Vunau ni Soro 13:1-59
13 E vosa tale vei Mosese kei Eroni o Jiova, e kaya:
2 “Ke tekivu ena kuli* ni dua na tamata na vuvuce, karokaro, se rama, oti e qai vaka tu na mate ni vukavuka*+ ena kuliniyagona, me qai kau yani o koya vei Eroni na bete se dua vei ira na luvena tagane e bete.+
3 Me dikeva na bete na mate ena kuliniyagona. Ni sa vulavula na vutina ena tikina sa tu kina na mate, e laurai tale ga ni sa kakana na mate ena kuliniyagona, qo na vukavuka. Ena dikeva na bete qai tukuna ni dukadukali o koya.
4 Ia ke vulavula mai na kuliniyagona sa rama qai laurai ni sega ni kakana ena kuliniyagona, e sega tale ga ni vulavula na vutina, ena korotinitaka na tamata tauvimate na bete me vitu na siga.+
5 Ena qai dikevi koya na bete ena ikavitu ni siga, ke laurai ni sa oti na mate qai sega ni tete ena kuliniyagona, ena korotinitaki koya na bete me vitu tale na siga.
6 “Me dikevi koya tale na bete ena ikavitu ni siga, ke sa seavu na mate qai sega ni tete ina kuliniyagona, ena tukuna na bete ni sa savasava+ o koya, qori e karokaro wale ga. Ena qai savata na nona isulu me savasava.
7 Ia ke tete dina na karokaro ena kuliniyago ni oti nona rairai ena mata ni bete me vakadeitaki nona savasava, ena qai rairai tale o koya ena mata ni bete.
8 Ena dikeva na bete, ke sa tete na karokaro ina kuliniyago, ena tukuna na bete ni dukadukali o koya. Qori na vukavuka.+
9 “Ke tauva e dua na mate ni vukavuka, me kau o koya vua na bete,
10 ena qai dikevi koya+ na bete. Ke sa vulavula na ka e tutubu e kuliniyago, qai veisautaka na vutika* me vulavula, qai tadola tu na mavoa+ ena tikina e tutubu,
11 qori na vukavuka sa dede tu ena kuliniyagona, ena qai tukuna na bete ni dukadukali o koya. Me kua ni korotinitaki+ koya, ni dukadukali.
12 Ia ke tekivu tete na vukavuka ena kuliniyago taucoko, qai robota na tamata oya na vukavuka me tekivu mai na ulu yaco ina yava, na vanua e raica rawa na bete,
13 sa dikevi koya tale ga na bete qai raica ni sa robota na kuliniyagona taucoko na vukavuka, ena qai tukuna ni sa savasava o tauvimate.* Sa veisau kece me vulavula, sa savasava o koya.
14 Ia ena gauna kece e laurai kina e dua na mavoa e tadola tu, ena dukadukali o koya.
15 Ni raica na bete na mavoa e tadola tu, ena tukuna ni dukadukali+ o koya. E dukadukali na mavoa e tadola tu. Qo na vukavuka.+
16 Ia ke veisau tale me vulavula na mavoa e tadola tu, ena qai lako o koya vua na bete.
17 Ena dikevi koya+ na bete, ke sa vulavula na mate, ena qai tukuna na bete ni sa savasava o tauvimate. Sa savasava o koya.
18 “Ke tubu e dua na bo ena kuliniyagona e dua, oti qai mavo,
19 ia sa tu ena tikina e bo na vuvuce vulavula, se sa tekivu kina na rama e vulavula via damu, me qai lai vakaraitaki koya vua na bete.
20 Ena dikeva+ na bete, ke laurai ni sa kakana e kuliniyagona qai veisau me vulavula na vutina, ena tukuna na bete ni dukadukali o koya. Qo na vukavuka e tekivu ga mai na bo.
21 Ia ke dikeva na bete qai raica ni sega kina na vutika vulavula, e sega tale ga ni kakana ena kuliniyago qai seavu na kena irairai, ena qai korotinitaki koya na bete me vitu na siga.+
22 Ke laurai levu ni sa teteva na kuliniyago, ena tukuna na bete ni dukadukali o koya. E dua na mate qo.
23 Ke tiko ga ena dua na tikina na rama qai sega ni tete, qori e vuvuca ga ni bo, ena qai tukuna na bete ni sa savasava+ o koya.
