Raica sara na lewena

iDusidusi ni Soqoni ni Noda Bula vaKarisito kei na Cakacaka Vakaitalatala

iDusidusi ni Soqoni ni Noda Bula vaKarisito kei na Cakacaka Vakaitalatala

Lewenivola

1. Me caka na Soqoni ni Bula vaKarisito kei na Cakacaka Vakaitalatala me salavata kei na idusidusi ena iVola ni Soqoni ni Bula vaKarisito kei na Cakacaka Vakaitalatala, kei na veidusimaki e tiko ena idusidusi qo. Era na sureti na dautukutuku yadua mera tu vakarau ni vakaitavi ena itavi ni gonevuli. E rawa tale ga nira vakaitavi o ira na dau tiko ena soqoni ke ra duavata kei na ivakavuvuli ni iVolatabu, ra qai muria na kena ivakavuvuli vaKarisito.—be t. 282.

ITEKIVU NI VAKAMACALA

 2. Dua na miniti. Ni oti na sere kei na masu, ena veivakauqeti na jeameni ni Soqoni ni Bula vaKarisito kei na Cakacaka Vakaitalatala ena veika ena rogoci ena porokaramu. Me vakabibitaka na jeameni na veitikina era na yaga ena ivavakoso.

IYAU MAI NA VOSA NI KALOU

  3. Vunau: Tini na miniti. Ena volai ena iVola ni Soqoni ni Bula vaKarisito kei na Cakacaka Vakaitalatala na usutu ni itavi qo kei na rua se tolu na tikina bibi. Ena lesi na itavi qo vua na qase se dauveiqaravi ni ivavakoso matua. Ni tekivu wiliki e dua na ivola vou ena iVolatabu, ena saravi e dua na vidio me kena ikau. E rawa ni vakamacalataki na veisemati ni vidio kei na usutu ni vunau. Ia me vakadeitaki me kovuti na tikina bibi kece e okati ena itavi qo. Kena ikuri, ke levu na gauna, me vakayagataki tale ga na itaba se droini kei na kena tikinivolatabu ni vakarautaki qori me salavata na usutu e veivosakitaki.

 4. Vakekeli ena Vosa ni Kalou: Tini na miniti. Ena sega ni dua na itekivu ni ivakamacala se kena itinitini, ena vakayacori ga na veitarotarogi. Ena lesi vua e dua na qase se dauveiqaravi ni ivavakoso matua. E rawa ni wasewasea na gauna e vakayagataka ena va na tikina me vakatau ena tikina e raica ni yaga ena ivavakoso. Ia me taroga kece na taro. Kena ikuri, ena vakatau vua me wiliki kece se so ga na tikina mai na tikinivolatabu e yavutaki kina na imatai ni rua na taro. Me kua ni sivia e 30 na sekodi na nodra ivakamacala o ira na digitaki mera saumitaro.

  5. Wili iVolatabu: Me kua ni sivia e va na miniti. Me vakaitavi kina na tacida tagane. Ena sega nona ikaunivosa se itinitini, ena wiliwili ga. Ena kauaitaka o jeameni nodra vukei me donu na ka era wilika, matata, taladrodro, vakarogotaki donu na vosa, veiveisau na domodra, cegu donu, ra qai matau ena vosa kei na ivukivuki. Me vaka ni balavu eso na wase ni ivolatabu me wiliki e veimacawa, me digitaka vinaka na ovasia ni Soqoni ni Bula vaKarisito o koya e ganita me wilika na wase ni vola e balavu kei koya e wilika na wase ni vola e lekaleka.

