Raica sara na lewena

Raica na lewenivola

iVakaruru na Vuku

iVakaruru na Vuku

“Na ivoli ni bula ni tamata na iyau, ia o ira na dravudravua era sega ni vakarerei.”​—VOSA VAKAIBALEBALE 13:8, NW.

TIKO na yaga ni noda vakaiyau, ia e dau salavata mai kei na so na leqa, vakauasivi na ituvaki rerevaki eda bula donuya tu qo. (2 Timoci 3:1-5) So na vanua dau nodra inakinaki sara ga na daubutako kei ira na dau vesu tamata mera vaqarai ira na vutuniyau, okati kina o ira na dausaravanua era raici tu mera vakaiyau. Qo mera butakoci se vesu me qai dua na kedra ivoli ni sereki.

Tukuni ena itukutuku ni dua na vanua e se vakatorocaketaki tiko: “Na butako e vakayagataki kina na ivalavala voravora, na veidabui, kei na vesu tamata era veimecaki kina na vutuniyau kei ira na dravudravua. Laurai e valenikana na yadra era vakaiyaragi. Nodra vale tale ga na vutuniyau e vakabai votovotoa, vakacina ramase, itaba e katona na veitosoyaki ni ka, qai yadravi tu.” Levu na vanua sa caka tu kina qori.

Ia e kaya na iVolatabu ni “o ira na dravudravua era sega ni vakarerei.” Yaga vakacava vei iko na ivakasala vuku qori? Ke o tiko ena dua na itikotiko e dau yaco kina vakalevu na basulawa kei na ivalavala voravora, kua ni cakava na ka mera nanuma ni o vutuniyau. Vakasamataka vinaka na isulu mo tokara se ka mo kauta, vakabibi ke laurai levu tu. “O koya sa yalomatua sa [“raica,” NW] na ca,” e kaya na Vosa Vakaibalebale 22:3: “Ia ko ira sa sega ni vuku era sa lako tu yani, a ra sa kunea na rarawa.”

Na ivakasala vuku era volai tu ena iVolatabu e vakavotui kina nona kauaitaki keda na Dauveibuli, e vinakata meda taqomaki. E “[i]vakaruru” na mataqali “vuku” va qori e kaya na Dauvunau 7:12, e “vu ni bula vei ira na kenai taukei.”