Vakatakila e Vola o Joni 9:1-21

  • iKalima ni biukila (1-11)

  • Oti na imatai ni ka rarawa, sa voleka e rua tale (12)

  • iKaono ni biukila (13-21)

9  E uvuca na nona biukila na ikalima ni agilosi.+ Au qai raica e dua na kalokalo a lutu mai lomalagi i vuravura, e qai soli vua na ki ni icurucuru ni qara e sega ni vakabotona.+  E dolava o koya na icurucuru ni qara e sega ni vakabotona, e qai kuvu cake mai na icurucuru na kubou e vaka na kubou ni lovo vakaitamera, e butobuto na matanisiga+ kei na cagi ena kubou e kuvu mai na icurucuru.  Era basika mai na kubou qori na vodre mera vuka yani i vuravura,+ e soli vei ira na kaukaua, na kaukaua vata ga e tiko vei ira na batibasaga e vuravura.  E tukuni vei ira mera kua ni vakacacana na co e vuravura se dua na kau drokadroka se vunikau cava ga, ia mera vakacacani ga o ira na sega ni tiko e yadredra na ivakatakilakila ni Kalou.+  Era sega ni lesi mera vakamatea na tamata, mera vakararawataki ira ga me lima na vula, na rarawa era vakila e vaka sara ga na rarawa e vakila e dua ni kati koya na batibasaga.+  Ena gauna oya era na qara na tamata na sala mera mate kina ia era na sega ni kunea, era na via mate ia ena drovaki ira tiko ga o mate.  Na kedra irairai na vodre e vaka na ose e vakarau ina ivalu,+ e toka e uludra na ka e vaka na isala vakatui koula, na matadra e vaka na mata ni tamata,  ia na drauniuludra e vaka na drauniulu ni yalewa. Na batidra e vaka na bati ni laione,+  na isasabai ni seredra e vaka na isasabai kaukamea. Na rorogo ni tabadra e vaka na kedra rorogo na kareti e dreta tiko e levu na ose era cici ina ivalu.+ 10  E tiko tale ga na buidra, e dau kati gaga me vaka na batibasaga, e tiko ena buidra na kaukaua me vakaleqai ira na tamata me lima na vula.+ 11  E liutaki ira e dua na tui, na agilosi ni qara e sega ni vakabotona.+ Na yacana vakaIperiu o Apatoni,* ia na yacana vaKirisi o Apolioni.* 12  Sa oti na imatai ni ka rarawa. Raica! E rua tale na ka rarawa+ ena qai tarava mai na ka kece qo. 13  E uvuca na nona biukila+ na ikaono ni agilosi.+ Au rogoca sara e dua na domo mai na ileu ni icabocabonisoro koula+ e tiko ena mata ni Kalou 14  ni kaya vua na ikaono ni agilosi e taura tiko na biukila: “Sereka na va na agilosi eratou vesu tiko ena uciwai levu na Uferetisi.”+ 15  Eratou mani sereki na va na agilosi eratou sa vakarautaki tu me baleta na aua, na siga, na vula, kei na yabaki me ratou vakamatea e dua na ikatolu ni tamata. 16  Na kedra iwiliwili na mataivalu dauvodo ose e rua na oba vakaoba,* oya na kedra iwiliwili au rogoca. 17  Ia e va qo na ose au raivotutaka kei ira na vodoka: Na isasabai ni seredra e damudamu, e karakarawa qai dromodromo me vaka na sulifure, na uludra na ose e vaka na ulu ni laione,+ e basika mai gusudra na bukawaqa, na kubou, kei na sulifure. 18  E mate e dua na ikatolu ni tamata ena tolu na ka ca qo, na bukawaqa, na kubou, kei na sulifure e basika mai gusudra. 19  Na nodra kaukaua na ose e tiko e gusudra kei na buidra, ni buidra e vaka na gata vakauluna, qori na ka era veivakaleqai kina. 20  Ia o ira na vo ni tamata era sega ni mate ena tolu na ka ca qo, era sega ni veivutunitaka na cakacaka ni ligadra, mera kua kina ni qarava na timoni, mera kua tale ga ni qarava na matakau e buli ena koula, siliva, kopa, vatu, kei na kau, na matakau era sega ni rai, rogo se taubale rawa,+ 21  era sega ni veivutunitaka na nodra laba, na nodra qaravi tevoro, na nodra veiyacovi tawadodonu,* se na nodra butako.

iVakamacala e ra

Se “Veivakarusai.”
Se “o Dauveivakarusai.”
Se “20,000 vaka10,000,” oya e 200,000,000.
Kirisi, por·neiʹa. Raica na iVakamacala ni Vosa.