sa oti, eda vakayagataka e levu na gauna meda kila kina na ka dina. Kena ikuri eda rairai vakuai keda ena cakacaka saulevu, veisau na ivakarau ni noda veimaliwai, eda veisautaka noda rai kei na itovo, eda sega tale ga ni marautaka na soqo kei na ivalavala e cata o Jiova.  Ia na veika eda vakalougatataki kina e uasivia kece na veika eda vakuai keda kina.

3 Na noda rai me baleta na ka dina e tautauvata kei na turaga e cavuta o Jisu ena dua na vosa vakatautauvata lekaleka. E talanoataka kina na dauveivoli e vaqara na mataniciva saulevu qai kunea e dua. E vakaraitaka e keri o Jisu na noda mareqeta na itukutuku ni Matanitu ni Kalou eda sa mai kila. Ni talei vua na dauveivoli na mataniciva e kunea, e “sega ni bera ni lai volitaka” na ka kece e taukena me rawa ni volia. (Maciu 13:45, 46) Eda mareqeta na ka dina eda kunea, ya na ka dina eda vulica me baleta na Matanitu ni Kalou kei na levu tale. Eda sega tale ni vakaberabera, eda yalorawarawa ga ni vakuai keda meda volia. Ke da mareqeta na ka dina, eda na sega vakadua ni “volitaka.” Ka ni rarawa ni so na tamata ni Kalou era vakawalena na ka dina era sa kila ra qai volitaka. Meda kua mada ga ni cakava qori! Me rawa nida mareqeta na ka dina, e bibi meda muria na ivakasala vakaivolatabu oya meda “muria tiko na ka dina.” (Wilika 3 Joni 2-4.) Nida muria na ka dina, ena laurai ena noda bula. Eda na vakaliuca qai bulataka. Meda dikeva mada e vica na taro qo: Na cava era “volitaka” kina eso na ka dina, ena sala cava? Eda na qaqarauni vakacava? Na cava meda cakava meda “muria tiko [ga kina] na ka dina”?

VUNA KEI NA SALA ERA “VOLITAKA” KINA ESO NA KA DINA

4. Na cava era “volitaka” kina na ka dina eso ena imatai ni senitiuri?

4 Eso ena imatai ni senitiuri era taleitaka na ka dina e vakavulica o Jisu, ia era sega ni muria tiko ga. Kena ivakaraitaki ni vakania oti e dua na ilala levu, era tomani koya sara ena tai kadua ni wasa o Kalili. Ia era qai kidroataka na ka e tukuna o Jisu: “Ke oni sega ni kania na lewe ni Luve ni tamata, moni gunuva tale ga na nona dra oni na sega ni bula.” Era sega ni kerei Jisu me vakamatatataka, ia era tarabe ra qai kaya: “E dredre me vakabauti na vosa qo, o cei ena muria?” Era mani “suka tale kina e levu nona tisaipeli, era sega tale ni qai lako vata kei koya.”—Joni 6:53-66.

5, 6. (a) Na cava era gole tani kina eso mai na ka dina? (b) E rawa vakacava ni yawaka vakamalua na ka dina e dua?

5 Ka ni rarawa ni so tale ga nikua era gole tani mai na ka dina. Eso era tarabe ni veisau na ivakamacala ni dua na tikinivolatabu, se na vuku ni ka e tukuna se cakava e dua na tacida e kilai levu. Eso tale era sega ni taleitaka nodra vakasalataki, se ra biuta na ka dina ni basika na duidui kei na dua tale na tacida. Eso era lai vakabauta na ka era tukuna na vukitani se o ira na saqata na ka eda vakabauta. Qori e vakavuna mera ‘yawaki’ Jiova kei na ivavakoso. (Iper. 3:12-14) E dodonu me dei nodra vakabauta qai nuitaki Jisu tiko ga me vakataki koya na yapositolo o Pita! Ni tarogi ratou na yapositolo o Jisu ke ratou via biuti koya tale ga, e kaya o Pita: “Turaga, me keitou qai lako tale vei cei? Na nomuni vosa ga e vosa ni bula tawamudu.”—Joni 6:67-69.

6 Eso era sega ni kidava nira sa yawaka tiko vakamalua na ka dina. O ira qori era vaka na waqa e ciri tani vakamalua mai na bati ni uciwai. E kaya na iVolatabu nira “ciri tani.” (Iper. 2:1) Era sega  ni nakita mera gole tani mai na ka dina me vaka era vakatulewataka eso. Ia era vakawalena na nodra veiwekani kei Jiova, ni toso na gauna ena rawa ni vakaleqai. Eda na qarauna vakacava na ituvaki qori?

