Vunau ni Soro 16:1-34
-
Na Siga ni Veisorovaki (1-34)
16 E vosa vei Mosese o Jiova ni sa rau mate na luvei Eroni tagane, erau mate ni rau torovi Jiova.+
2 E kaya vei Mosese o Jiova: “Tukuna vei Eroni na tuakamu me kua ni lako tu ga yani ena dua na gauna ina vanua tabu+ e loma ni ilatilati,+ ena mata ni isogo ena dela ni Kato, me kua kina ni mate,+ niu na rairai ena o+ ena dela ni isogo.+
3 “Qo na ka me kauta o Eroni ni lako ina vanua tabu: e dua na luvenibulumakau tagane me isoro ni ivalavala ca+ kei na dua na tamanisipi me isoro kama.+
4 Me tokara o koya na isulu balavu+ tabu e caka mai na lineni kei na tarausese lekaleka+ lineni me ubia na yagona,* qai vauci koya ena ivaunitolo+ lineni kei na ivauniulu+ lineni e uluna. Era isulu tabu+ qori. Ena sili o koya ena wai+ qai vakaisulu kina.
5 “Me kauta mai o koya vei ira na isoqosoqo ni Isireli+ e rua na luvenime tagane me isoro ni ivalavala ca kei na dua na tamanisipi me isoro kama.
6 “Me cabora o Eroni na luvenibulumakau tagane me nona isoro ni ivalavala ca, ena qai veisorovaki o koya ena vukuna+ kei na nona vuvale.
7 “Ena qai kauta na me ruarua qai vakaduri rau ena mata i Jiova ena icurucuru ni valelaca ni veitavaki.
8 Ena vakawirimadigitaka o Eroni na me ruarua, me kila kina e vei me nei Jiova, e vei na me Asasela.*
9 Ena kauta o Eroni na me e digitaki ena vakawirimadigi+ me nei Jiova, qai cabora me isoro ni ivalavala ca.
10 Ia na me Asasela e digitaki ena vakawirimadigi me kau bulabula yani me duri ena mata i Jiova me caka kina na veisorovaki, oti me qai vakatalai na me Asasela ina vanua talasiga.+
11 “Ena cabora o Eroni na bulumakau tagane ni nona isoro ni ivalavala ca, me qai veisorovaki ena vukuna kei na nona vuvale, oti ena vakamatea na bulumakau tagane ni isoro ni ivalavala ca, me baleti koya.+
12 “Ena qai taura o koya na itawatawa+ ni ka boivinaka e sinai tu ena qilaiso waqa mai na icabocabonisoro+ ena mata i Jiova, kei na rua na iyaku ka boivinaka+ sa pauta tu, ena qai kauta o koya i loma ni ilatilati.+
13 Ena biuta tale ga na ka boivinaka e dau vakamai ena dela ni bukawaqa ena mata i Jiova,+ ena qai solega na isogo+ ni Kato na o ni ka boivinaka, e toka ena dela ni iVakadinadina,+ me kua kina ni mate o koya.
14 “Ena kauta o koya eso na dra ni bulumakau+ tagane qai kureitaka ena iqaqaloniligana ena mata ni isogo ena tokalau, ena qai kureitaka vakavitu eso na dra ena iqaqaloniligana ena mata ni isogo.+
15 “Ena qai vakamatea o koya na me ni isoro ni ivalavala ca, me baleti ira na tamata,+ qai kauta na kena dra e loma ni ilatilati,+ qai cakava ena kena dra+ na ka vata ga e cakava o koya ena dra ni bulumakau tagane, me vakaturuma donuya na isogo kei na mata ni isogo.
16 “Me veisorovaki o koya ena vuku ni vanua tabu me baleta na nodra ivalavala dukadukali na Isireli, na nodra talaidredre kei na nodra ivalavala ca,+ qori tale ga na ka me cakava o koya ena vuku ni valelaca ni veitavaki e tiko ena kedra maliwa, ena maliwa ni nodra ivalavala dukadukali.
17 “Me kua tale ni dua na tamata me tiko ena valelaca ni veitavaki mai na gauna e curu kina i loma o koya me veisorovaki ena vanua tabu me yacova ni sa curu mai tuba. Ena veisorovaki o koya ena vukuna kei na nona vuvale,+ ena vuku tale ga ni ivavakoso taucoko ni Isireli.+
18 “Ena qai lako yani ina icabocabonisoro+ ena mata i Jiova, me sorovaka, ena qai kauta o koya eso na dra ni bulumakau tagane kei na so na dra ni me, qai biuta ena ileu ni icabocabonisoro ena yasana taucoko.