GUMATUA ENA CAKACAKA VAKAITALATALA

 6. Me kua ni sivia na tinikalima na miniti. Na iwase ni soqoni qo e vakarautaki meda vakatovotovotaka noda cakacaka vakaitalatala, qai vakavinakataka na iwalewale ni noda vunau kei na veivakavulici. Me yavutaki na itavi ni imatai ni veisiko kei na itavi ni veisikovi lesu ena vakatutu ena tabana e 1 ni iVola ni Soqoni ni Bula vaKarisito kei na Cakacaka Vakaitalatala. E vakatau vua na dautukutuku me vakayagataka na ivola se vidio e tiko ena noda iVukevuke ni Veivakavulici (Teaching Toolbox). Me vukea na cakacaka vakaitalatala, sa tiko ena vakatutu ni veivosaki na usutu “Raica na Tikinivolatabu qo ena iVukevuke ni Veivakavulici” ena ivola ni soqoni. Ena vakatau vua na gonevuli me vakayagataka ena nona itavi se sega. Ena vakaraitaka na iVola ni Soqoni ni Bula vaKarisito kei na Cakacaka Vakaitalatala na gauna yalataki ni itavi yadua. So na gauna, ena vakarautaki kina na idusidusi ni ka me caka ena itavi yadua. E sega ni vinakati mera vakacuruma eso tale na ivakamacala me vakayagataki kina na gauna e vo ena nodra itavi. Ke ra vakavakarau vinaka, e rawa ni oti nodra itavi ni vo tu e dua na miniti se sivia. Ke veiganiti, e rawa nira vakaitavi tale ga na qase ni ivavakoso.

 7. Vidio ni Vakatutu ni Veivosaki: Ena saravi qai veivosakitaki ena veivula na vidio ni vakatutu ni veivosaki. Ena vakaraitaki kina na imatai ni veisiko, kei na veisikovi lesu. Na itavi qo ena qarava na jeameni ni Soqoni ni Bula vaKarisito kei na Cakacaka Vakaitalatala.

 8. iMatai ni Veisiko: Na itavi qo e rawa ni lesi vua e dua na tacida tagane se yalewa. Na nona ivukevuke me dua na lewe ni nona vuvale se ke nona itavi e dua na tagane, me nona ivukevuke ga na tagane, vaka kina ke nona itavi e dua na yalewa, me nona ivukevuke ga na yalewa. E rawa ni rau dabe se tucake tu ga. Me rau veivakabulataki ena ivakarau e matau ena yalava. Me yavutaki nodrau veitalanoa ena vakatutu ni veivosaki e tiko ena iVola ni Soqoni ni Bula vaKarisito kei na Cakacaka Vakaitalatala.

 9. Veisikovi Lesu: Na itavi qo e rawa ni lesi vua e dua na tacida tagane se yalewa. Ke nona itavi na tagane, me nona ivukevuke na tagane, vaka kina ke nona itavi na yalewa, me nona ivukevuke ga na yalewa. (km 5/97 t. 2) E rawa ni rau dabe se tucake tu ga. Me vakatasuasuataki kina na ka me tukuni ni sikovi lesu e dua e tataleitaki ena imatai ni veisiko. Me yavutaki nodrau veitalanoa ena vakatutu ni veivosaki ena iVola ni Soqoni ni Bula vaKarisito kei na Cakacaka Vakaitalatala.

 10. Vuli iVolatabu: Na itavi qo e rawa ni lesi vua e dua na tacida tagane se yalewa. Ke nona itavi na tagane, me nona ivukevuke ga na tagane, vaka kina ke nona itavi na yalewa, ena nona ivukevuke ga na yalewa. (km 5/97 t. 2) E rawa ni rau dabe se rau tu cake tu ga. Na itavi qo e laurai kina e dua na vuli iVolatabu sa vakacagau tiko, ia rau na vakatasuasuataka ga nodrau dikeva tiko e vica na parakaravu. E sega ni gadrevi me dua na ikau ni ivakamacala se me dua na itinitini, vakavo sara ke cakacaka tiko o gonevuli ena lesoni qori. E sega ni tukuni me wiliki na parakaravu kece e yavutaki kina na itavi, ia me qai vakatau vei rau. E bibi ga me vakavotui na iwalewale vinaka ni veivakavulici.

 11. Vunau: Na itavi qo ena lesi vua e dua na tacida tagane qai caka me vaka e vunau ena ivavakoso.

NODA BULA VAKARISITO

 12. Ni oti na sere, ena veivosakitaki ena loma ni 15 na miniti e dua se rua na itavi me vukei keda meda bulataka na Vosa ni Kalou. Ena qarava na itavi qo e dua na qase se dauveiqaravi ni ivavakoso, vakavo sara ke vakamatatataki yani o koya e lesi me qarava. Ia ena lesi ga vei ira na qase ni ivavakoso na itavi ni veika e gadrevi ena ivavakoso.

