Vunau ni Soro 9:1-24
-
Cabora o Eroni na isoro ni veibuli (1-24)
9 Ena ikawalu ni siga,+ e kacivi Eroni o Mosese kei ratou na luvena tagane, o ira tale ga na qase ni Isireli.
2 E kaya o koya vei Eroni: “Mo kauta e dua na luvenibulumakau me isoro ni ivalavala ca+ kei na dua na tamanisipi vinaka me isoro kama, qai cabora ena mata i Jiova.
3 Ia mo kaya vei ira na Isireli: ‘Kauta e dua na me tagane me isoro ni ivalavala ca, me dua tale ga na luvenibulumakau kei na dua na luvenisipi tagane me isoro kama, e yabaki dua, me ka vinaka,
4 qai dua na bulumakau tagane kei na tamanisipi, me isoro ni veiyaloni+ me cabori ena mata i Jiova, kei na isoro kakana+ e waki vata na waiwai, ni na rairai vei kemuni nikua o Jiova.’”+
5 Era mani kauta na ka e vakarota o Mosese ena mata ni valelaca ni veitavaki. Era qai lako yani na isoqosoqo kece mera lai tu ena mata i Jiova.
6 E qai kaya o Mosese: “Qo na ka e vakarota o Jiova moni cakava, me laurai kina vei kemuni na lagilagi i Jiova.”+
7 E qai kaya vei Eroni o Mosese: “Toro yani ina icabocabonisoro qai cabora nomu isoro ni ivalavala ca+ kei na nomu isoro kama, mo veisorovaki ena vukumu+ kei na vuku ni nomu vuvale, cabora tale ga nodra isoro na tamata,+ qai veisorovaki ena vukudra+ me vaka ga e vakarota o Jiova.”
8 Sega ni bera ni sa toro yani ena icabocabonisoro o Eroni qai vakamatea na luvenibulumakau me isoro ni ivalavala ca ena vukuna.+
9 Eratou qai kauta yani na dra+ vei Eroni na luvena tagane, e tonia e dua na iqaqaloniligana ena dra qai biuta ena ileu ni icabocabonisoro, e sova tale ga na vo ni dra ena vu ni icabocabonisoro.+
10 E cakava me kubou ena icabocabonisoro na uro, na ivi, kei na uro ni yate mai na isoro ni ivalavala ca me vaka ga e vakaroti Mosese+ kina o Jiova.
11 E qai vakama na lewena kei na kulina ena bukawaqa ena taudaku ni keba.+
12 E vakamatea sara o koya na isoro kama, ratou qai solia vua na dra na luvei Eroni tagane, e kureitaka wavolita tale ga ena icabocabonisoro+ taucoko.
13 Eratou solia vua na tikitiki ni isoro kama kei na uluna, e qai cakava o koya me kubou ena icabocabonisoro.
14 E savata sara na wawa kei na yavana qai cakava me kubou ena dela ni isoro kama ena icabocabonisoro.
15 E qai kauta na nodra isoro na tamata, e taura na me ni isoro ni ivalavala ca e baleti ira, e vakamatea qai cabora na isoro ni ivalavala ca me vaka ga na kena imatai.
16 E qai cabora na isoro kama, e cakava qo me vaka ga na kena ivakarau.+
17 E cabora tarava na isoro kakana,+ taura eso e ligana qai cakava me kubou ena icabocabonisoro, me ikuri ni isoro kama ena mataka.+
18 Oti oya e vakamatea na bulumakau tagane kei na tamanisipi ni nodra isoro ni veiyaloni na tamata. Eratou qai solia vua na dra na luvei Eroni tagane, e kureitaka wavolita tale ga ena icabocabonisoro+ taucoko.
19 Na tikina urouro ni bulumakau tagane+ kei na buina urouro ni tamanisipi, na uro e kabita na wawa, na ivi, kei na uro ni yate,+
20 eratou biuta na uro kece oya ena sarisari, oti e qai cakava o koya na tikitiki ni uro me kubou ena icabocabonisoro.+
21 Ia na sarisari kei na yavana imatau, e yalovaka o Eroni me isoro yalovaki ena mata i Jiova, me vaka ga e vakarota o Mosese.+
22 E qai dodoka na ligana o Eroni vei ira na tamata qai vosa vakalougatataki ira,+ oti qai lako sobu mai ni sa cabora na isoro ni ivalavala ca, na isoro kama, kei na isoro ni veiyaloni.
23 Erau curu ena loma ni valelaca ni veitavaki o Mosese kei Eroni, oti erau curu mai tuba qai vosa vakalougatataki ira na tamata.+
E laurai vei ira kece na tamata na lagilagi i Jiova,+
24 e qai lako sobu mai vei Jiova na bukawaqa,+ e yameca sara na isoro kama kei na tikitiki ni uro ena icabocabonisoro. Nira raica qo na tamata kece, era kaila ra qai tekicuva ina qele.+