24 “Se ke dua e vakamawe tu na nona kama, qai vulavula via damu mai na lewena bulabula ena wenikama, se vulavula ga,
25 ena qai dikeva qori na bete. Ke sa veisau na vutika ena tikina oya me vulavula, qai laurai ni kakana ena kuliniyago, qo na vukavuka e tekivu ga ena wenikama, ena qai tukuna na bete ni dukadukali o koya. Qo na vukavuka.
26 Ia ke dikeva na bete qai raica ni sega na vutika vulavula ena tikina oya, e sega tale ga ni kakana ena kuliniyago qai seavu yani, ena qai korotinitaki koya na bete me vitu na siga.+
27 Ena dikevi koya na bete ena ikavitu ni siga, ke laurai levu tale ga ni sa teteva na kuliniyago, ena qai tukuna na bete ni sa dukadukali. Qo na vukavuka.
28 Ke tiko ga ena dua na tikina na rama qai sega ni tete ena kuliniyago qai seavu yani, qo na vuvuce ga ni wenikama, ena qai tukuna na bete ni savasava o koya, ni qo na vuvuca ni wenikama.
29 “Ni dua na tagane se yalewa e tekivu e uluna se kumina e dua na mate,
30 ena qai dikeva na mate+ na bete. Ke laurai ni sa kakana ina kuliniyago, qai dromodromo na drauniulu,* e mamare tale ga, ena qai tukuna na bete ni dukadukali o koya, qo na mate ni kuli ni qavokavoka se na kumi. Qori na vukavuka ni ulu se kumi.
31 Ia ke raica na bete ni sega ni kakana ina kuliniyago na mate qai sega kina na drauniulu loaloa, me korotinitaki tauvimate na bete me vitu na siga.+
32 Ena dikeva na bete na mate ena ikavitu ni siga, ke se sega ni tete na tikina e tu kina na mate, e sega na drauniulu dromodromo qai laurai ni se sega ni kakana ena kuliniyago, na tikina e tu kina na mate,
33 me toro o koya, ia ena sega ni toroya na tikina e tiko kina na mate. Ena qai korotinitaki tauvimate na bete me vitu na siga.
34 “Ena dikeva tale na bete na tikina e tiko kina na mate ena ikavitu ni siga, ke se sega ni teteva na kuliniyago na mate ni kuli ni qavokavoka kei na kumi, e sega tale ga ni kakana ina kuliniyago, me qai tukuna na bete ni sa savasava o koya, me savata na nona isulu me qai savasava.
35 Ia ke laurai levu ni sa teteva na kuliniyago na mate ni oti nona vakasavasavataki,
36 ena dikevi koya na bete, ke sa teteva na kuliniyago na mate, e sega ni vinakati me vaqara na bete na drauniulu dromodromo, ni dukadukali o koya.
37 Ke laurai ena vakadidike ni se sega ni tete na mate qai tubu kina na drauniulu loaloa, sa mavo na mate. E savasava o koya, ena qai tukuna na bete ni sa savasava+ o koya.
38 “Ke tekivu rama na kuliniyago* ni dua na tagane se yalewa, qai vulavula na rama,
39 ena dikeva na bete.+ Ke vulavula siawa na rama ena kuliniyago, qori na tutubu e sega ni veivakaleqai e basika ena kuliniyago. E savasava na tamata qori.
40 “Ke dua na tagane e mira na drauniuluna qai cou, e savasava o koya.
41 Ke caraqa yani e yadrena qai cou, e savasava o koya.
42 Ia ke tekivu e dua na mavoa e vulavula via damu ena cou ena kuli ni nona qavokavoka se yadrena, qo na vukavuka e tekivu tete ena kuli ni nona qavokavoka se yadrena.
43 Ena dikevi koya na bete, ke vulavula via damu na vuvuce mai na mate ena vanua e cou e buradelana se yadrena, qai vaka tale na irairai ni vukavuka ena kuliniyagona,
44 e vukavuka o koya. E dukadukali o koya, me qai tukuna na bete ni dukadukali ena vuku ni mate e uluna.