  13. Vuli iVolatabu ni iVavakoso: Kua ni sivia na tolusagavulu na miniti. Me qarava e dua na qase ni ivavakoso matua. (Ke lailai na qase ena ivavakoso, e rawa nira vakaitavi na dauveiqaravi ni ivavakoso matua.) Me vakadeitaka na ilawalawa qase o koya e ganita me liutaka na vuli qo. E dodonu me liutaki vakavinaka, oya me oti ena kena gauna, vakabibitaka ni tikinivolatabu bibi, qai vukei ira na vakarorogo mera taura vakabibi na yaga ni ka e veivosakitaki tiko. E rawa nira raica eso na vakatutu yaga ena idusidusi e vakarautaki me baleta na liutaki ni vuli Vale ni Vakatawa. Ke sa kovuti kece na veika me vulici ena macawa ya, sega tale ni gadrevi me tomani na kena veivosakitaki. Ke rawa, me veiveisau e veimacawa o koya e taura na vuli kei koya e wiliwili. Ke vakatulewataka na jeameni me vakalekalekataki na vuli, ena vakalewa vinaka o koya e taura na vuli na sala me vakalekalekataki kina. E rawa ni digia me kua ni wiliki eso na parakaravu.

RAILESUVI NI KA E VULICI

  14. Me kua ni sivia e tolu na miniti. Ena taleva na jeameni ni Soqoni ni Bula vaKarisito kei na Cakacaka Vakaitalatala eso na tikina bibi e vulici. Me vakamacalataka vakalekaleka na veika ena vulici ena macawa tarava, e rawa ni okati kina nona taroga na taro me saumi. Ke levu na gauna, e rawa ni tukuna tale ga na yacadra na gonevuli era na vakaitavi. Vakavo sara ke dua na veisau, ena vakarogoya o jeameni na veika me kacivaki se wilika eso na ivola e dodonu me wiliki ena ivavakoso. Ena sega ni kacivaka na ituvatuva sa kilai tu, me vaka na cakacaka vakavunau kei na sasamaki, ena kabi ga ena papa ni itukutuku. Ke sega ni veirauti na gauna me vakarogoi kina na ka me kacivaki, mera kerei o ira na vakaitavi ena Noda Bula vaKarisito mera vakalekalekataka nodra itavi. (Raica na  parakaravu 13 kei na  17.) Ena tini na soqoni ena sere kei na masu.

GUMATUA ENA WILIVOLA KEI NA VEIVAKAVULICI

 15. Na gonevuli yadua mera kauta tiko mai nodra ilavelave ni brochure na Veivakavulici e tabaki se ena iyaya vakalivaliva ena soqoni. Ena yavutaka na jeameni nona vakavinavinaka kei na veivakasalataki ena brochure qori. Ena cakacaka na gonevuli ena lesoni e volai ena ikovu ena yasa ni nodra itavi me vaka e laurai ena iVola ni Soqoni ni Bula vaKarisito kei na Cakacaka Vakaitalatala. E vakarautaki na ulutaga “Ka Mo Cakacaka Kina” mera vakalewena na gonevuli, ena sega ni volavola kina na jeameni.

IVAKASALA

  16. Ni oti na itavi yadua ni gonevuli, e vakarautaki e rauta ni dua na miniti me veivakacaucautaki qai veivakasalataki kina o jeameni mai na brochure na Veivakavulici. Ni bera ni tekivu na itavi ni gonevuli, ena sega ni kacivaka o jeameni na lesoni e cakacaka kina. Ni oti sara nona itavi, ena vakavinavinakataki koya, de dua ena tukuna na lesoni a cakacaka kina kei na tikina e cakava vinaka, se vakamacalataka vakayalovinaka na tikina me vakavinakataka. E rawa ni vakamacala o jeameni ena so tale na tikina yaga e raica ena vakatasuasua e kila ni na vukei gonevuli se o ira na vakarorogo. Ke gadrevi, e rawa nira vakasalataki tale ni oti na soqoni se dua tale na gauna veiganiti ena lesoni era lesi kina se dua tale na ivakarau ni vosa. Me yavutaki na ivakasala qori ena brochure na Veivakavulici se ivola na Vuli Vunau.—Me ikuri ni ivakamacala ena itavi nei jeameni ni Soqoni ni Bula Vakarisito kei na Cakacaka Vakaitalatala kei na itavi ni ivukevuke ni daunivakasala, raica na  parakaravu 17,  22 kei na  24.

