Raica sara na lewena

Raica na lewenivola

Lalaga kei Itchan Kala e Khiva

 VANUA KEI NA LEWENA

Veisiko i Uzbekistan

Veisiko i Uzbekistan

TRANSOXIANA. Qo na Yasayasa ena Tadrua ni Uciwai. O Tartary kei Turkistan. E levu na yaca e vakatokai kina na yasayasa sa kilai tu nikua me o Uzbekistan, qo na nodra “Vanua na lewe i Uzbek.” Mai na ika15 ni senitiuri era dau yaga vakalevu na siti e Uzbekistan nira veilakoyaki kina na dauveivoli ena gaunisala na Silk Road, qo na isotasota ni gaunisala levu a semati Jaina tu kei na Mediterranean ena dua na gauna. Nikua e volitaki vakalevu e Uzbek na isulu era caka mai na vauvau. Era volitaki tale tu ga kina na ibutubutu totoka era caka ena vauvau, kula, se silika.

Era uqeta e levu era bula ena veigauna sa sivi na ivakarau ni bula e Uzbek. Era taubaletaka na veikau kei na vanua dravuisiga kei Uzbekistan e levu na tamata rogo era dau vuaviri kei ira na nodra mataivalu kaukaua. E wili tiko kina o Alekisada na Ka Levu, e sotavi Roxane na nona daulomani ena vanua qori; o Genghis Khan mai Mongolia; kei Timur (e kilai tale ga me o Tamerlane), e kawa itaukei ena vanua qo qai lewa tu e dua na iwase levu ni vanua ena gauna makawa.

iSulu ni vanua

Dua na ka e kilai kina o Uzbekistan ena gauna qo oya na totoka ni roka karakarawa ni kena delavuvu ni vale, era ivakananumi. E levu ga sa vakayagataki tu me koronivuli.

 Gaunisala na Silk Road. A vakayagataki tu na gaunisala qo ena gauna makawa sara, me yacova ni kune na sala me takosovi kina na wasawasa me yaco sara e Idia ena icavacava ni ika15 ni senitiuri G.V. E dau muri na gaunisala qo me caka kina na veivoli, qai dua na kena iwase e takosovi kina na vanua sa kilai tu nikua me o Uzbekistan. E isotasota sara tiko ga ni nodra vanua ni veivoli e levu.

Kena caka na ibutubutu silika

Wasawasa na Aral Sea. Qo na ikava ni drano levu duadua e vuravura ena dua na gauna, ia sa yali tiko yani vakamalua ena vuku ni kena vakadrodroi tani me vakasuasuataki kina na qele. E saga tiko o Uzbekistan me vakavinakataka na leqa qo, ra qai veitokoni kina na veimatanitu mai na Lomadonu kei Esia.

Veiveisau ni matuavosa e Uzbekistan. E levu na vosa era vakayagataki ena vanua qo. Na gauna era vuaviri kina na Musilimi ena ikawalu ni senitiuri, sa muri na vosa vakaArapea. Ia na gauna e to kina na vanua qo kei na matanitu makawa na Soviet Union, a vakayagataki taumada na matuavosa vakaLatina. E qai veisau tale ena icavacava ni veiyabaki ni 1930 ni muria na matuavosa vakaCyrillic, e vakayagataki ena so na vanua e Urope. A vakadonui ena 1993 e dua na lawa vou me vakayagataki kina na matuavosa ni Uzbek, e yavutaki ga ena matanivola vakaLatina.

Vuanikau mamaca era volitaki tu ena makete