KUA NI VOLITAKA NA KA DINA

7. Na cava meda cakava meda kua kina ni volitaka na ka dina?

7 Meda muria na ka dina, e bibi meda vakabauta qai muria na vosa kece i Jiova. E dodonu meda vakaliuca da qai bulataka na ivakavuvuli vakaivolatabu. E masuti Jiova o Tui Tevita: “Au na lako ena nomuni dina.” (Same 86:11) E sega ni lomalomarua o Tevita. Meda vakadeitaka meda muria tiko ga na ka dina e vakatakila mai na Kalou. Ke sega, eda na diva lesu na veika eda vakuai keda kina, de dua eda na temaki meda lesuva tale. Meda muria gona na ka dina eda sa mai kila. Eda sega ni rawa ni muria ga eso, eso tale me kua. E dodonu meda muria “na ka dina kece.” (Joni 16:13) Eda veivosakitaka ena vuli sa oti e lima na ka eda vakuai keda kina meda volia na ka dina. Eda na vulica qo na sala meda kua vakadua ni lesuva na veika qori.—Maciu 6:19.

8. E rawa vakacava nida ciri tani mai na ka dina ke da sega ni vakayagataka vinaka na gauna? Tukuna e dua na ivakaraitaki.

8 Gauna. E bibi meda vakayagataka vinaka noda gauna meda kua ni ciri tani mai na ka dina. Ke da sega ni qaqarauni, eda na vakayagataka e levu na gauna ena ka ni veivakamarautaki, ka eda taleitaka, Internet, se sara tivi. E sega ni ca na veika qo, ia eda rawa ni vakayagataka na gauna qori meda vuli kina vakataki keda, meda qarava tale ga eso na itavi vakayalo. Dikeva mada nona ivakaraitaki na tacida yalewa o Emma. * Ni se gone, e dau taleitaka na ose. Ena gauna ga e galala kina, ena gole sara me lai vodo ose. Toso na gauna e leqataka ni sa sivia tale na gauna e vakayagataka. E mani cakava eso na veisau me rawa ni veiraurautaka nona gauna. E uqeti koya tale ga na ivakaraitaki nei Cory Wells, dua na dauvodo ose rogo e liu. * Nikua e marautaka tiko o Emma nona vakaitavi vakalevu ena veika vakayalo kei ratou nona lewenivuvale kei ira na mataveitacini. E volekati Jiova qai lomavakacegu ni sa vakayagataka vinaka tiko nona gauna.

9. Era vakawalena vakacava eso na ka dina nira vakaliuca na rawaka vakayago?

9 Rawaka vakayago. Ke da via muria tiko ga na ka dina, e bibi meda kua ni vakaliuca na veika vakayago. Gauna eda mai kila kina na ka dina, eda digia meda vakaliuca na veika vakayalo, me ikarua ni ka na veika vakayago. Eda yalorawarawa gona ni vakuai keda ena veika vakayago meda muria na ka dina. Toso na gauna eda raica ni levu era volia na iyaya vakalivaliva vovou se so tale na ka. Eda na rairai nanuma nida sa calata tiko e dua na ka vinaka. Ke da sega ni lomavakacegu, eda na vakawalena na veika vakayalo meda sasagataka na iyau vakayago. Eda nanuma kina na ka e yacovi Timasa. E biuta nona ilesilesi ni lomana na “veika ni vuravura qo.” (2 Tim. 4:10) Na cava e biuti Paula kina? De dua e taleitaka  vakalevu na iyau, sega ni nona qaravi Jiova. Se sa sega ni via vakuai koya me tomani Paula ena veiqaravi. Ia e sega ni vakamacalataka na iVolatabu. Meda kua mada ga ni vakabulabulataka na gagadre ni rawaka vakayago ni na seavu kina noda taleitaka na ka dina.

10. Na cava meda cakava ke da via muria na ka dina?

10 iTokani kei ira na wekada. Ke da via muria tiko ga na ka dina, e bibi meda kua ni soro nida tusaqati. Nida mai muria na ka dina, e veisau na ivakarau ni noda veimaliwai kei ira na wekada kei na itokani. Eso era dokai keda, eso tale era veitusaqati. (1 Pita 4:4) Eda vinakata me vinaka noda veimaliwai kei ira noda lewenivuvale, da caka vinaka tale ga, meda kua ga ni vakawalena na ka dina nida via vakamarautaki ira. Meda saga tiko ga me vinaka noda veimaliwai. E matata na ivakasala ena 1 Korinica 15:33, eda na veivolekati ga kei ira era lomani Jiova.

11. Eda na qaqarauni vakacava meda kua ni coko ena itovo dukadukali?

11 Rai kei na itovo dukadukali. E dodonu meda savasava kece nida muria na ka dina. (Aisea 35:8; wilika 1 Pita 1:14-16.) Nida vulica na ka dina, eda cakava na veiveisau me rawa nida muria na ivakatagedegede dodonu ena iVolatabu. Eso era cakava na veisau lelevu. Eda sega ni via muria na ivakarau dukadukali ni vuravura qo ni na vakaleqa noda savasava vakayalo. Eda na qaqarauni vakacava meda kua ni coko ena itovo dukadukali? Meda vakasamataka vakatitobu na ka e vakarautaka o Jiova meda savasava kina, oya na dra talei i Luvena o Jisu Karisito. (1 Pita 1:18, 19) Meda savasava tiko ga vei Jiova, e bibi me dei ena noda vakasama kei na lomada na isoro talei i Jisu Karisito.