45 Ia o koya na vukavuka e tu vua na mate, me dresulaki na nona isulu, me qai laiva tu ga na uluna me sakuca, me ubia tale ga na nona sominiwai me qai kacivaka, ‘Dukadukali, dukadukali!’
46 Ena dukadukali tiko o koya ena gauna kece e tu kina vua na mate. Ni dukadukali o koya, me tiko taudua. Ena vakaitikotiko ena taudaku ni keba.+
47 “Ke vakadukara e dua na isulu na mate ni vukavuka, se mani vutinisipi se dua na isulu lineni,
48 se na wa* ni isulutali e caka mai na lineni se na vutinisipi, se na kuli se na cava ga e caka mai na kuli,
49 qai drokadroka via dromodromo se damudamu na duka mai na mate e vakadukara na isulu oya, se na kuli, se na wa* ni isulutali, se na cava ga e caka mai na kuli, qo na duka mai na vukavuka, me qai vakaraitaki vua na bete.
50 Ena dikeva na mate na bete, me qai korotinitaka na mate me vitu na siga.+
51 Ni dikeva na mate ena ikavitu ni siga qai raica ni sa tete ina isulu, ena wa* ni isulu tali, se na kuli (se mani cava e vakayagataki kina na kuli), qo dina na vukavuka e dauveivakamatei, e dukadukali+ tale ga.
52 Me vakama o koya na isulu, se na wa* ni isulutali ena vutinisipi se lineni, se na cava ga e caka mai na kuli e sa tekivu kina na mate, ni qo na vukavuka e sega na kena iwali. Me vakamai ena bukawaqa.
53 “Ia ke dikeva na bete qai sega ni tete na mate ena isulu, se na wa* ni isulutali se na cava ga e caka mai na kuli,
54 ena qai vakarota na bete mera savata na ka e vakadukai, ena qai korotinitaki o koya me vitu tale na siga.
55 Ena qai dikeva na bete na ka e vakadukai ni sa sava oti vakavinaka. Ke sega ni veisau na irairai ni duka, qai sega mada ga ni tete na mate, e dukadukali qori. Mo vakama ena bukawaqa, ni sa kakana mai loma se i tuba.
56 “Ia ke dikeva na bete, qai sa seavu na tikina e vakadukai, ni sa sava oti vakavinaka, ena qai dresuka tani o koya mai na isulu se na kuli se na wa* ni isulutali.
57 Ia ke se laurai tiko ga ena dua tale na yasa ni isulu, se na wa* ni isulutali, se na cava ga e caka mai na kuli, e tete tiko, mo qai vakama na ka dukadukali cava ga ena bukawaqa.+
58 Ia ni sa yali na duka mai na isulu, se na wa* ni isulutali, se na cava ga e caka mai na kuli o savata, me qai sava ena ikarua ni gauna, ena qai savasava.
59 “Qo na lawa ni vukavuka ena isulu vutinisipi se lineni, se wa* ni isulutali, se na cava ga e caka mai na kulinimanumanu, me tukuni kina ni sa savasava se dukadukali.”
iVakamacala e ra
^ Bau rabailevu toka na ibalebale ni vosa vakaIperiu e vakadewataki me “vukavuka,” e rairai wili kina na veimataqali mate ni kuli e dau veidewavi. De okati tale ga kina na mate e tauva na isulu kei na vale.
^ Ipe., “ena kuli ni lewedra.”
^ Se “na drauniuluna,” “kumina.”
^ Se “ni sa sega ni veidewavi.”
^ Se “na kumina.”
^ Ipe., “ena kuli ni lewedra.”
^ Ipe., “wa vakadodonu se wa vakababa.”
^ Ipe., “wa vakadodonu se wa vakababa.”
^ Ipe., “wa vakadodonu se wa vakababa.”
^ Ipe., “wa vakadodonu se wa vakababa.”
^ Ipe., “wa vakadodonu se wa vakababa.”
^ Ipe., “wa vakadodonu se wa vakababa.”
^ Ipe., “wa vakadodonu se wa vakababa.”
^ Ipe., “wa vakadodonu se wa vakababa.”
^ Ipe., “wa vakadodonu se wa vakababa.”
