Vunau ni Soro 1:1-17
-
Na isorokama (1-17)
1 E qai kacivi Mosese o Jiova, e vosa tale ga vua mai na valelaca ni veitavaki,+ e kaya:
2 “Vosa vei ira na Isireli* qai tukuna vei ira, ‘Ke dua vei kemuni e via cabora na manumanu me isoro vei Jiova, moni kauta mai na qelenibulumakau se qelenisipi+ na nomuni isoro.
3 “‘Ke kau mai na qelenibulumakau na nona isoro kama, me cabora o koya e dua na ka tagane vinaka.+ Me cabora mai vu ni lomana+ ena mata i Jiova, ena icurucuru ni valelaca ni veitavaki.
4 Me tabaka na ulu ni isoro kama ena ligana, ena qai vakadonui me sorovaki kina na nona ivalavala ca.
5 “‘Me qai vakamatei na luvenibulumakau tagane ena mata i Jiova, era na cabora na dra na luvei Eroni era bete,+ qai kureitaka wavolita na icabocabonisoro taucoko na kena dra,+ ena icurucuru ni valelaca ni veitavaki.
6 Me drudrugi qai musumusulaki na isoro kama.+
7 Na bete era luvei Eroni mera biuta na bukawaqa ena icabocabonisoro,+ ra qai tuvana na kau ena dela ni bukawaqa.
8 Era na tuvana na tikitiki ni isoro,+ na uluna kei na uro* ena dela ni kau, ena dela ni bukawaqa ena icabocabonisoro na bete era luvei Eroni.
9 Na kena wawa kei na yavana ena sava ena wai, me qai cakava na bete me kubou kece ena icabocabonisoro me isoro kama, na isoro e vakamai me talei* vei Jiova na kena iboi.+
10 “‘Ke nona isoro e kau mai na qelenimanumanu+ me isoro kama, mai vei ira na luvenisipi se me, me cabora o koya e dua na ka tagane vinaka.+
11 Me vakamatei ena mata i Jiova ena yasa ni icabocabonisoro ena vualiku, mera qai kureitaka wavolita na icabocabonisoro taucoko na kena dra+ na bete era luvei Eroni.
12 Ena musuka vakalalai na bete, wili kina na uluna kei na kena uro,* me qai tuvana na bete ena dela ni kau ena bukawaqa ena icabocabonisoro.
13 Ena savata o koya ena wai na kena wawa kei na yavana, ena cabora kece qori na bete qai cakava me kubou ena icabocabonisoro. Qo na isoro kama, na isoro e vakamai me talei* vei Jiova na kena iboi.
14 “‘Ia ke nona isoro na manumanuvuka me isoro kama vei Jiova, ena cabora o koya na nona isoro mai na kukuru se na ruve gone.+
15 Ena cabora ena icabocabonisoro na bete, qai kinita laivi na domona* qai vakama me kubou ena icabocabonisoro, ia me vakadrodroi laivi na kena dra ena yasa ni icabocabonisoro.
16 Me tunaka qai vutia, me viritaka sara ena yasa ni icabocabonisoro ena tokalau, ena vanua ni dravusa.*+
17 Ena sea na manumanuvuka ena tabana, ia ena sega ni wasea rua. Oti oya ena cakava na bete me kubou ena icabocabonisoro ena dela ni kau ena bukawaqa. Qo na isoro kama, na isoro e vakamai me talei* vei Jiova na kena iboi.
iVakamacala e ra
^ Ipe., “na luvei Isireli.”
^ Se “na uro wavolita na ivi.”
^ Se “me veivakalomavinakataki, malumu.” Ipe., “veivakacegui.”
^ Se “kena uro wavolita na ivi.”
^ Se “me veivakalomavinakataki, malumu.” Ipe., “veivakacegui.”
^ De dua, e sega ni kinita me cavuka vakadua na domona.
^ Se “ni dravusa urouro,” oya na dravusa e veiwaki kei na uro ni isoro.
^ Se “me veivakalomavinakataki, malumu.” Ipe., “veivakacegui.”
