Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 NA RAI NI IVOLATABU

E ivakaraitaki vinaka ni yalorawarawa o Jisu, e sega ni mai veilewaitaka e dua, e mai veivakabulai ga vakayalo

Yalorawarawa

Yalorawarawa

Ena vinaka na bula veimaliwai ke da dau veiciqomi, veivosoti, eda yalorawarawa tale ga. Ia vakacava e dodonu me vakaiyalayala noda dau yalorawarawa?

Cava meda cakava meda dau yalorawarawa kina vakalevu?

KA E YACO TU NIKUA

E levu nikua era sega ni dau yalorawarawa ni uqeti ira tu na veivakaduiduitaki vakamatatamata, vakamatanitu, vakayavusa kei na veileqaleqati vakalotu.

KA E KAYA NA IVOLATABU

Ni cakacaka tiko vakaitalatala o Jisu Karisito e raica nodra sega ni dau yalorawarawa e levu. Era dau veicati na Jiu kei ira na kai Samaria. (Joni 4:9) Era dau beci na yalewa. O ira mada ga na iliuliu ni lotu Jiu era dau cudruvi ira na tauvanua. (Joni 7:49) Ia e duidui sara o Jisu Karisito. Era kaya na saqati koya: “O ka qo e taleitaki ira ga na ivalavala ca, e kanavata kei ira.” (Luke 15:2) E kilaitani o Jisu ni dau yalovinaka, dau vosovoso, e yalorawarawa tale ga baleta ni sega ni mai veilewaitaka e dua, e mai veivakabulai ga vakayalo. E uqeti koya vakalevu na nona loloma.—Joni 3:17; 13:34.

Na loloma sara ga ena uqeti keda meda yalorawarawa ni torovi ira kina eso tale, dina nira sega ni uasivi, tu tale ga na ka era duidui kina. E kaya na Kolosa 3:13: “Moni dau yalorawarawa, ni dau veivosoti tale ga vakarawarawa ke dua e didivaka e dua na ka vua e dua tale.”

“E bibi duadua moni dau veilomani vakalevu, ni ubia e levu na ivalavala ca na loloma.”1 Pita 4:8.

 Cava me vakaiyalayala kina noda dau yalorawarawa?

KA E YACO TU

E levu na vanua era dau saga me muri na lawa kei na ivakaro. E dau vakaiyalayala gona eso na ka era vakatara me caka.

KA E KAYA NA IVOLATABU

“[Na loloma] e sega ni cakava na ka e sega ni rakorako.” (1 Korinica 13:5) E ivakaraitaki vinaka ni yalorawarawa o Jisu, ia e sega ni taleitaka na ivalavala velavela, veivakaisini se so tale na ka ca. E vakaraitaka ga vakadodonu ni cata na ivalavala qori. (Maciu 23:13) E kaya: “O koya e ca na nona ivalavala e cata na rarama.”—Joni 3:20.

E vola na yapositolo lotu vaKarisito o Paula: “Moni cata sara na ka ca, ni kabita na ka vinaka.” (Roma 12:9) E bulataka sara ga na vosa qori o koya. Kena ivakaraitaki, na gauna era tawasei ira kina eso na Jiu lotu vaKarisito vei ira na sega ni Jiu, e doudou ni vosa vei ira o Paula ia e vosa vakayalovinaka, ni Jiu tale ga. (Kalatia 2:11-14) E kila ni “sega ni dau veivakaduiduitaki” na Kalou, ena sega gona ni vinakata me laurai na itovo qori vei ira na nona dauveiqaravi.—Cakacaka 10:34.

Nira lotu vaKarisito na iVakadinadina i Jiova, era dau rai ga ena iVolatabu me dusimaki ira ena veika e vauca na itovo. (Aisea 33:22) Era sega gona ni taleitaka na veika ca era cakava na tiko maliwai ira. E sega ni vinakati mera vakadukadukalitaka na ivavakoso savasava vaKarisito o ira na sega ni muria na ivakatagedegede ni Kalou. Era talairawarawa gona na iVakadinadina ena ivakaro matata vakaivolatabu qo: “Biuta tani na daucaka ca qori mai na kemuni maliwa.”—1 Korinica 5:11-13.

“O kemuni na lomani Jiova, ni cata na ka ca.”Same 97:10.

Ena vakalaiva tiko ga na Kalou na veika ca?

KA ERA NANUMA E LEVU

Nida tamata ga, eda na dau caka ca tiko ga.

KA E KAYA NA IVOLATABU

E masu vua na Kalou o Jiova na parofita o Apakuki: “Na cava oni vakatara kina na veivakasaurarataki? Na cava e yaco tiko kina na veivakarusai kei na ivalavala voravora e mataqu? Na cava e levu kina na veiba kei na veivala?” (Apakuki 1:3) E sega ni vinakata na Kalou me veilecayaki nona parofita, mani vakadeitaka vua nira na lewai na dau caka ca. E kaya na Kalou me baleta na yalayala qori: “Ena yaco dina. Ena sega ni bera!”—Apakuki 2:3.

Ia na gauna qo era se rawa ni biuta nodra itovo ca e levu. “‘Vakacava, au taleitaka me mate na tamata ca?’ e kaya na Turaga Cecere Duadua o Jiova. ‘Au vinakata me saumaki mai na nona ivalavala me bula tiko kina.’” (Isikeli 18:23) Era rawa ni rai vakanamata ena nuidei ena veigauna se bera mai o ira na biuta nodra itovo ca ra qai vakasaqarai Jiova. E kaya na Vosa Vakaibalebale 1:33: “O koya e vakarorogo vei au ena tikovinaka, ena vakacegu ni sega ni rerevaka na ka ca.”

“Malua mada vakalailai, sa na sega vakadua na daucaka ca . . . Era na taukena na vuravura na yalomalumalumu, era na kunea na marau vakasakiti ena levu ni vakacegu.”​Same 37:10, 11.