Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 ULUTAGA LEVU

Bula Dina Tiko na Kalou? Bibi me Kilai?

Bula Dina Tiko na Kalou? Bibi me Kilai?

Nira tarogi e levu ke bula dina tiko na Kalou, era sega ni sauma rawa se ra kauai ena taro qori. Kaya o Hervé, e susu mai Varanise: “E sega noqu vakabauta. Vinaka cake meu vakayagataka ga noqu vakasama. Sega tale ni vinakati kina meu vakabauta na Kalou.”

So tale era vakataki John mai Merika. E kaya: “Rau sega ni vakabauta na Kalou na noqu itubutubu. Niu tubu cake tiko, sega ni dua tu noqu rai me baleta na Kalou. Ia au dau vaqaqa ena so na gauna ke bula dina tiko.”

Bau dau vaqaqa tale ga ke bula dina tiko na Kalou? Ke bula tiko, e vakainaki kina na noda bula? De so na ivakadinadina o raica e dredre me vakamacalataki se ra bula rawa tu vakacava ke sega ni dua e buli ira. So na ivakadinadina qori e okati kina noda sega ni vu mai na ka mate, se na ka e kune ena vakadidike vakasaenisi me baleta na vakasakiti ni veika buli me veiraurau kina na bula ena noda vuravura.—Raica na kato “ Dikeva na iVakadinadina.”

Vakasamataka mada na bibi ni veika e tukuni qori e cake. Era vaka na idusidusi ina vanua mo kunea kina na iyau. Levu sara na ka o na kila ke tiko na ivakadinadina e veivakadeitaki me baleta nona bula dina tiko na Kalou kei na so na itukutuku nuitaki me baleti koya. Qo e va na kena ivakaraitaki.

 1. INAKI NI BULA

Ke vakainaki na bula, eda na via kila se inaki cava qori, cava tale ga meda cakava. Ke bula dina tiko na Kalou da qai sega tu ni kila, eda sa lecava tiko na veika bibi duadua e lomalagi kei vuravura.

E kaya na iVolatabu ni bulia na ka kece na Kalou. (Vakatakila 4:11) E vakainaki vakacava noda bula nida kila qori? Vakasamataka mada na ka e tukuna na iVolatabu.

Eda duatani duadua vei ira kece na ibulibuli e vuravura. Tukuni ena iVolatabu ni buli keda na Kalou meda ucui koya, meda itovo vata kei koya. (Vakatekivu 1:27) Vakavulica tale ga na iVolatabu nida rawa ni veitokani kei na Kalou. (Jemesa 2:23) Vakainaki vakalevu na bula nida veiwekani kei koya na Dauveibuli.

Cava na ibalebale ni noda veitokani kei na Kalou? Era rawa ni vosa vua na Kalou na nona itokani. E yalataka tale ga o koya ni na rogoci ira, ena cakava na ka ena vukudra. (Same 91:15) Nida nona itokani, eda na rawa ni kila na nona rai me baleta e levu na ka. Eda na kila vinaka kina eso na taro bibi e vauca na noda bula.

Ke bula dina tiko na Kalou da qai sega tu ni kila, eda sa lecava tiko na veika bibi duadua e lomalagi kei vuravura

2. LOMAVAKACEGU

So e dredre nodra vakabauta ni bula dina tiko na Kalou nira raica e levu na ka rarawa e vuravura. Era lomatarotarotaka, ‘Cava e vakatara tu kina na veika rarawa kei na veika ca na Dauveibuli kaukaua duadua?’

Veivakacegui na iVolatabu ni vakamacalataka ni a sega ni inaki taumada ni Kalou meda rarawa tiko. Rau a sega ni vakila na imatai ni nona ibulibuli na rarawa. Sega mada ga ni nona inaki meda mate. (Vakatekivu 2:7-9, 15-17) Vakacava e dredre mo vakabauta qori? E ka ga ni tadra? Sega. Ke bula dina tiko e dua na Kalou kaukaua duadua qai kena idivi na loloma, qori tale ga na bula ena vakarautaka vei keda.

Cava ga e mai va tu kina qo noda bula? Vakamacalataka na iVolatabu ni gauna e buli keda kina na Kalou, e solia vei keda na galala ni vakatulewa. Eda sega ni vaka na matakau livaliva e porokaramutaki meda vakasaurarataki meda talairawarawa vua. Rau digia ga o rau na tubuda, o rau na imatai ni veiwatini me rau talaidredre ina nona veidusimaki na Kalou. Rau nanumi rau ga. (Vakatekivu 3:1-6, 22-24) Mai keda wale na isamunidawa.

