Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 NODA BULA VAKARISITO

Mo Marautaka na Cakacaka Vakavunau

Mo Marautaka na Cakacaka Vakavunau

Vakacava e dau dredre mo vunau? Levu era na duavata kina qori. Na cava na vuna? De dua era sega ni kauai vakalevu ena yalava, era tusaqati keda se da rere nida vosa vei ira eda sega ni veikilai. Macala ga ni ituvaki va qori e rawa ni seavu kina noda marau. Ia eda qarava na Kalou mamarau, e vinakata meda marautaka noda qaravi koya. (Sm 100:2; 1Tm 1:11) Na cava e tolu na vuna meda marau kina nida lai vunau?

Kena imatai, eda kacivaka na itukutuku e solia vei keda na inuinui. Sa seavu tiko yani na nodra vakanuinui e levu nikua, eda rawa gona ni vakatawana e lomadra na “itukutuku vinaka ni ka vinaka.” (Ais 52:7) Na itukutuku vinaka ni Matanitu ni Kalou ena vakamarautaki keda tale ga. Ni bera nida lai vunau, meda vakananuma vakatitobu na ka ni veivakalougatataki ena kauta mai na Matanitu ni Kalou ina vuravura.

Kena ikarua, na itukutuku vinaka eda vunautaka e yaga vakayago, vakayalo tale ga. Era na vulica kina na tamata mera biuta laivi na itovo ca, kei na sala mera rawata kina na bula tawamudu. (Ais 48:17, 18; Rom 1:16) E vaka ga nida vakaitavi ena tabana ni veivueti. Eso era na sega ni via ciqoma na veivuke, ia eda na vaqarai ira tiko ga era na via bula.—Mac 10:11-14.

Kena ikatolu, koya e bibi sara, e dokai o Jiova nida lai vunau. E raica vakabibi o koya na noda cakacaka vakavunau. (Ais 43:10; Ipe 6:10) Kena ikuri, e tu vakarau ni solia na yalona tabu meda vakayacora kina na cakacaka qo. Koya gona, meda cikevi Jiova me solia vei keda na marau, na itovo e okati ena vua ni yalo tabu. (Kal 5:22) Ena nona veivuke, eda na sega ni nuiqawaqawa, eda na vunau ena doudou. (Cak 4:31) Se ra mani vakarorogo se sega, eda na marautaka noda ilesilesi ni vunau.—Isi 3:3.

Na ivakarau ni yalo cava o na vakaraitaka ena cakacaka vakaitalatala? O na vakaraitaka vakacava nomu marau?

ME SARAVI NA VIDIO O NA MARAU TALE NI O VULI QAI VAKASAMA VAKATITOBU, QAI SAUMA NA TARO E TOKA E RA:

  • Na cava ena bibi kina vei keda noda kana vakayalo, ke levu mada ga na gauna eda vakayagataka e veivula ena cakacaka vakavunau?

  • Eda na vakatotomuri Mary vakacava?

  • Gauna cava o dau vakananuma kina vakatitobu na Vosa ni Kalou?

  • Na cava o marautaka ni o vunautaka na itukutuku vinaka?