Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 ULUTAGA LEVU: O VOLIVOLI TIKO VAKAYALOMATUA?

Cava Eda Volivoli Kina Vakasivia?

Cava Eda Volivoli Kina Vakasivia?

A tabaki ena 2012 e dua na vakadidike a vakayacori e veiyasai vuravura, e laurai ni veimama vei ira na vakatarogi era dau volia na veika era sega ni gadreva dina. Ia e rauta ni rua na ikatolu era vakabauta ni levu era dau volivoli vakasivia. E dina taucoko qori, ni levu vei ira na dauvolivoli era sa sega ni sauma rawa na levu ni nodra dinau. Era kaya na dauvakadidike ni sega ni vakamarautaki keda na levu ni ka eda volia, e vakavuna ga na lomaocaoca kei na rarawa! Na cava gona eda volivoli kina vakasivia?

E SEGA ni dua e galala mai na nodra dau veirawai na dauveivoli. Na cava na nodra inaki? Era vinakata meda volia na ka eda sega ni gadreva dina. Era kila nida na volia ga na ka e malele kina na lomada. Koya gona, na itukutuku ni veivoli kei na ka e dau caka ena gauna ni volivoli e kena inaki mera taleitaka na dauvolivoli.

E kaya na ivola Why People Buy Things They Don’t Need: “Nira via volia e dua na iyaya na dauvolivoli, era dau raitayaloyalotaka nira lai vaqara na iyaya era vinakata ra qai volia.” Era siqema na kenadau ni so na gauna e dau curumi keda na yalo ni via volivoli, da qai volia sara na ka eda vinakata. E vakamacalataka o Jim Pooler, e kenadau ena kaburaki ni ivoli: “Nira kila na dauveivoli ni dau curumi keda na yalo ya, era na saga sara ga mera rawai keda.”

O na taqomaki iko vakacava mai na nodra veivakamuai na dauveivoli? Kua ni yalototolo, dikeva vinaka na ka era dau yalataka.

 YALATAKI: “Ena Vinaka na iVakarau ni Nomu Bula”

E sega ni cala ke da vinakata me vinaka na noda ivakarau ni bula. Era dau yalataka na dauveivoli ni veika eda dau gadreva—na bula vinaka, bula vakacegu, sega na lomaocaoca, qai vinaka na veimaliwai—ena rawati ke da digitaka donu na ka eda volia.

KENA DINA:

O na sega ni bulabula vinaka ke levu na ka o taukena. O na vakayagataka kina e levu na gauna kei na ilavo. O na lomaocaocataka na levu ni dinau qai lailai na gauna mo vakayagataka vei ratou e vale kei ira nomu itokani.

iVakavuvuli: “Na nona bula e dua ena sega ni vakatau ena levu ni ka e tu vua.”Luke 12:15.

YALATAKI: “O na Rogo Qai Dokai”

Eso era tukuna nira volivoli mera dokai kina. Ia e kaya o Jim Pooler: “Levu era dauvolivoli mera veisisivi kei ira nodra itokani, ira era tiko veitikivi, cakacaka vata, kei ira na wekadra.” Qori na vuna era dau tabaki kina ena itukutuku ni veivoli o ira na tamata rogo kei ira na vutuniyau. E vaka mera tukuna tiko vei ira na dauvolivoli: “O rawa tale ga ni va qo!”

KENA DINA:

Noda vakatauvatani keda kei ira na so tale eda na sega vakadua ni lomavakacegu. O na vinakata me levu tiko ga na ka o taukena.

iVakavuvuli: “O koya sa lomana na siliva ena sega ni mamau e na siliva.”Dauvunau 5:10.

YALATAKI: “O na Rawata na ka o Vinakata”

E vakamacalataka na ivola na Shiny Objects: “Na veika eda taukena e dau tukuni keda (se na ka eda vinakata meda kilai kina).” Era kila qori na dauveivoli ra qai saga mera vakarautaka na nodra ivoli—vakabibi na ivoli saulevu—me ganita na ivakarau ni bula era vinakata na lewenivanua kei na ka era vakabibitaka.

Na cava o vinakata mo kilai kina? O via kilai ni o dau taukena na veika vovou, se mo kilai ni o dua na dau qito? Se mani cava na ka o vinakata, era yalataka na dauveivoli ni o na rawata ke o digitaka donu na ka o via volia.

KENA DINA:

E sega ni dua na ivoli e rawa ni veisautaka na ka eda kilai dina kina se meda rawata eso na itovo vinaka me vaka na daudina kei na yalodina.

iVakavuvuli: “Me kua ni kemuni idivi . . . na vakaiukuuku koula se na tokari ni isulu e sau, me kemuni idivi ga na tamata e loma.”1 Pita 3:3, 4.