Eda lomavakacegu nida kila ni sega ni inaki taumada ni Kalou meda rarawa tiko. Qori sara ga na ka eda vinakata me vakaoti. Eda vinakata tale ga me tiko na noda inuinui me baleta na veisiga nimataka.

 3. INUINUI

Ni oti ga nodrau talaidredre na imatai ni veiwatini, e yalataka sara na Kalou ni na vakayacora tale nona inaki taumada me baleta na vuravura ena dua na gauna lokuci. Ena sega ni dua na ka e vakalatilati ni kaukaua duadua ga o koya. (Aisea 55:11) Sa voleka sara qo ni vakaotia na Kalou na veika ca e vakavuna na noda talaidredre vua, sa na qai vakayacori tale kina na nona inaki taumada me baleti keda kei na vuravura.

Yaga vakacava qo vei iko? Levu na ka e yalataka tu na Kalou ena iVolatabu me baleta na veisiga nimataka, ia vakasamataka mada qo e rua.

  • SAUTU O VURAVURA, RUSA NA DAU CAKA CA. “Malua mada vakalailai, ena qai takali na tamata ca; io, ko na vakananuma na nona yasana, ia sa na yali kina ko koya. Ia ko ira na yalomalumalumu era na taukena na vanua; ka na daumarau tiko e na veivakacegui vakaidina.”—Same 37:10, 11.

  • OTI VAKADUA NA TAUVIMATE KEI NA MATE. “Na lewe ni koro ena sega ni kaya, Ka’u sa tauvi mate.” (Aisea 33:24) “Ena vakaotia sara na mate ko koya; ia na Turaga ko Jiova ena tavoya na wai ni mata mai na matadra na tamata kecega.” —Aisea 25:8.

Cava eda rawa ni nuitaka kina na yalayala ni Kalou qori ena iVolatabu? Ni levu tale na parofisai era volai tu kina era sa vakayacori oti. Ia na inuinui ni bula marau qori e sega ni vakaotia na veika dredre eda se donumaka tu ena gauna qo. iVukevuke cava tale e vakarautaka tu na Kalou?

4. IDUSIDUSI BALETA NODA LEQA KEI NA VAKATULEWA

Vakarautaka na Kalou na idusidusi meda vosota kina noda leqa kei na sala meda vakatulewa vinaka kina. Levu na vakatulewa era sega so ni bibi, ia so tale ena qai vakilai tu ena dua na gauna balavu. Sega tale ni dua e rawa ni vakarautaka na ivakasala vuku me vakataki koya na Dauveibuli. E sega ni vakaiyalayala na ka e rawata, o koya tale ga e iVurevure ni bula. E kila vinaka na veika e ganiti keda.

Era vutucoqa ena iVolatabu na rai ni Kalou o Jiova, ni a uqeta e vica mera vola. E volai kina na itukutuku qo: “Koi au ko Jiova na nomu Kalou, ka’u sa vakavulici iko mo vinaka kina, ka’u sa tuberi iko e na sala mo lakova.”—Aisea 48:17, 18.

Sega ni vakaiyalayala na kaukaua ni Kalou, e tu vakarau tale ga me vakayagataka ena vukuda. Vakamacalataka na iVolatabu ni via vukei keda na Kalou ni tama dauloloma. E kaya: “Na Tamada mai lomalagi [ena] solia na yalo tabu vei ira era kerea vua!” (Luke 11:13) Rawa ni dusimaki keda na kaukaua ni Kalou, e vakaukauataki keda tale ga.

Cava mo cakava me vukei iko kina na Kalou? Eda dusimaki ena iVolatabu: “O koya e torova na Kalou e dodonu me vakabauta ni bula dina tiko o koya, ni na vakaicovitaki ira tale ga era vakasaqarai koya ena yalogu.” (Iperiu 11:6) Ke o via vakadeitaka ni bula dina tiko na Kalou, dodonu mo dikeva sara ga na kena ivakadinadina.

 O NA VAKEKELI KINA?

E taura na gauna mo saga mo kila na veika dina me baleta na Kalou, ia ena yaga vakalevu. Vakasamataki Xiujin Xiao mada. A sucu mai Jaina, sa tiko qo i Merika. E kaya: “Au vakabauta na bula vakaidewadewa, ia au via kila na lewe ni iVolatabu. Au mani vuli iVolatabu kei ira na iVakadinadina i Jiova. Sega ga noqu gauna ni vuli kei ira ni sa iotioti tiko ni yabaki ni noqu vuli torocake au qai osooso vakalevu. Au sega ni marau. Ia niu tomana tale noqu vuli iVolatabu, dua na ka noqu marau.”

O via vulica e levu tale na ka me baleta na Dauveibuli, na Kalou o Jiova? Vakacava mo vakekeli kina?