Vunau ni Soro 4:1-35
-
Na isoro ni ivalavala ca (1-35)
4 E qai kaya vei Mosese o Jiova:
2 “Tukuna vei ira na Isireli, ‘Ke dua e sega ni nakita na nona ivalavala ca+ ni cakava e dua na ka e vakarota o Jiova me kua ni caka:
3 “‘Ke valavala ca+ na bete e lumuti+ qai vakavuna mera cala na tamata, me cabora o koya vei Jiova e dua na luvenibulumakau tagane, me ka vinaka, me isoro ni ivalavala ca e cakava.+
4 Ena kauta yani o koya na bulumakau tagane ena icurucuru ni valelaca ni veitavaki+ ena mata i Jiova, qai tabaka na ulu ni bulumakau tagane ena ligana, me qai vakamatea na bulumakau tagane ena mata i Jiova.+
5 Me qai taura na bete e lumuti+ eso na dra ni bulumakau tagane qai kauta yani ina valelaca ni veitavaki,
6 me qai tonia na bete e dua na iqaqaloniligana ena dra,+ qai kureitaka vakavitu+ na dra ena mata i Jiova donuya na ilatilati ena vanua tabu.
7 Ena biuta tale ga na bete eso na dra ena ileu ni icabocabo ni ka boivinaka,+ ena mata i Jiova ena loma ni valelaca ni veitavaki, qai livia na vo ni dra ni bulumakau tagane ena vu ni icabocabo ni isoro kama+ ena icurucuru ni valelaca ni veitavaki.
8 “‘Ena kauta tani na uro kece ni bulumakau tagane ni isoro ni ivalavala ca, na uro e kabita na wawa, kei na uro kece e tu ena yasa ni wawa,
9 na rua na ivi kei na kena uro volekata na dibina. Ena kauta laivi tale ga mai o koya na uro ni yate kei na ivi.+
10 Ena tautauvata ga kei na uro e kau tani mai na bulumakau tagane me isoro ni veiyaloni.+ Me qai cakava qori na bete me kubou ena icabocabo ni isoro kama.
11 “‘Ia na kuli ni bulumakau tagane kei na lewena kece, na uluna, na yavana, na kena wawa, kei na dena+—
12 na vo ni bulumakau tagane—me kau yani ena taudaku ni keba ena dua na vanua savasava e dau sova kina na dravusa,* me qai vakama ena dela ni kau ena bukawaqa.+ Me vakamai ena vanua e dau sova kina na dravusa.
13 “‘Ke ra cala na isoqosoqo taucoko ni Isireli nira sega ni nakita nodra ivalavala ca,+ e lecava na ivavakoso nira sa cakava e dua na ka e vakaroti ira kina o Jiova mera kua ni cakava,+
14 qai kilai na ivalavala ca, me cabora na ivavakoso e dua na luvenibulumakau tagane me isoro ni ivalavala ca, mera qai kauta yani ena mata ni valelaca ni veitavaki.
15 Era na tabaka na ulu ni bulumakau tagane ena ligadra na qase ni Isireli ena mata i Jiova, ena qai vakamatei na bulumakau tagane ena mata i Jiova.
16 “‘Ena qai kauta yani na bete e lumuti eso na dra ni bulumakau tagane ina valelaca ni veitavaki.
17 Me tonia na bete e dua na iqaqaloniligana ena dra qai kureitaka vakavitu eso ena mata i Jiova ena mata ni ilatilati.+
18 Ena qai biuta na bete eso na dra ena ileu ni icabocabo+ ena mata i Jiova ena loma ni valelaca ni veitavaki, me qai livia na vo kece ni dra ena vu ni icabocabo ni isoro kama ena icurucuru ni valelaca ni veitavaki.+
19 Ena kauta laivi mai o koya na kena uro kece, qai cakava me kubou ena icabocabonisoro.+
20 Ena cakava tale ga ena bulumakau tagane qo na ka vata ga a cakava ena bulumakau tagane adua me isoro ni ivalavala ca. Ena cakava va qori o koya, ena qai sorovaki ira+ na bete, era na vosoti kina.
21 Me kauta ena taudaku ni keba na bulumakau tagane me qai vakama, me vaka ga na nona vakama na imatai ni bulumakau tagane.+ Qori na isoro ni ivalavala ca ni ivavakoso.+
22 “‘Ni sega ni nakita e dua na iliuliu+ na nona ivalavala ca, ni cakava e dua na ka mai na ka kece e vakarota o Jiova na nona Kalou me kua ni caka, e mani cala,
23 se vakatakilai vua ni sa valavala ca ena ivakaro, me qai kauta yani o koya me nona isoro e dua na me tagane gone, me ka vinaka.
24 Ena tabaka na ulu ni me gone ena ligana qai vakamatea ena vanua e vakamatei kina na isoro kama ena mata i Jiova.+ Qori na isoro ni ivalavala ca.
25 Ena taura na bete eso na dra ni isoro ni ivalavala ca ena iqaqaloniligana qai biuta ena ileu+ ni icabocabo ni isoro kama, qai sova na vo ni kena dra ena vu ni icabocabo ni isoro kama.+
26 Ena qai cakava me kubou na kena uro kece ena icabocabonisoro me vaka ga na uro ni isoro ni veiyaloni,+ ena sorovaki koya na bete ena vuku ni nona ivalavala ca, ena qai vosoti o koya.
27 “‘Ke sega ni nakita nona valavala ca e dua na lewenivanua, qai cala ni cakava e dua na ka e vakarota o Jiova me kua ni caka,+
28 se, sa vakatakilai vua na ivalavala ca e cakava, me qai kauta yani me nona isoro e dua na luvenime yalewa, me ka vinaka, ena vuku ni ivalavala ca e cakava.
29 Ena tabaka na ulu ni isoro ni ivalavala ca ena ligana qai vakamatea na isoro ni ivalavala ca ena vanua vata ga ni isoro kama.+
30 Ena taura na bete eso na kena dra ena iqaqaloniligana qai biuta ena ileu ni icabocabo ni isoro kama, me qai sova o koya na vo kece ni kena dra ena vu ni icabocabonisoro.+
31 Ena kauta laivi mai na kena uro+ kece me vaka ga na kena kau laivi na uro mai na isoro ni veiyaloni,+ ena qai cakava na bete me kubou qori ena icabocabonisoro me talei* vei Jiova na kena iboi, ena sorovaki koya na bete, ena qai vosoti o koya.
32 “‘Ke cabora e dua na lami me nona isoro ni ivalavala ca, me kauta yani o koya e dua na lami yalewa, me ka vinaka.
33 Ena tabaka na ulu ni isoro ni ivalavala ca ena ligana qai vakamatea me isoro ni ivalavala ca ena vanua vata ga e vakamatei+ kina na isoro kama.
34 Ena taura na bete eso na dra ni isoro ni ivalavala ca ena iqaqaloniligana qai biuta ena ileu ni icabocabo ni isoro kama,+ ena qai sova na vo kece ni dra ena vu ni icabocabonisoro.
35 Ena kauta laivi na kena uro kece me vaka ga na kena dau kau laivi na uro ni luvenisipi tagane ni isoro ni veiyaloni, ena qai vakama na bete me kubou ena icabocabonisoro ena dela ni isoro i Jiova e cabori ena bukawaqa,+ ena sorovaki koya na bete ena vuku ni ivalavala ca e cakava, ena qai vosoti o koya.+
iVakamacala e ra
^ Se “na dravusa urouro,” oya na dravusa e veiwaki kei na uro ni isoro.
^ Se “me veivakalomavinakataki, malumu.” Ipe., “veivakacegui.”