Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 IVAKASALA INA VUVALE | VAKAWATI

Qarauna na Vakayagataki iLavo

Qarauna na Vakayagataki iLavo

ITUVAKI DREDRE

Ni o raica nomu itukutuku vakailavo, o kidava ni oti totolo nomu ilavo me vaka ga na seavu ni tegu ni cabe na matanisiga. O se qai vakawati ga, ia e sivia na nomu sausaumi. Vakacava mo beitaki watimu? Sega! O na vakasamataka ga eso na sala mo drau cakacaka vata kina me wali na veika e vakavuna na ituvaki dredre qori. *

VUNA E YACO KINA

Veiveisau. De dua o tiko kei nomu itubutubu ni bera ni o vakawati, ena rairai vou vei iko na levu ni ka me saumi se na nomu wasea vata kei watimu na kena dau voli na ka. Ena rairai duidui tale ga nomudrau rai me baleta na vakayagataki ilavo. Kena ivakaraitaki, ena rairai matau vei dua na isa ni vakawati me maroroi ilavo dua ena sega. Ena taura toka na gauna vei rau na veiwatini me tautauvata na nodrau rai me baleta na vakayagataki ilavo.

Na dinau e vaka na co ca, ena tubu tiko ga ke sega ni kauaitaki

Lokuyara. E tukuna o Timoci e dua na daunibisinisi, ni a vakaleqai vakailavo ena gauna se qai vakawati kina ni sega na tuvanaka vinaka na ka me saumi. E kaya: “Na bera ni noqu saumi bili e vakavuna me keirau sauma vakaveiwatini e vica vata na udolu na ilavo. Mani oti kece na neirau ilavo.”

Sega ni raici na lako ni ilavo. O na vakayagataka vakasivia na ilavo ke o sega ni raica ni sa lako tani tiko mai nomu bausi. Dau yaco qori ni o vakayagataka na card ni baqe se volivoli ena internet. Ni vakarawarawataki na dinau vei ira na veiwatini vou, era na rawai mera volivoli vakalevu.

Se mani cava e vakavuna, e rawa ni vakaleqa na bula vakawati na vakayagataki ilavo. E kaya na ivola Fighting for Your Marriage: “Levu na veiwatini e nodra leqa na vakayagataki ilavo, se mani vakacava na levu ni ilavo e tu vei ira. E dau vakavu veileti tale ga.”

 KA O RAWA NI CAKAVA

Cakacaka vata. Mai na nomudrau veidusi, saga mo drau cakacaka vata me vakavinakataki kina na nomudrau vakayagataki ilavo. Drau veivosakitaka me kua ni tawasei kemudrau na leqa vakailavo.—iVakavuvuli vakaivolatabu: Efeso 4:32.

Dua na ituvatuva ni vakayagataki ilavo. Vakavola na ka kece o volia ena dua na vula. Ena vukei iko qori mo kila na vanua e lako kina na nomu ilavo, kei na veika e sega ni bibi o vakalusia kina nomu ilavo. E kaya o Timoci sa cavuti oti mai: ‘Mo lewa vinaka na nomu dau vakayagataki ilavo.’

Vakavola na veika bibi e dodonu me voli, okati kina na kakana, isulu, rede, sausaumi ni motoka kei na so tale. Vola tale ga na kedra isau qai raica se vakacava na levu ni ilavo o na vakayagataka kina e veivula.—iVakavuvuli vakaivolatabu: Luke 14:28.

“Sa veiqaravi ko koya sa kere ka vua sa soli ka vua.”Vosa Vakaibalebale 22:7

Biuta vakatikitiki e veivula na isau ni kakana, rede, waiwai kei na so tale na ka. Eso era dau vakayacora qori ena nodra wasewasea na ilavo ena dui waqanivola. * Ke ra raica ni lailai na ilavo ena dua na waqanivola, era na sega ni vakayagataka na vo ni ilavo, ia era na lai kauta mai na ilavo ena dua tale na waqanivola.

Veisautaka nomu rai me baleta na iyau. Na marau e sega ni vakatau ena ka vovou o taukena. O Jisu li a kaya “ni sega ni vakatau na bula ni tamata ena levu ni ka e tu vua.” (Luke 12:15) Koya gona, na nomu vakabauta na vosa qori ena laurai ena nomu dau vakayagataki ilavo.—iVakavuvuli vakaivolatabu: 1 Timoci 6:8.

So na ka mo cakava. E kaya o Eroni sa rua na yabaki nona vakawati, “O na rairai nanuma ni rawarawa na saumi ni bili ni retioyaloyalo, kana e vale ni kana kei na so tale. Ia ni toso na gauna ena vakaleqa nomu bula vakailavo. Keirau vulica me keirau vakuai keirau ena so na ka me rawa ni keirau bula ga ena ilavo keirau rawata.”

^ para. 4 Na ulutaga qo e baleti ira na se qai vakawati ga, ia e yaga tale ga vei ira sa dede nodra vakawati.

^ para. 14 Ke o dau vakayagataka na card ni baqe, o na sega beka ni maroroya na ilavo ena waqanivola, na kena risiti ga.