GAUNA

     17. Mera kua ni sivia na gauna yalataki o ira na vakaitavi, wili kina na ivakamacala nei jeameni. Me tarovi vakamatau na itavi ni gonevuli ke ra mani sivia nodra gauna yalataki. Ke so tale na itavi ena soqoni e sivia na gauna e vakarautaki, me veivakasalataki kina na ivukevuke ni daunivakasala. (Raica na  parakaravu 24.) Me 1 na aua 45 na miniti na balavu ni soqoni, wili kina na masu kei na sere.

VEISIKO NI IVAKATAWA NI TABACAKACAKA

 18. Ni veisiko mai na ivakatawa ni tabacakacaka, ena muri ga na ituvatuva ena iVola ni Soqoni, ia ena lutu ga na Vuli iVolatabu ni iVavakoso qai sosomitaki ena ivunau ni ivakatawa ni tabacakacaka. Ni bera na ivunau ni ivakatawa ni tabacakacaka, ena taleva na jeameni na tikina bibi ena soqoni, ena tukuna vakalekaleka na ka ena veivosakitaki ena soqoni tarava, vakarogoi ni veika me kacivaki, wilika na ivola e dodonu me wiliki, oti sa qai sureti koya na ivakatawa ni tabacakacaka. Ni oti na ivunau, ena tinia na soqoni na ivakatawa ni tabacakacaka ena sere e digia. Rawa ni sureta tale e dua me masu. Ena sega ni caka na ikarua ni koronivuli ena macawa ni veisiko. Ke tiko ena ivavakoso e dua na iwasewase lailai e duidui na kena vosa, era na soqoni ga dina ni caka na veisiko ena ivavakoso e vakarurugi kina. Ia era na tomana na ivavakoso ni sa gauna me rogoci kina na vunau ni ivakatawa ni tabacakacaka.

MACAWA NI SOQO NI TABACAKACAKA SE SOQO NI VEIWASEWASE

 19. Ena sega ni caka na soqoni ena macawa qori. Meda dikevi vakataki keda se vakavuvale na ituvatuva ni macawa ya.

MACAWA NI IVAKANANUMI

 20. Ke donuya na lomanimacawa na siga ni iVakananumi, ena sega ni caka ena siga qori na Soqoni ni Bula Vakarisito kei na Cakacaka Vakaitalatala. Ia ena sega ni tarova qori na kena vakayacori na soqoni ni cakacaka vakavunau ena siga oya.

IVAKATAWA NI SOQONI NI BULA VAKARISITO KEI NA CAKACAKA VAKAITALATALA

 21. Ena digitaka na ilawalawa qase e dua na qase me ivakatawa ni Soqoni ni Bula vaKarisito. Ena raica me tuvanaki vakamatau na soqoni qai muri vinaka na idusidusi qo. Me rau dau veivosaki kei na ivukevuke ni daunivakasala. Ni yaco ga mai na iVola ni Soqoni ni dua na vula, me vakarautaka sara na nodra itavi na gonevuli ena vula ya. (Raica na  parakaravu 5-​11) Me soli nodra itavi na gonevuli ni vo e tolu na macawa mera vakaitavi, ni vakayagataki na fomu Noda Bula vaKarisito kei na Cakacaka Vakaitalatala iTavi ena Soqoni (S-89-FN) .

