Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 ULUTAGA LEVU

Tolu na ka e Sega ni Rawati ena iLavo

Tolu na ka e Sega ni Rawati ena iLavo

E LEVU nikua era sa voleka ni cegu na cakacaka, vakayalia nodra vale se lailai na nodra ilavo ni peniseni, era se via volia tiko ga e levu na ka mera taukena.

O ira qori era dau rawai rawarawa ena nodra veibacani na daukaburaki ivoli, era kacivaka ni dodonu me dua na noda vale levu, motoka vou kei na isulu saulevu. Era tukuna ke sega mada ga na ilavo, o rawa ni taura vakadinau! E levu era cakava qo me nanumi kina nira rawati ira, veitalia ke bini na nodra dinau.

Ia sega ni dede sa na kilai na kena dina. E kaya na ivola na Narcissism Epidemic: “O ira era dau dinautaka na iyaya me nanumi kina nira vutuniyau, era vakataki ira na dau vakayagataka na wainimategaga na cocaine me seavu kina nodra lomabibi. De dua e rawarawa na iwalewale qori me wali totolo kina na leqa, ia ni toso na gauna era na dravudravua ra qai lomabibi.”

E tukuna na iVolatabu na ca ni nona “dokadokataka e dua na ka e taukena.” (1 Joni 2:16) Na noda kauaitaka ga na iyau ena vakawelei keda mai na veika e bibi duadua ena noda bula e sega ni rawati ena ilavo. Dikeva mada e tolu na ivakaraitaki.

 1. DUAVATA VAKAVUVALE

O Brianne, * e dua na goneyalewa itabagone mai Merika, e raica ni dau vakabibitaka o tamana na nona cakacaka kei na ilavo. E kaya, “Sa tu na ka kece keitou gadreva kei na levu tale, ia levu na gauna e sega ni tiko e vale o Ta ena vuku ni nona cakacaka, au nanuma ni tiko eso tale na nona icolacola ena vuvale!”

Me vakasamataki: Na cava ena rairai veivutunitaka e muri o tamai Brianne? E vakaleqa vakacava na nodrau veiwekani vakaveitamani na nona vakabibitaka na veika vakayago? Na cava e bibi, na ilavo se na nona gauna kei ratou na nona vuvale?

iVakavuvuli vakaivolatabu:

  • “Ni sa vu ni ka ca kecega na daulomana nai lavo: era sa daukocova eso, . . . a ra sa cokai ira sara vakai ira e na yaluma vakavuqa.”1 Timoci 6:10, Ai Vola Tabu.

  • “Sa vinaka me da kana rourou ka veilomani ga, ka ca me da kana pulumokau uro ka veicati tiko.”Vosa Vakaibalebale 15:17.

Bibi me nanumi: Na duavata ni vuvale e sega ni rawati ena ilavo. Ena rawa ga ke dua e vakayagataka na nona gauna me tiko kina kei ratou na nona vuvale, kauaitaki ratou, me lomani ratou tale ga. Kolosa 3:18-21.

 2. TIKO VINAKA

E tukuna o Sarah, e yabaki 17: “E dau tukuna vei au o tinaqu meu vakawatitaka e dua e levu na nona ilavo. Me dua tale ga na noqu cakacaka vinaka meu rawa ni vakanuinui toka kina keu mani veibiu kei watiqu. E dau vakasamataka tu ga o tinaqu na ilavo kei na sala ena rawata kina.”

Me vakasamataki: Na cava eso na ka bibi o dau vakasamataka tu me baleta na nomu veisiga ni mataka? Vakacava na ka o vakasamataka qori, ena vakalomaocaocataki iko? Na cava me cakava o tinai Sarah me kua kina ni leqataka na ilavo ena rawata mai muri?

iVakavuvuli vakaivolatabu:

  • “Kua ni kumuna na iyau e vuravura, ni rawa ni vakacacana na sarasara kei na veveka, e rawa tale ga nira butakoca na daubutako.”Maciu 6:19.

  • “Oni sega mada ga ni kila se na vakaevei na nomuni bula nimataka.”Jemesa 4:14.

Bibi me nanumi: Ena sega ni kauta mai na tiko vinaka na levu ni nomu ilavo. Na ilavo e rawa ni butakoci—e sega tale ga ni rawa ni vakaotia na tauvimate se tarova na mate. (Dauvunau 7:12) E vakavuvulitaka na iVolatabu ni bula vinaka duadua ena rawati ena noda kila na ka dina me baleta na Kalou kei na nona inaki.Joni 17:3.

 3. LOMAVAKACEGU

E tukuna o Tanya e yabaki 24, “Erau susugi au na noqu itubutubu me keitou bula rawarawa ga. Keirau marau kei na noqu isa ni drua ni levu na gauna e rauti keitou sara ga na ka me keitou bula kina.”

Me vakasamataki: Na cava ena dredre kina meda lomavakacegu ena ka sa tu rawa vei keda? Na cava na nodratou rai na nomu vuvale me baleta na nomu vakayagataki ilavo?

iVakavuvuli vakaivolatabu:

  • “Ke sa tiko na ka meda kania, na isulu meda tokara, kei na vanua meda tiko kina, meda lomavakacegu.”1 Timoci 6:8.

  • “Era marau o ira na kila nira gadreva na Kalou.”Maciu 5:3.

Bibi me nanumi: E levu tale na ka e bibi cake mai na ilavo kei na ka e rawa ni voli kina. Me vaka ga e tukuna na iVolatabu: “Na nona bula e dua ena sega ni vakatau ena levu ni ka e tu vua.” (Luke 12:15) Na vakacegu dina ena kilai ena kena saumi na taro bibi qo:

  • Eda mai bula tu vakacava e ke?

  • Ena vakacava na noda bula ena gauna se bera mai?

  • Na cava meda cakava meda veiwekani vinaka kina kei na Kalou?

O ira na iVakadinadina i Jiova, era vakarautaka na mekesini qo, era na marau mera vukei iko mo kila na isaunitaro qori.

^ para. 8 Sa veisau eso na yaca ena ulutaga qo.