Vosa Vakaibalebale 7:1-27
7 Na luvequ, mo muria na noqu vosa,Mo maroroya na noqu ivakaro.+
2 Mo muria na noqu ivakaro mo bula kina,+Mo taqomaka na noqu ivakavuvuli* me vaka na loa ni matamu.
3 Mo vesuka ena iqaqaloniligamu,Mo vola ena vatu ni lomamu.+
4 Mo kaya vei vuku, “O iko na ganequ,”Mo kacivi yalomatua “na wekaqu,”
5 Me rau yadravi iko vua na yalewa murilomana,*+Vua na yalewa ivalavala dukadukali* kei na nona vosa veicavilaki.+
6 Mai na katubaleka ni noqu vale,Au rai sobu ena noqu katubaleka,*
7 Niu vakaraici ira na yalowai,Au raica ena kedra maliwa na cauravou e dua na gonetagane sega ni yalomatua.+
8 E lako volekata tiko na nona tutu ni sala na yalewa,E muria o koya na sala ina nona vale
9 Ena karobo, oya ena yakavi+Ni sa voleka na bogi kei na buto.
10 Au qai raica ni tavaki koya e dua na yalewa,E vakaisulu me vaka na saqamua,+ e lawaki na lomana.
11 E yalewa kosakosa qai yalodua.+
E sega ni dau tiko e vale.
12 Dua na gauna e tiko e tuba, dua tale na gauna e tiko ena rara ni koro,E dau wawa volekata na tutu ni sala kece.+
13 E dreti koya mai qai reguca,E douvaki koya na matana, e kaya vua:
14 “Au na cabora na isoro ni veiyaloni.+
Nikua au sa vakayacora na noqu bubului.
15 Oya na vuna au lako yani kina meu tavaki iko,Meu qarai iko au mani kunei iko!
16 Au ubia na noqu idavodavo ena iubi vinaka,Na lineni duiroka mai Ijipita.+
17 Au vakamirika ena noqu idavodavo na mura, na elou* kei na sinamoni.+
18 Mo lako mai, me daru vakaceguya na nodaru veidomoni me yacova na mataka.
Me daru marautaka na nodaru veidomoni,
19 Ni sega ni tiko e vale o watiqu,E lako tu ena dua na ilakolako balavu.
20 E kauta tu e dua na taga ilavo,Ena sega ni lesu mai me yacova na siga e taucoko kina na vula.”
21 E rawa na cauravou ena levu ni nona vosa kamikamica.+
E bacani koya ena vosa veicavilaki.
22 E vakasauri ga ni muria na yalewa me vaka na bulumakau e lai vakamatei,E vaka na lialia e vesu ena ivesukau,*+
23 Me yacova ni suaka na yatena na gasau,Me vaka na manumanuvuka e kusava na dai, e sega ni kila ni na mate kina.+
24 Ia qo kemuni na luvequ, moni rogoci au,Moni vakatudaliga ina vosa au tukuna.
25 Me kua ni galeleta na lomamu na nona ivalavala.
Mo kua ni lako sese ena nona sala,+
26 Ni vakabalea e levu o koya,+Qai lewe levu e vakamatea.+
27 Na nona vale na sala ina iBulubulu,*E lako sobu ina loqi nei mate.
iVakamacala e ra
^ Se “lawa.”
^ Qo na katubaleka sega ni vakailoilo, e veitaqai veilatai kina na tikinikau.
^ Ipe., “iqamuniliga se yava.”
^ Se “Seoli,” oya na ibulubulu ni kawatamata. Raica na iVakamacala ni Vosa.
