Vunau ni Soro 20:1-27
20 E vosa tale vei Mosese o Jiova, e kaya:
2 “Mo tukuna vei ira na Isireli, ‘Ke dua e solia vei Moleke na luvena, se mani dua vei kemuni na Isireli se dua vei ira na vulagi e tiko e Isireli, me vakamatei sara ga.+ Mera vakaviriki koya ena vatu na lewenivanua me mate sara.
3 Ena duatani sara ga na mataqu vua na tamata oya, au na muduki koya laivi* vei ira na kainona, ni sa solia eso na luvena vei Moleke qai vakadukadukalitaka na noqu vanua tabu,+ e beca tale ga na yacaqu tabu.
4 Ke ra nakita na lewenivanua mera tabonaka na matadra mai na ka e cakava na tamata oya, ni solia na luvena vei Moleke ra qai sega ni vakamatei koya,+
5 ena duatani sara ga na mataqu vua na tamata oya kei na nona vuvale.+ Au na muduki koya laivi* vei ira na kainona kei ira kece era tomani koya ena nodra vakasaqamuataki ira vei Moleke.
6 “‘Ke dua e golevi ira na dauvakacuru+ kei ira na dau tukuna na ka se bera ni yaco+ mera saqamua vata vakayalo, au na sega sara ga ni vakadonui koya na tamata oya, qai muduki koya laivi* vei ira na kainona.+
7 “‘Moni vakatabui kemuni, moni savasava+ mai, ni o yau o Jiova na nomuni Kalou.
8 Moni dei ena noqu lawa, ni vakayacora sara.+ O yau o Jiova, o koya e vakatabui kemuni.+
9 “‘Ke dua na tamata e rulaka* na tamana se tinana, me vakamatei+ sara ga. Ni rulaki tamana se tinana, sa na baleti koya ga na nona mate.
10 “‘Ke dua na tagane e veibutakoci kei na watina e dua tale na tagane: me vakamatei sara ga o koya e veibutakoci kei na watina na wekana, me rau* vakamatei+ sara ga.
11 Na tagane e mocevata kei na wati tamana, sa vakamadualaki tamana.*+ Me rau vakamatei sara ga. Sa na baleti rau ga na nodrau mate.
12 Ke dua na tagane e mocevata kei na wati luvena tagane, me rau vakamatei sara ga. Erau sa vakatanitaka na ka e dodonu. Sa na baleti rau ga na nodrau dra.+
13 “‘Ke dua na tagane e mocevata kei na dua tale na tagane me vaka na nona mocevata kei na yalewa, erau sa cakava na ka e vakasisila.+ Me rau vakamatei sara ga. Sa na baleti rau ga na nodrau dra.
14 “‘Ke dua na tagane e taura e dua na yalewa qai veiyacovi kei tinai yalewa, qori na ivalavala torosobu.+ Me ratou vakamai kece ena bukawaqa,+ me kua kina ni caka tiko ga ena kemuni maliwa na ivalavala torosobu.
15 “‘Ke dua na tagane e veiyacovi kei na manumanu, me vakamatei sara ga o koya, moni vakamatea tale ga na manumanu.+
16 Ke dua na yalewa e torova na manumanu me rau veiyacovi,+ mo vakamatea na yalewa kei na manumanu. Me rau vakamatei sara ga. Sa na baleti rau ga na nodrau dra.
17 “‘Ke dua na tagane e veiyacovi kei na ganena, na luvei tamana yalewa se luvei tinana yalewa, qai raica o tagane na luvawale i yalewa, e raica tale ga o yalewa na luvawale i tagane, qo na ka vakamadua.+ Me rau muduki laivi* ena matadra na wekadrau. Sa vakamaduataki ganena na tagane qori.* Me saumitaro ena nona cala.
18 “‘Ke dua na tagane e mocevata kei na dua na yalewa donuya nona matenivula rau qai veiyacovi, erau sa vakaraitaka ni sega ni ka tabu vei rau na dra.+ Me rau muduki laivi* vei ira na wekadrau.
19 “‘Kua ni veiyacovi kei na yalewa e taci tinamu se ganei tamamu, ni o na vakamaduataka kina na wekamu vakadra.+ Me rau saumitaro ena nodrau cala.
20 Na tagane e mocevata kei na wati taci tamana, e vakavuna na madua i taci tamana.*+ Erau na saumitaro ena nodrau ivalavala ca. Erau na mate, rau na sega ni vakaluveni.
21 E ka vakasisila ke dua na tagane e taura na wati tacina.+ Sa vakavuna na madua i tacina.* Erau na sega ni vakaluveni.
22 “‘Moni dei ena noqu lawa kece kei na noqu lewa+ kece, moni cakava sara,+ me kua kina ni luaraki kemuni laivi na vanua au sa kauti kemuni tiko kina moni lai tawana.+
23 Moni kua ni muria na nodra lawa na veimatanitu au sa vakatala laivi mai matamuni,+ nira cakava voli mai na ka kece qo, au qai sevaki ira kina.+
24 Oya na vuna au tukuna kina vei kemuni: “Oni na taukena na nodra vanua, au na qai solia vei kemuni moni taukena, na vanua e drodro kina na sucu kei na oni.+ O yau o Jiova na nomuni Kalou, au sa wasei kemuni tani vei ira na veimatatamata.”+
25 Moni vakaduiduitaka na manumanu e savasava kei na kena e dukadukali, na manumanuvuka e dukadukali kei na kena e savasava,+ moni kua ni cakava moni vakasisilataki ena vuku ni manumanu, se manumanuvuka, se cava tale e veiqasiyaki voli ena qele au sa wasea tani moni raica me dukadukali+ vei kemuni.
26 Moni savasava vei au, ni o yau o Jiova au savasava,+ au sa wasei kemuni tani vei ira na veimatatamata moni noqu.+
27 “‘Me vakamatei sara ga na tagane se yalewa e dauvakacuru se dau tukuna na ka se bera ni yaco.+ Mera vakaviriki rau ena vatu me rau mate. Sa na baleti rau ga na nodrau dra.’”
iVakamacala e ra
^ Se “na vakamatei.”
^ Se “na vakamatei.”
^ Se “qai vakamatei.”
^ Se “e tukuna me yaco na ca vei.”
^ Ipe., “na tagane e veibutakoci kei na yalewa e veibutakoci.”
^ Ipe., “na luvawale i tamamu.”
^ Se “rau vakamatei.”
^ Ipe., “na luvawale i ganena.”
^ Se “rau vakamatei.”
^ Ipe., “na luvawale i taci tamana.”
^ Ipe., “na luvawale i tacina.”
