Vakatakila e Vola o Joni 7:1-17
7 Oti qo, au qai raica e va na agilosi eratou tucake tu ena tutu i vuravura e va, eratou tarova matua na va na cagi kei vuravura me kua kina ni liwa na cagi i vuravura, se i wasawasa, se me liwava e dua na kau.
2 Au raica e dua tale na agilosi ni cabe tiko mai na icabecabe ni siga,* e taura na drega ni veivakadonui ni Kalou bula, e kacivaka ena domolevu vei ratou na va na agilosi e lesi me ratou vakacacana na vuravura kei na wasawasa:
3 “Kua ni vakacacana na vuravura, se wasawasa, se kau, me keitou se dregata mada+ na yadredra na dauveiqaravi ni noda Kalou.”+
4 Au qai rogoca na kedra iwiliwili na dregati, era le 144,000,+ era dregati mai na nodra yavusa kece na luvei Isireli:+
5 E 12,000 mai na yavusa o Juta,e 12,000 mai na yavusa o Rupeni,e 12,000 mai na yavusa o Kata,
6 e 12,000 mai na yavusa o Aseri,e 12,000 mai na yavusa o Nafitalai,e 12,000 mai na yavusa o Manasa,+
7 e 12,000 mai na yavusa o Simioni,e 12,000 mai na yavusa o Livai,e 12,000 mai na yavusa o Isakari,
8 e 12,000 mai na yavusa o Sepuloni,e 12,000 mai na yavusa o Josefa,era dregati tale ga e 12,000 mai na yavusa o Penijamini.
9 Ni oti qo au rai yani, au qai raica e dua na isoqosoqo levu, e sega ni dua na tamata e wilika rawa, mai na veimatanitu kece, veiyavusa, veimatatamata, kei na duivosavosa,+ era tucake tu ena mata ni idabedabe vakaturaga kei na mata ni Lami, era vakaisulu ena isulu balavu vulavula+ ra qai taura tu na taba ni niuniu e ligadra.+
10 Era kailavaka tiko ga ena domolevu: “E vakabulai keimami na neimami Kalou e dabe tiko ena idabedabe vakaturaga,+ na Lami tale ga.”+
11 O ira kece na agilosi era duri wavokita tale tu ga na idabedabe vakaturaga kei ira na qase+ kei na va na kabula, era tekicuva ena mata ni idabedabe vakaturaga ra qai qarava na Kalou,
12 era kaya: “Emeni! Me vakacaucautaki mada ga me tawamudu na noda Kalou, me vakalagilagi, me vakarokorokotaki, me vakavinavinakataki, ni o koya ga e vuku, e kaukaua, e qaqa.+ Emeni.”
13 E mani tarogi au e dua vei ira na qase: “O cei o ira na vakaisulu tu qo ena isulu balavu vulavula,+ era lako mai vei?”
14 Sega ni bera noqu kaya vua: “Noqu turaga, o kemuni ga oni kila.” Mani kaya vei au: “O ira qo era bula sivia na veivakararawataki levu,+ era savata na nodra isulu balavu ra qai vakavulavulataka ena dra ni Lami.+
15 Oya na vuna era tiko kina ena mata ni idabedabe vakaturaga ni Kalou ra qai dau cabora vua na veiqaravi tabu ena siga kei na bogi ena nona valenisoro, ia o koya e dabe tiko ena idabedabe vakaturaga+ ena qai tevuka vei ira na nona valelaca.+
16 Era na sega ni viakana se karamaca tale, ena sega tale ga ni kati ira na siga se na katakata warumisa,+
17 ni na vakatawai ira+ na Lami+ e tiko ena maliwa* ni idabedabe vakaturaga, ena tuberi ira tale ga ina ivurevure ni wai ni bula.+ Kena ikuri, na Kalou ena qusia tani na wainimata kece mai na matadra.”+
