Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 ULUTAGA LEVU | Ni YACO NA LEQA​—CAVA MO CAKAVA

Vakacacani na Veika o Taukena

Vakacacani na Veika o Taukena

A vakacaca e Japani e dua na uneune ena Vakaraubuka 11 ni Maji, 2011 qai rauta ni 9.0 na kena kaukaua. E rauta ni $200 na bilioni na ilavo ni Merika na isau ni ka e vakacacani ra qai mate e sivia e 15 na udolu na lewenivanua. Ni vakaroti ni na cabe e dua na ualoka, a dro ena dua na vanua cere o Kei, e dua na turaga yabaki 32. E kaya: “Au gole i vale ena siga tarava meu lai yauta mai eso na noqu iyaya, ia era sa kuitaki kece i wasawasa, okati kina na noqu rumu. E vo ga na yavu ni vale.”

“E taura toka na gauna meu qai liaca niu sega wale ga ni vakayalia na noqu iyau, ia na ka kece meu bula kina. Noqu motoka, kompiuta ni cakacaka, teveli, idabedabe, veika au dau vakamarautaki ira kina noqu vulagi, me vaka na keyboard, qita, ukalele kei na noqu bitu ni vakatagi. Noqu iyaya ni cakacaka, na iboro, waiwai, na joke ni droini; na droini sa caka rawa tu, era yali kece.”

KA MO CAKAVA

Kua ni vakasamataka vakalevu na veika sa yali, vakasamataka ga na veika e tiko. E tukuna na iVolatabu: “Na nona bula e dua ena sega ni vakatau ena levu ni ka e tu vua.” (Luke 12:15) Ni vakasamataka lesu o Kei na kena ituvaki, e kaya: “Au dau vakavola e liu na veika kece au vinakata, ia qori e vakananuma tale vei au na veika au vakayalia. Au mani vakatulewataka meu vakavola ga na veika au gadreva dina, qai bokoca ni sa vakayacori. Qori e vukei au meu tara cake tale noqu bula.”

Vakaraitaka na yalo ni veinanumi ena nomu vakayagataka na taledi kei na kila mo vakacegui ira kina na vakaleqai. E tukuna o Kei: “E levu na gauna era dau vukei au na dau vakacoko kei ira noqu itokani, lai vakavuna meu nanumi au ga. Ia au nanuma na veika e tukuna na Cakacaka 20:35, oya e ‘marau vakalevu o koya e solia na ka, vakalailai o koya e taura na ka.’ Dina ni sega ni levu na ka e tu vei au meu solia, ia au saga meu dau vakayaloqaqataki ira era vakaleqai ena leqa tubukoso. E vukei au dina na noqu vakaraitaka na yalololoma va qori.”

Masuta na Kalou me solia vei iko na vuku mo kila na ka mo cakava ena ituvaki o sotava. E nuitaka o Kei na veivakadeitaki ni Kalou ena iVolatabu, oya ena “sega ni beca na nodra masu” na vakaloloma. (Same 102:17) O rawa tale ga ni cakava qori.

O bau kila? E parofisaitaka tu na iVolatabu ni na yaco na gauna ena sega ni dua ena leqataka na veika e vakayalia ena leqa tubukoso. *Aisea 65:21-23.

^ para. 9 Me ikuri ni ivakamacala ena inaki ni Kalou me baleta na vuravura, raica na wase 3 ni ivola Na Cava Sara Mada e Kaya na iVolatabu? tabaka na iVakadinadina i Jiova.