JEAMENI NI SOQONI NI NODA BULA VAKARISITO KEI NA CAKACAKA VAKAITALATALA

  22. Ena lesi ena macawa yadua e dua na qase me jeameni ni Soqoni ni Bula vaKarisito kei na Cakacaka Vakaitalatala. (Ke lailai na qase, e rawa nira vakayagataki na dauveiqaravi ni ivavakoso matua.) Ena vakarautaka o koya na ivakamacala taumada, na railesuvi ena icavacava ni soqoni, na itavi e saravi kina na vidio ni vakatutu ni veivosaki, vaka kina na vidio e ikau ni lesoni yadua ni brochure na Veivakavulici. Ni bera na itavi yadua, e nona itavi me tukuna na usutu kei koya ena qarava. So na gauna, ke lailai na qase, ena rawa ni lesi tale ga ena so na itavi ena soqoni. Me lekaleka ga nona ivakamacala ena maliwa ni itavi yadua. Me digitaka na ilawalawa qase na qase e ganiti koya na itavi qo. Ena levu na gauna, era na jeameni ga o ira sa digitaki qori. Me vakatau ena ituvaki, ena rairai vakayagataki vakalevu me jeameni o koya na ivakatawa ni Soqoni ni Bula vaKarisito kei na Cakacaka Vakaitalatala. Ke sa ganita e dua na qase me liutaka na Vuli iVolatabu ni iVavakoso, ena rairai ganiti koya tale ga me jeameni. Ia me nanumi tiko ni na vinakati vua na jeameni me dau veivakasalataki vakayalololoma vei ira na gonevuli era vakaitavi. E nona itavi tale ga me raica me oti ena kena gauna na soqoni. (Raica na  parakaravu 14 kei na  17.) Ke veirauti na levu ni buturara, e rawa ni digitaka o jeameni me vakayagataki e dua tale na gusunivosa me vakamacalataka kina na itavi tarava. Ni vakamacala tiko o jeameni, sa rawa ni vakarau tu na tacida me vakaitavi ena imatai ni gusunivosa. E rawa tale ga ni vakayagataka o jeameni e dua na teveli ena buturara ni caka na itavi ni Wili iVolatabu kei na itavi ena Gumatua ena Cakacaka Vakaitalatala. Qo ena vakabula gauna.

KODINEITA NI ILAWALAWA QASE

 23. Ena tuvanaka na itavi kece ena soqoni na kodineita ni ilawalawa qase se dua tale na qase e vukei koya kina, vakavo ga na itavi ni gonevuli. Ena digia na jeameni ni soqoni e veimacawa vei ira na jeameni vakadonui sa digitaka na ilawalawa qase. Ena cakacaka vata kei na ivakatawa ni Soqoni ni Bula vaKarisito kei na Cakacaka Vakaitalatala me vakarautaki kina na ituvatuva ni soqoni ni veimacawa, qai kabi ena papa ni itukutuku.

IVUKEVUKE NI DAUNIVAKASALA

   24. Ena veiganiti me qarava na itavi qo e dua na qase ni ivavakoso e maqosa ena veivakavulici. Ke gadrevi, e nona itavi me veivakasalataki lo vei ira na qase kei na dauveiqaravi ni ivavakoso ena itavi ni soqoni era lesi kina, wili kina na itavi ena Soqoni ni Bula vaKarisito, na vunau soqovi levu, kei na veivakavulici se wiliwili ena vuli ni Vale ni Vakatawa se Vuli iVolatabu ni iVavakoso. (Raica na  parakaravu 17.) Ke ra lewe levu na qase ni ivavakoso matua, e rawa ni veiveisau e veiyabaki na ivukevuke ni daunivakasala. E sega ni gadrevi me veivakasalataki ni oti na itavi kece ga.

IKURI NI KORONIVULI:

 25. Ke laurai ni lewe levu na gonevuli, e rawa ni tuvanaki e dua se rua tale na koronivuli. Na koronivuli kece me dua na kena ivakatawa matua, ke rawa, me dua na qase ni ivavakoso. Ke vinakati, e rawa tale ga ni vakayagataki na dauveiqaravi ni ivavakoso e matua. Ena digia na ilawalawa qase o koya me qarava na itavi qo, se ke vinakati me veivuketaki. Me muria na daunivakasala na idusidusi e vakarautaki ena  parakaravu 16. Ke mani caka na ikuri ni koronivuli, era na gole kina na gonevuli ni oti ga na itavi ni Vakekeli ena Vosa ni Kalou. Mera tomana tale na vo ni ivavakoso ni oti na iwasewase ni soqoni na Gumatua ena Cakacaka Vakaitalatala. Ke saravi e dua na vidio ni vakatutu, mera sarava na vidio qori mai na ikarua ni koronivuli, ke rawa. Ke sega, me vakayagataki e dua na iyaya vakalivaliva mera sarava ga ena ikarua ni koronivuli.

VIDIO

 26. Ena dau vakaraitaki ena soqoni qo eso na vidio. Ena vakarautaki ena JW Library® na vidio ni macawa yadua, qai rawa ni saravi ena levu sara na iyaya vakalivaliva vovou. Ena so na gauna, e rawa ni saravi tale ena soqoni ni cakacaka vakavunau na vidio ni vakatutu ni dua na vula ke sa saravi oti ena Soqoni ni Bula vaKarisito.