Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 IVAKASALA INA VUVALE | VAKAWATI

Sala me Wali Kina na Duidui

Sala me Wali Kina na Duidui

ITUVAKI DREDRE

Levu na gauna ena duidui nomudrau rai vakaveiwatini me baleta e dua na ka. Qo na ka ena rairai yaco:

  1. Cike tiko ga me yaco na lomamu.

  2. Yalorawarawa ina ka e vinakata o watimu.

  3. Drau yalorawarawa ruarua ni veisau.

‘Au sega ni via veisau,’ ona rairai kaya. ‘Sa na sega ga ni dua vei keirau e yaco na lomana!’

Ke drau muria na kena sala dodonu, drau na marautaka na nomudrau walia na duidui e basika. Ni drau bera ga ni vakatulewataka na sala mo drau walia kina, qo e vica na ka bibi ena vinakati.

KA MO KILA

Vinakati na veitokoni. Ni o se bera ni vakawati de dua o dau vakatulewa ga vakataki iko. Sa veisau qo, drau sa na saga mo drau vakaliuca na nomudrau bula vakawati, sega ni dui lomamudrau. Kua ni nanuma ni vakavu leqa qori, vakasamataka ga na kena yaga. “E vinaka cake sara nodrau vakasama e le rua me wali kina e dua na ituvaki, mai na nodrau dui nanuma ga,” e kaya e dua na yalewa vakawati o Alexandra.

Vinakati na rai donu. “Sega ni dodonu mo sa duavata tu ga kei watimu ena ka kece e kaya se nanuma, vosa ga vakadodonu, tukuna na ka o nanuma me baleta nona rai,” e vola o John M. Gottman, e daunivakasala ena bula vakawati. “Ke o dau dabe vakadinamati tu ga, roqoliga, salavata kei na nomu kurea tiko na ulumu ni o sega ni duavata kei watimu (se o vakasamataka tiko ga) ena gauna e saga tiko kina mo drau walia vata e dua na leqa, ena tini botoilevu ga nomudrau veivosaki.” *

Vinakati mo vakuai iko. Sega ni dua e via vakawati kei koya e nanuma ni “vinaka duadua ga nona rai.” Ena vinaka sara ke rau dau vakuai rau. “So na gauna au dau vakamalumalumu vei watiqu me marau kina, dau cakava tale ga qori o koya vei au,” e kaya e dua na yalewa vakawati o June. “Dodonu me va qori na bula vakawati—mo drau dau veinanumi.”

 KA O RAWA NI CAKAVA

Tekivu ena yavu vinaka. Na rorogo ni domo e tekivu kina e dua na veivosaki ena dau tini tale ga kina. Ke dau kaukaua na veivosaki ni se qai tekivu, ena dredre me wali na ka drau duidui kina. Muria gona na ivakasala vakaivolatabu: “Moni vakaisulu ena . . . veikauaitaki dina, yalololoma, yalomalumalumu, yalomalua, kei na vosota vakadede.” (Kolosa 3:12) Na itovo qori ena yaga vei kemudrau vakaveiwatini mo drau kua ni dau veicudruvi, mo drau walia ga kina na leqa e basika.—iVakavuvuli vakaivolatabu: Kolosa 4:6.

Kauaitaka ga na ka drau duavata kina. Ke o saga tiko mo walia na ka drau duidui kina, ia drau tini veiba tale kina vakalevu, de dua drau vakabibitaka tiko ga nomudrau dui rai. Saga mo drau kauaitaka na tikina drau duavata kina. Drau tovolea mada qo:

Ena dua na drauniveva mo vola kina e rua na iwasewase. Ena imatai ni wasewase, vola kina na ka o nanuma ni bibi vei iko. Ena kena ikarua, vola na kena o rawa ni yalorawarawa kina mo tokona na rai i watimu. Drau qai veivosakitaka na ka drau dui vakavola. De dua drau na raica ni levu na ka drau vakavola tu drau rawa sara ga ni duavata kina. Sega ni dodonu me dredre nomudrau duavata. Ia ke drau sega mada ga ni duavata, na ka drau sa vola qori ena matata kina na ka drau veivosakitaka tiko.

Drau walia vata. So na ka e dau wali rawarawa. Eso tale na ituvaki vereverea ena vinakati me veivosakitaki na kena iwali, me kua ni vakaliuci ga nona rai e dua, ni na vaqaqacotaki kina na ivau ni vakawati.—iVakavuvuli vakaivolatabu: Dauvunau 4:9.

Yalorawarawa ni veisautaka nomu rai. E kaya na iVolatabu: “O kemuni na tagane moni lomana tale ga na dui watimuni me vaka ga nomuni lomani kemuni; ia na yalewa me dokai watina vakalevu.” (Efeso 5:33) Ni rau veilomani qai veidokai na veiwatini, rau na veinanumi, rawa sara ga ni rau veisautaka nodrau rai. E kaya e dua na tagane vakawati o Cameron, “So na ka o sega ni via cakava, ia o qai taleitaka na cakava e muri, o marautaka gona nona veiuqeti o watimu.”—iVakavuvuli vakaivolatabu: Vakatekivu 2:18.

^ para. 12 Mai na ivola The Seven Principles for Making Marriage Work.