Raica sara na lewena

Raica na lewenivola

 NA RAI NI IVOLATABU

Parataisi

Parataisi

Na cava na Parataisi?

KA ERA TUKUNA ESO

Eso era nanuma ni Parataisi e itukuni wale ga. So tale era vakabauta ni vaka na were totoka era na bula tawamudu kina na tamata vinaka, era na marau ra qai vakaitavi ena cakacaka e yaga.

KA E KAYA NA IVOLATABU

Na vosa “parataisi” e dau vakayagataki me vakaibalebaletaka na imatai ni itikotiko ni kawatamata, na were o Iteni. (Vakatekivu 2:​7-15) E vakamacalataka na iVolatabu ni vanua dina na were qo, erau bula kina na imatai ni veiwatini rau qai galala mai na tauvimate kei na mate. (Vakatekivu 1:​27, 28) Ena vuku ni nodrau talaidredre vua na Kalou, sa sega kina ni rau vakatarai me rau tiko ena parataisi. Ia e levu na parofisai mai na iVolatabu e vakamacalataka nira na marautaka na kawatamata ena gauna mai muri na kena vakalesui tale mai na Parataisi.

VUNA MO KAUAI KINA?

Ke dauloloma na Kalou, ena macala ga ni na vakalougatataki ira era sokaloutaki koya ena yalodina, mera marautaka na bula totoka ena dua na vanua me vaka na Parataisi. Ena vakasalataki ira tale ga na tamata ena ka mera cakava mera rawata kina na nona veivakadonui. E kaya na iVolatabu nida na rawata ga na nona veivakadonui ke da vulica tiko ga na veika e baleta na Kalou da qai talairawarawa ena nona ivakaro.​—Joni 17:3; 1 Joni 5:3.

“A sa tea e dua na were na Kalou ko Jiova,  . . mai Iteni, a sa kauta kina na tamata ka bulia ko koya.”​—Vakatekivu 2:8.

 E tiko e vei na Parataisi?

KA ERA TUKUNA ESO

Era vakabauta eso ni tiko mai lomalagi na Parataisi, ia eso tale era tukuna ni na tiko e vuravura ena dua na gauna mai muri.

KA E KAYA NA IVOLATABU

Na Parataisi taumada a vakarautaki me baleta na kawatamata a tiko e vuravura. E vakarautaka sara ga na Kalou na vuravura me itikotiko tudei ni kawatamata. E tukuna na iVolatabu ni bulia na vuravura na Kalou me tawamudu. (Same 104:5) E tukuna tale ga: ‘Na lomalagi io na lomalagi sa nei Jiova: Ia sa solia na vuravura o koya me nodra na luve ni tamata.’​—Same 115:16.

E sega ni kurabuitaki gona ni vakamacalataka na iVolatabu na yalayala me baleta na Parataisi e vuravura. Na Kalou ena vakalougatataki ira kina na kawatamata mera bula tawamudu. Ena vakilai na veiyaloni kei na vakacegu. Sa na oti vakadua na mosi kei na rarawa. Era na qai marautaka sara vakaoti na tamata na veika vakatubuqoroqoro era tu ena vuravura.​—Aisea 65:​21-23.

“E sa tiko vei ira na tamata na vale ni Kalou, . . .  sa na sega tale na mate, na lolosi, na tagiyaso, kei na mosi.”​—Vakatakila 21:​3, 4.

O cei era na bula ena Parataisi?

KA ERA TUKUNA ESO

E levu na lotu era vakavulica ni o ira ga na tamata vinaka era na bula ena Parataisi. Ia e levu era sega ni kila na ka mera cakava mera kilai kina nira tamata “vinaka.” Eso era nanuma ni sa rauta ga mera vakaitavi ena solevu ni lotu kei na masu e dau cavuqaqataki tu ga, ia e sega ni vu dina mai lomadra.

KA E KAYA NA IVOLATABU

E vakavulica na iVolatabu ni o ira “na yalododonu” era na bula ena Parataisi. Ia o cei era yalododonu ena mata ni Kalou? Qori e sega ni o ira era vakaitavi ena solevu ni lotu ra qai vakalecalecava na inaki ni Kalou. E kaya na iVolatabu: “Sa vinakata li ko Jiova nai soro kama kei nai madrali, me vaka sa vinakata ko koya na talairawarawa ki na vosa i Jiova? Raica, sa vinaka na talairawarawa, ka ca nai soro.” (1 Samuela 15:22) Na kena itukutukuni rawarawa ga, ni o ira “na yalododonu” era na bula tawamudu ena Parataisi, e vakaibalebaletaki ira na talairawarawa ena ivakaro ni Kalou e volai ena iVolatabu.

KA O RAWA NI CAKAVA

Na noda talairawarawa ena ivakaro ni Kalou e sega ni noda vakaitavi wale ga ena solevu ni lotu. O rawa ni vakamarautaka se vakararawataka na Kalou ena ka o cakava e veisiga. O rawa ni vulica mo vakamarautaka na Kalou ena nomu dikeva vinaka na iVolatabu. E sega gona ni dredre meda vakamarautaka na Kalou. E tukuna na iVolatabu ni “sega ni icolacola bibi na nona ivunau.” (1 Joni 5:3) E vinakata sara ga na Kalou me vakalougatataka na nomu talairawarawa ena nona vakadonui iko mo bula ena Parataisi.

“Era na taukena na vanua ko ira na yalododonu, ka tiko kina ka sega ni mudu.”​—Same 37:29.