12, 13. (a) Na cava meda vakasamataka kina na rai i Jiova me baleta na olodei? (b) Cava eda na vakarau veivosakitaka?

12 iValavala kei na soqo e cata o Jiova. Era na rairai saga na noda lewenivuvale, o ira eda vuli vata se cakacaka vata, meda marautaka tale ga na nodra soqo. Ia eda na qarauna vakacava meda kua ni vakaitavi ena soqo kei na olodei e cata o Jiova? Meda vakasamataka tiko ga na rai i Jiova me baleta na soqo qori. Ena yaga nida dikeva na ka e dau tabaki ena noda ivola me baleta na itekitekivu ni olodei kilai levu. Nida vakasamataka vakatitobu na yavu vakaivolatabu ni noda sega ni vakaitavi ena olodei va qori, eda na nuidei nida sa muria tiko na ka “e vakadonuya na Turaga.” (Efeso 5:10) Nida nuitaki Jiova kei na ka dina ena nona Vosa, eda na sega ni “rerevaka na tamata.”—Vkai. 29:25.

13 Eda vinakata meda muria tiko ga na ka dina me tawamudu. Na cava meda cakava meda muria tiko ga kina na ka dina? Meda veivosakitaka mada e tolu na sala.

VAKADEITAKA MO MURIA NA KA DINA

14. (a) Ena yaga vakacava noda vulica tiko ga na ka dina? (b) Na cava e bibi kina na vuku, ivakavuvuli, kei na yalomatua?

14 Kena imatai, meda vulica tiko ga na ka dina ena Vosa ni Kalou qai vakasamataka vakatitobu. Me tiko na gauna meda dau vuli kina vakataki keda. O na mareqeta kina vakalevu  na ka dina qai sega vakadua ni via volitaka. Me ikuri ni noda volia na ka dina, e tukuni ena Vosa Vakaibalebale 23:23 meda volia tale ga na “vuku, na ivakavuvuli, kei na yalomatua.” E sega ni veirauti ga na kilaka, e bibi meda bulataka sara na ka dina eda vulica. Nida yalomatua, eda na kila na veisemati ni ka kece e vakavulici keda kina o Jiova. Na vuku ena uqeti keda meda muria na ka eda kila. Ena so na gauna, na ka dina ena vakavulici keda ena ka meda vakavinakataka. Meda muria tiko ga na veidusimaki qori ni na yaga sara vakalevu ni vakatauvatani kei na siliva.—Vkai. 8:10.

15. Ena taqomaki keda vakacava na ivau ni ka dina?

15 Kena ikarua, mo vakadeitaka mo bulataka na ka dina ena veisiga. Me ivau ni tolomu na ka dina. (Efeso 6:14) Ena gauna vakaivolatabu, na ivau se beleti ni sotia e taqomaka na tolodra kei na nodra gacagaca e loma. Me yaga na ivau qori, ena vinakati me vakadre vinaka. Ke sega, ena sega ni taqomaki na sotia. Sala cava e vaka kina na ivau qori na ka dina? Nida dei tiko ga ena ka dina vakaivolatabu, ena taqomaki keda mai na rai cala, da qai vakatulewa vakayalomatua. Ke da temaki se vakatovolei, na ka dina ena uqeti keda meda cakava na ka e dodonu. E bibi me tokara tiko na sotia na ivau ni tolona ni gole ena ivalu, meda vakadeitaka tale ga meda kua vakadua ni biuta na ka dina, meda bulataka tiko ga. E yaga tale ga na ivau ni tolodra na sotia ni dau lili kina na nodra iseleiwau. Meda raica mada na sala eda cakava kina qori meda muria tiko ga kina na ka dina.

16. E yaga vakacava noda vakavulica na ka dina?

16 Kena ikatolu, meda gumatua ni vakavulici ira e levu ena ka dina. Eda na taura dei kina na noda iseleiwau vakayalo, ya na “vosa ni Kalou.” (Efeso 6:17) Eda rawa ni vakavinakataka noda veivakavulici meda wasea kina “vakadodonu na ivakavuvuli dina.” (2 Tim. 2:15) Nida vukea eso tale mera volia na ka dina ra qai cata na lasu, ena dei tale ga e lomada kei na noda vakasama na vosa ni Kalou. Eda na vakadeitaka meda muria tiko ga na ka dina.

17. Na cava o mareqeta kina na ka dina?

17 Na ka dina e isolisoli talei i Jiova. Eda mai veiwekani voleka kina kei na Tamada vakalomalagi, qori na noda iyau mareqeti duadua. Levu na ka sa vakavulici keda kina o Jiova, ia se kena itekitekivu ga! E yalataka ni na vakavulici keda tiko ga me tawamudu. Mo mareqeta gona na ka dina me vaka na mataniciva talei. Mo volia tiko ga “na ka dina mo kua ni volitaka.” O na dina kina ena nomu yalayala vei Jiova me vakataki Tevita: “Au na lako ena nomuni dina.”—Same 86:11.

^ para. 8 Sa veisau na yaca.

^ para. 8 Rai ena JW Broadcasting ena iwasewase INTERVIEWS AND EXPERIENCES > TRUTH TRANSFORMS LIVES.