Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 IVAKASALA INA VUVALE | VAKAWATI

Veimaliwai Vakaveivugoni

Veimaliwai Vakaveivugoni

ITUVAKI DREDRE

“Gauna e drakidrakita kina na neirau bula vakawati, lai tukutuku sara o watiqu vei nei kei momo. E vakasalataki au kina o momo. Au sega sara ga ni taleitaka!”—Jemesa. *

“Dau kaya o noqu nei, ‘Dua na ka noqu dau vakananumi noqu cauravou!’ Wewenigusuna voli ga nodrau veivolekati, au lai nanuma kina ni noqu vakawatitaki koya e vakavuna me va qori na nona rai!”—Nina.

E rawa ni taqomaki na bula vakawati nira sega ni veiriti na veivugoni?

KA MO KILA

Tauyavu na vuvale vou ena vakawati. E kaya na iVolatabu ni o tagane vakawati ‘ena biuti tamana kei tinana me kabiti watina.’ Qori tale ga na ka ena cakava o yalewa vakawati vei rau nona itubutubu, me kabiti watina. E kaya na iVolatabu ni gauna e vakawati kina o yalewa rau sa na “dua ga na yago” kei tagane. Rau sa dua na vuvale vou.Maciu 19:5.

Vakaliuca nomu vakawati, sega ni o rau nomu itubutubu. E vola o John M. Gottman, e dau veivakasalataki ena bula vakawati, “bibi ena bula vakawati me tiko kina na vakasama ni rau sa na cakava vata na ka na veiwatini. Nomu tauyavutaka e dua na bula vakawati se nomu saga tale mo drau veiwekani voleka kei watimu, sa na lailai nomu kabiti ratou mai vale.” *

Sega ni rawarawa vei ira eso na itubutubu. Tukuna e dua na tagane a vakawati gone: “Dau vakaliuci rau nona itubutubu o watiqu ni bera neirau vakawati. Oti ga neirau vakawati, raica o tinana ni sa veisau. Sega ni rawarawa vua qori.”

Ra vakila tale ga qori eso na veiwatini vou. E kaya o Jemesa, a tukuni taumada: “O sega ni rawa ni digi rau na vugomu me vaka nomu digi ira nomu itokani. E vaka ga nona tukuna vei iko e dua, ‘O koya ga qo me sa na nomu itokani vou.’ Ke rau vakaninivaki mada ga, sega ni dua na ka e caka rawa kina ni sa mai sema na veiwekani!”

 KA O RAWA NI CAKAVA

Ke drau dau veiletitaka vakaveiwatini na veika me baleti rau nomudrau dui itubutubu, saga mo drau walia vata ena veiyaloni. Drau muria na ivakasala vakaivolatabu mo drau “qara na veivinakati, ka muria sara.”Same 34:14.

Ena veivuke na vica na ituvaki qo. E vakavotui kina na ka e dau yaco vei ira na veiwatini. Na ivakavuvuli tale ga e vakamacalataki kina e rawa ni walia na leqa ni veimaliwai vakaveivugoni.

Diva o yalewa me rau veimaliwai vinaka o tinana kei watina. Ia raica o tagane ni dredre sara ga qori.

Tovolea qo: Drau veivosakitaka vakaveiwatini, tu vakarau mo vakuai iko. Me bibi tiko vei iko na rai i watimu, o yalataka mo lomana, sega ni rai i vugomu. Saga mo vakasamataka e dua se rua na sala mo vakavinakataka kina nomu veiwekani kei tinana, muria sara qori. Ni raica o watimu na nomu sasaga ena dokai iko vakalevu.—iVakavuvuli vakaivolatabu: 1 Korinica 10:24.

Tukuna o tagane ni o yalewa e dau vakamarautaki rau ga vakalevu na nona itubutubu, e vakawaleni koya.

Tovolea qo: Drau veivosakitaka na leqa qori, saga mo biuti iko ena kena ituvaki. Sega ni dodonu me lomaleqa o watimu ni raica nomu vakaraitaka vei rau na nomu itubutubu ni o dokai rau. (Vosa Vakaibalebale 23:22) Ia ena vinakati mo vakadeitaka vua ena ka o tukuna kei na ka o cakava ni o dau kauaitaki koya vakalevu. Ke nuidei o watimu ena sega kina ni qati rau nomu itubutubu me nanuma ni o kauaitaki rau tiko ga vakalevu.—iVakavuvuli vakaivolatabu: Efeso 5:33.

Raica o tagane ni o watina e dau kerea vakalevu nodrau ivakasala nona itubutubu.

Tovolea qo: Me vosa o tagane vei watina, tukuna vua ni tiko na iyalayala ni ka e rawa ni cakava. Ena vinaka me dau yalorawarawa. Vakacava, me sa kua sara ga ni kerei nodrau ivakasala na itubutubu? Ke mani kerei, gauna cava ena veiganiti kina? Ke drau lomavata ena so na gauna me kerei nodrau ivakasala na nomudrau dui itubutubu, ena sega ni dua na kena leqa.—iVakavuvuli vakaivolatabu: Filipai 4:5.

^ para. 4 Veisau na yaca ena ulutaga qo.

^ para. 9 iVola The Seven Principles for Making Marriage Work.