KA E KAYA NA IVOLATABU

Ni laurai ena vuravura qori ni tiko na kena “gagadre” qai cata na Kalou, e macala kina ni sega ni vakaibalebaletaki tiko ina vuravura qele. Ia e dusi ira na kawatamata era sega ni vakarorogo vua na Kalou, era kena meca. (Jemesa 4:4) Era na “lewai mera rusa tawamudu.” (2 Cesalonaika 1:7-9) O ira ga na talairawarawa vei Jisu Karisito nira “sega ni vakavuravura” era na rawata na bula tawamudu.—Joni 15:19.

E kaya kina na 1 Joni 2:17: O “koya e cakava na loma ni Kalou ena tu ga me sega ni mudu.” Ena rawa kina ni nuitaka na bula tawamudu ena vuravura qo, me vaka e kaya na Same 37:29: “O ira na yalododonu era na taukena na vuravura, era na qai bula tawamudu kina.”

“Ni kua ni lomani vuravura se na ka e tu e vuravura. O koya e lomani vuravura, ena sega ni lomani koya o Tamada.”—1 Joni 2:15.

KA E KAYA NA IVOLATABU

E wase vakarua na ka ena yaco. Kena imatai, ena vakarusa na Kalou na lotu lasu, e vakatokai me o “Papiloni na Ka Levu,” e vakatauvatani tiko kei na dua na yalewa saqamua. (Vakatakila 17:1-5; 18:8) E kaya na saqamua qo ni yalodina vua na Kalou, ia e dau tokoni ira na iliuliu vakapolitiki e vuravura. O ira sara ga na iliuliu qori era na qai vakarusai koya tale. “Era na cata na saqamua, era na ravuti koya, era na vakaluvawaletaki koya, era na kania na lewena, ra qai vakamai koya vakadua ena bukawaqa.”—Vakatakila 17:16.

Oti ena qai golevi ira na iliuliu vakapolitiki na Kalou—o “ira na tui kei vuravura.” Era na rusa kei ira na tamata ca ena “ivalu ni siga levu ni Kalou Kaukaua Duadua,” e vakatokai tale ga me o “Amaketoni.”—Vakatakila 16:14, 16.

“Moni vakasaqarai Jiova, o kemuni kece na yalomalumalumu e vuravura . . . Moni vakasaqara na yalododonu, moni vakasaqara na yalomalumalumu. De oni na vuni kina ena siga ni cudru i Jiova.”—Sefanaia 2:3.

KA E KAYA NA IVOLATABU

Ena yaco na icavacava ena gauna era sa vakaroti oti kina e levu me baleta na Matanitu ni Kalou—na matanitu qori ena sosomitaka na veiliutaki vakatamata. (Taniela 7:13, 14) E kaya o Jisu Karisito: “Ena vunautaki mada na itukutuku vinaka qo ni Matanitu ni Kalou ena veiyasa i vuravura me ivakadinadina ina veimatanitu kece, sa na qai yaco na icavacava.” (Maciu 24:14) Na cakacaka vakavunau qori ena vakavotui kina na lewadodonu kei na loloma ni Kalou, e tiki tale ga ni “ivakatakilakila” e dusia tiko na icavacava. Era okati tale ga ena ivakatakilakila na ivalu e vuravura, uneune, dausiga kei na tauvimate.—Maciu 24:3; Luke 21:10, 11.

E tukuni ena iVolatabu na ituvaki ena yaco ena “iotioti ni veisiga,” e vakamacalataka tale ga na nodra itovo e levu. E tukuni kina: “Ena vakilai kina e levu na ka dredre. Nira na dau lomani ira ga na tamata, era na lomana na ilavo, . . . era na talaidredre vei ira nodra itubutubu, . . . era na sega ni lewa vinaka na yalodra, era na voravora, era na sega ni vinakata na ka e dodonu, . . .  era na lomana ga na marau era sega ni lomana na Kalou.” *—2 Timoci 3:1-5.

Na veika kece qori e yaco ni voleka na iMatai ni iValu Levu ena 1914. Me tekivu mai na yabaki qori sa kacivaki na Matanitu ni Kalou ena veiyasa i vuravura. E itavi dokai gona vei ira na iVakadinadina i Jiova nodra vakacolati ena ilesilesi qori. Na ivola sara mada ga era veisoliyaka tiko e kena usutu Na Vale ni Vakatawa Kacivaka na Matanitu i Jiova.

“Mo dou yadra tiko gona, ni dou sega ni kila na kena siga se na kena aua.”—Maciu 25:13.