Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 IVAKASALA INA VUVALE | ITABAGONE

iWali ni Cudru

iWali ni Cudru

ITUVAKI DREDRE

“Au kailavaki tuakaqu, au biliga vakaukaua na katuba, qai basuka yani na lalaga na kena ivakadre ena daku ni katuba. Na vanua e kabasu qori e dau ivakananumi ni noqu ivukivuki vakayalowai ena siga ya.” —Taina. *

“Au kailavaka, ‘o Tama ca!’ au qai sogota vakaukaua na katuba. Ia niu bera ni sogota, au raica votu nona rarawa, au qai veivutunitaka sara ga na ka au kaya.”—Loraini.

O sa bau cakava oti na ivakaraitaki e rua qori? Ke vaka kina, ena yaga vei iko na ulutaga qo.

KA MO KILA

Na cudru ena sega ni vinaka kina na kemu irogorogo. E kaya e dua na yalewa o Bale, sa yabaki 21 tiko ena gauna qo: “Au nanuma ni noqu ivakarau ga ni bula meu dau cudru, mera kua ni kurabui kina na kena vo. Au raica nira vaka na irairai ni yalowai o ira na sega ni lewai ira vakamatau, au lai vakasamataka gona ni va sara tu ga qori na kequ irairai vei ira tale eso!”

E kaya na iVolatabu: “O koya sa daucudru vakatotolo sa na cakacaka vakalialia.”—Vosa Vakaibalebale 14:17.

Me vaka ga nodra dro eso ni kacabote e dua na ulunivanua, qori tale ga na ka ena yaco ni o sega ni lewa matau nomu cudru

Nomu dau cudru o na yawaki kina. E kaya o Taniela, e yabaki 18: “Ni o cudru, o na sega ni dokai se rokovi.” E duavata kina o Eleni, e yabaki 18 tale ga: “Sega ni dau taleitaki o koya e dau cudrucudru. E dau rerevaki.”

E kaya na iVolatabu: “Mo kakua ni veiwekani kei na tamata daucudru; kakua talega ni ko lako vata kaya na tamata yalodauveikata.”—Vosa Vakaibalebale 22:24.

O rawa ni veisau. E kaya o Sera e yabaki 15: “So na ka e yacovi iko o na sega ni lewa rawa, ia o rawa ni lewa matau na ka o cakava. Sega ni vinakati me tuburi iko na cudru.”

E kaya na iVolatabu: “Sa vinaka cake ko koya sa berabera ni cudru ka ca na tamata qaqa; ko koya talega sa lewa na yalona vei koya sa kaba e dua na koro.”Vosa Vakaibalebale 16:32.

 KA O RAWA NI CAKAVA

Dua nomu isausau. Kua ni tukuna tiko ga “qori na ivakarau ni noqu bula,” saga mo biuta e dua na gauna mo veisau kina, de dua me ono na vula. Vola toka na ka o rawata ena gauna qori. Na veigauna o cudru kina vola (1) na ka e yaco, (2) ka o cakava, kei na (3) nomu a rawa ni cakava e dua tale na ka e vinaka cake, kei na vuna. Oti qai saga mo muria qori ni o vakacudrui. Vakatutu: Vola na gauna o sega ni cudru kina kei na ka o marautaka ni o lewai iko matau.—iVakavuvuli vakaivolatabu: Kolosa 3:8.

Kua ni cudru totolo. Ni dua e vakacudrui iko, kua ni totolo mo tukuna na imatai ni ka o nanuma. Wawa mada. De ka vakayalomatua mo cegu vakavinaka. Kaya o Eroni e yabaki 15: “Gauna au cegu kina vakavinaka, au dau vakasama meu kua ni tukuna se cakava e dua na ka au na veivutunitaka.”—iVakavuvuli vakaivolatabu: Vosa Vakaibalebale 21:23.

Kua ni qiqo nomu rai. So na gauna o na rairai cudru ni qiqo nomu rai, o kauaitaka tiko ga nomu rai. Ena vinaka mo kauaitaka tale ga na nodra rai eso tale. E kaya e dua na goneyalewa o Joana: “Nira veibeci mada ga eso, ena tiko na vuna, ena yaga gona meu kauaitaka.”—iVakavuvuli vakaivolatabu: Vosa Vakaibalebale 19:11.

Ke veiganiti, biubiu. E kaya na iVolatabu: “Ni bera ni tubu na veiba mo biubiu.” (Vosa Vakaibalebale 17:14NW) Matata ena tikina qori ni so na gauna e dau vinaka meda biubiu ni bera ni yaco na cudru. Kua ni vakasamataka tiko ga na ka e vakacudrui iko mo cudru tale kina vakalevu, cakava eso tale na ka. “Na vakaukauayago e iwali ni noqu lomaocaoca, vukei au tale ga meu kua ni dau cudrucudru,” e kaya e dua na goneyalewa o Talei.

Kua ni katona. E kaya na iVolatabu: “Ni oni lomaleqa, kua ga ni valavala ca. Me tu lo ga e lomamuni, . . . moni galu ga.” (Same 4:4NW) E rawa nida cudru se lomaleqa. Ia na ka me vakasamataki tiko qo, Na cava ena yaco tarava? E kaya e dua na cauravou o Rusi: “Ke o vakamalumalumu ena nodra vakacudrui iko eso, era na rawai iko. Saga mo yalomatua, kua ni kauaitaka vakalevu.” O na lewa matau kina nomu cudru, ena sega ni lewai iko.

^ para. 4 So na yaca sa veisau.