19 Ena kureitaka tale ga kina vakavitu eso na dra ena iqaqaloniligana, ena vakasavasavataka qai vakatabuya mai na nodra ivalavala dukadukali na Isireli.
20 “Ni sa sorovaka+ oti o koya na vanua tabu, na valelaca ni veitavaki, kei na icabocabonisoro,+ ena qai cabora o koya na me bula.+
21 Ena tabaka na ulu ni me bula ena ligana ruarua o Eroni, qai vakatusa kina na nodra cala kece na Isireli, na nodra talaidredre kece, kei na nodra ivalavala ca kece, ena qai biuta qori ena ulu ni me+ qai vakatala yani ina vanua talasiga ena liga ni tagane e digitaki me cakava qo.*
22 Ena vaka sara ga e colata tu na me na nodra cala+ kece ina vanualala,+ ena qai sereka o koya na me ina vanua talasiga.+
23 “Ena qai curu ina valelaca ni veitavaki o Eroni, oti ena luvata tani na isulu lineni a tokara ni curu ina vanua tabu, ena qai laiva tu i kea.
24 Me sili ena wai+ o koya* ena dua na vanua tabu, tokara tale ga nona isulu+ qai curu mai tuba me lai cabora na nona isoro kama+ kei na nodra isoro kama+ na tamata, me qai veisorovaki ena vukuna, ena vukudra tale ga na tamata.+
25 Ena cakava me kubou na uro ni isoro ni ivalavala ca ena icabocabonisoro.
26 “Me savata na nona isulu qai sili ena wai na tagane e vakatala laivi na me Asasela,+ oti me qai curu mai ina keba.
27 “Ena kau tani ina taudaku ni keba na bulumakau tagane ni isoro ni ivalavala ca kei na me ni isoro ni ivalavala ca, a kau na kedrau dra i loma ni vanua tabu me caka kina na veisorovaki, ena qai vakamai ena bukawaqa na kulidrau, na lewedrau, kei na dedrau.+
28 O koya e vakama qori me savata na nona isulu qai sili ena wai, oti me qai lako mai ina keba.
29 “Qo na lawa tudei vei kemuni: Ena ikavitu ni vula, ena ikatini ni siga, moni vakararawataki* kemuni, moni kua tale ga ni cakava e dua na cakacaka,+ se mani itaukei se dua e tiko vulagi kei kemuni.
30 Qo na siga ena caka kina na veisorovaki+ ena vukumuni, me tukuni kina ni oni savasava. Oni na savasava mai na nomuni ivalavala ca kece ena mata i Jiova.+
31 Qo na siga ni vakacecegu moni vakacegu sara ga kina, moni qai vakamalumalumutaki kemuni.+ Qo na lawa tudei.
32 “Na bete e lumuti+ qai buli* me veiqaravi vakabete+ me isosomi kei tamana,+ ena veisorovaki qai tokara na isulu lineni,+ na isulu tabu.+
33 Ena veisorovaki ena vuku ni tikina tabu,+ na valelaca ni veitavaki,+ kei na icabocabonisoro,+ ena veisorovaki tale ga ena vukudra na bete kei ira kece na tamata ena ivavakoso.+
34 Qo na lawa tudei vei kemuni,+ me caka kina na veisorovaki vei ira na Isireli ena vuku ni nodra ivalavala ca kece, me vakadua e veiyabaki.”+
E mani cakava o koya me vaka sara ga e vakaroti Mosese kina o Jiova.
iVakamacala e ra
^ Se “na lewena e laurai.”
^ Ipe., “Na me nei Asasela.” Sega ni kilai na ibalebale dina ni ‘nei Asasela.’ E dua na matavosa e vakamacalataka na me e vakatalai ina vanua talasiga. Vakatauvatana na Vunau ni Soro 16:10, 26.”
^ Se “na tagane e tu vakarau.”
^ Ipe., “wai na lewena.”
^ E rairai dusia na lolo kei na so tale na vakatatabu va qori.
^ Ipe., “qai vakasinaiti na ligana.”
