Vosa Vakaibalebale 1:1-33
1 Na vosa vakaibalebale i Solomoni,+ na luvei Tevita,+ na tui Isireli:+
2 Me vulici* kina na vuku+ kei na ivakavuvuli,Me kilai kina na vosa ni yalomatua,
3 Me rawati kina na ivakavuvuli+ e vakavuyalomatua,Na yalododonu,+ na vakatulewa vinaka,*+ kei na cakadodonu,
4 Me vakayalomatuataki kina+ na yalowai,Me kilaka se raiyawa kina+ na cauravou.
5 Na tamata vuku e vakarorogo ena vulica e levu na ka,+Na tamata yalomatua ena rawata na veidusimaki vinaka,*+
6 Me kila na vosa vakaibalebale, na vosa dredre,Na nodra vosa na vuku kei na nodra vatavatairalago.+
7 Noda dokai* Jiova e itekitekivu ni kilaka.+
O ira ga na lialia era cata na vuku kei na veivakavulici.+
8 Na luvequ, mo rogoca na ivakavuvuli nei tamamu,+Mo kua ni biuta na ivakasala* nei tinamu.+
9 Qori e isala totoka e ulumu,+E iukuuku talei e domomu.+
10 Na luvequ, ke ra via temaki iko na tamata ivalavala ca, mo cata sara.+
11 Ke ra kaya: “Meda lako vata.
Meda lai toka vuni meda vakadavedra.
Eda na vuni meda vakaleqai ira na sega ni cala.
12 Eda na tilomi ira bulabula me vaka na iBulubulu,*Taucoko, me vakataki ira na lako sobu ina qara.
13 Meda taura na nodra iyau talei kece,Eda na binia na itokinivalu ena noda vale.
14 Mo tomani keimami,*Eda na wasea vakatautauvata kece na ka eda butakoca.”*
15 Na luvequ, kua ni muri ira.
Mo tarova na yavamu mai na nodra sala,+
16 Ni ciciva na ca na yavadra,Era vakusakusa mera vakadavedra.+
17 E tawayaga dina me tevu na lawa ni rai tu na manumanuvuka.
18 Oya na vuna era toka vuni kina mera vakadavedra,Era vuni mera vakamatea eso.
19 Qori na nodra ivalavala o ira na via rawatubu vakailawaki,Era na mate kina o ira na rawata.+
20 O vuku dina+ e kaci tiko vakadomoilevu e gaunisala.+
E tabalaka tiko ga na domona ena vanua lala.+
21 E kaci yani ena tutu ni sala osooso.
Ena matamatanikoro, e kaya:+
22 “Kemuni na yalowai, ena vakacava na dede ni nomuni taleitaka tiko na yalowai?
Kemuni na dau veivakasewasewani, ena vakacava na dede ni nomuni taleitaka tiko na veivakasewasewani?
Kemuni na lialia, ena vakacava na dede ni nomuni cata tiko na kilaka?+
23 Moni muria na noqu veivunauci.*+
Au na qai sova vei kemuni na yaloqu,Au na vakatakila vei kemuni na noqu vosa.+
24 Niu kaci yani ia oni cata tiko ga,Au dodoka yani na ligaqu ia e sega ni dua e kauai,+
25 Oni vakawalena tiko ga na noqu ivakasala kece,Oni cata na noqu veivunauci,
26 Au na dredre tale ga ena gauna oni leqa kina,Au na vakalialiai kemuni ni yaco mai na ka oni domobulataka,+
27 Ni yaco mai na ka oni domobulataka me vaka na draki ca,Me vaka na cagi kaukaua na nomuni leqa,Ena gauna oni rarawa se yaluma kina.
28 Era na kacivi au tiko ga ena gauna oya, ia au na sega ni rogo,Era na qarai au vagumatua, ia era na sega ni kunei au,+
29 Nira cata na kilaka,+Era sega ni digia mera dokai* Jiova.+
30 Era cata na noqu ivakasala,Era beca na noqu veivunauci kece.
31 Ena sauti ira ga na ca* ni nodra ivalavala,+Era na mamau ga ena nodra lewa.*
32 Nira murilomadra na yalowai era na mate kina,Na nodra yalowele na lialia ena vakarusai ira.
33 Ia o koya e vakarorogo vei au ena tikovinaka,+Ena vakacegu ni sega ni rerevaka na ka ca.”+
iVakamacala e ra
^ Ipe., “Me kila.”
^ Se “ka dodonu.”
^ Se “ivakasala vuku.”
^ Ipe., “rerevaki.”
^ Se “lawa.”
^ Se “Seoli,” oya na ibulubulu ni kawatamata. Raica na iVakamacala ni Vosa.
^ Se “dua vata ga noda taga (tagailavo).”
^ Se “Meda vakaivotavota vata.”
^ Se “Moni saumaki niu veivunauci.”
^ Ipe., “rerevaki.”
^ Ipe., “kania na vua.”
^ Se “inaki ca.”
