Raica sara na lewena

Raica na lewenivola

 NA RAI NI IVOLATABU

Vakasama Vakatitobu

Vakasama Vakatitobu

Na cava na vakasama vakatitobu?

‘Au na veinanuyaka na nomuni cakacaka kece qai vakasamataka vakatitobu na nomuni ivalavala.’—Same 77:12.

KA ERA TUKUNA ESO

E levu na iwalewale ni vakasama vakatitobu, ia e vica vei ira qori e yavutaki mai na lotu vakaEsia makawa. E tukuna e dua na dauvolaivola me baleta na tikina qori, “ke galala na vakasama ena qai raici vinaka na ka.” Kena ibalebale ni galala na vakasama me vagolei vakatabakidua ena so na vosa se dua na iyaloyalo, ena rawati na vakacegu qai makare na rai.

KA E KAYA NA IVOLATABU

E vakabibitaki ena iVolatabu na vakasama vakatitobu. (1 Timoci 4:15) Qori e sega ni okati kina me lala na vakasama, se cavuti tiko ga eso na vosa e dau vakatokai tu me mantra. Na vakasama vakatitobu ena iVolatabu e vakainaki qai vakasamataki kina na veika yaga, me vaka na itovo ni Kalou, nona ivakatagedegede kei na nona ibulibuli. E masuta e dua na tamata yalodina ni Kalou: “Au sa vakanananu ki na nomuni cakacaka kecega; au sa vakanananu vakalevu ki na cakacaka ni ligamuni.” (Same 143:5) E kaya tale ga: “Ni’u sa nanumi kemuni e na noqui mocemoce, ka vakanananu vei kemuni e na veitiki ni bogi.”—Same 63:6.

 E yaga vakacava na vakasama vakatitobu?

“A lomana na yalododonu sa daunanuma na ka me kaya.” —Vosa Vakaibalebale 15:28.

KA E KAYA NA IVOLATABU

Na vakasama vakatitobu e kilikili ena vakavinakataka na lomada, eda na lewai keda vinaka da qai lomadei. Qori ena vakayalomatuataki keda, eda na veinanumi tale ga ena noda vosa kei na itovo. (Vosa Vakaibalebale 16:23) Koya gona na vakasama vakatitobu va qori ena marautaki qai vakainaki kina na bula. E kaya na Same 1:3 me baleti koya e dau vakasamataka vakatitobu na Kalou: “Ena tautauvata kei na kau sa tei e na bati ni uciwai, sa vuataka na vuana e na kena gauna, a drauna talega ena sega ni malai; Ia na ka kecega sa cakava ko koya ena yaco.”

Ena levu na ka eda kila da qai nanuma vinaka na ka nida vakasama vakatitobu. Kaya mada nida vulica na veikabula se dua na ulutaga vakaivolatabu, e levu na ka vakasakiti eda na kila. Ia nida vakasama vakatitobu, eda na raica se ra veisemati vakacava na itukutuku, kei na sala era tokona kina na veika eda sa vulica oti. Me vaka ga nona vakayagataka e dua na matai na iyaya me tara kina e dua na vale rairai vinaka, na vakasama vakatitobu ena vukei keda meda “sema” vinaka na ka kece eda sa vulica oti.

Me qarauni na vakasama vakatitobu

“Sa ka dauveivakaisini duaduaga na yalo ni tamata, ka sa dredre ni vinaka: ko cei me kila rawa?”—Jeremaia 17:9.

KA E KAYA NA IVOLATABU

“E vu mai na loma ni tamata na vakanananu ca: na veidauci, na butako, na laba, na veibutakoci, na kocokoco, na ivalavala e ca, na lawaki, na ivalavala vakasisila, na mata e vuvu, . . . kei na veika sesewa.” (Marika 7:21, 22) Me vaka ga na noda qaqarauni meda kua ni kama, me qarauni tale ga na vakasama vakatitobu! Ke sega, eda na bucina na gagadre ca. Nida sega ni tarova rawa qori, eda na vakayacora na ivalavala tawakilikili.—Jemesa 1:14, 15.

E veiuqeti kina na iVolatabu meda dau vakasamataka vakatitobu na ‘ka kece ga e dina, dodonu, savasava, uqeta na veilomani, e rogo vinaka, kilikili, qai ganita me vakacaucautaki.’ (Filipai 4:8, 9) Nida vakasamataka na veika vinaka va qori, ena vinaka na noda itovo, eda na dau vosa vakayalovinaka, eda na veimaliwai vinaka tale ga kei ira na so tale.—Kolosa 4:6.