Vakatakila e Vola o Joni 20:1-15
20 Au qai raica e dua na agilosi ni lako sobu mai lomalagi, e taura tu e ligana na ki ni qara e sega ni vakabotona+ kei na dua na sinucodo vakaitamera.
2 E taura na gata levu,+ na gata makawa,+ na Tevoro,+ e yacana tale ga o Setani,+ qai vesuki koya me 1,000 na yabaki.
3 E kolotaki koya sara ina qara sega ni vakabotona,+ e sogota, qai dregata me kua tale ni vakacalai ira na veimatanitu me cava mada na 1,000 na yabaki. Oti ya, ena sereki tale vakalailai.+
4 Au qai raica eso na idabedabe vakaturaga, era dabe tiko kina eso e soli vei ira na kaukaua mera veilewai. Io, au raica na nodra bula era vakamatei* ena vuku ni nodra tukuni Jisu, kei na nodra tukuna yani na veika e baleti koya na Kalou, kei ira na sega ni qarava na manumanu kila se na kena ivakatakarakara, e sega tale ga ni volai na kena ivakatakilakila ena yadredra se ligadra.+ Era bula tale ra qai veiliutaki vakatui kei Karisito+ me 1,000 na yabaki.
5 (O ira na vo ni mate+ era sega ni bula tale me cava mada na 1,000 na yabaki.) Qo na imatai ni veivakaturi.+
6 Era marau, era yalosavasava o ira na wili ena imatai ni veivakaturi,+ ena sega ni kaukaua+ vei ira na ikarua ni mate,+ ia era na bete+ ni Kalou kei Karisito, era na veiliutaki vakatui vata kei koya me 1,000 na yabaki.+
7 Ia ni sa na cava ga na 1,000 na yabaki, ena sereki tale o Setani mai na vanua e vesu tu kina,
8 ena lako yani me vakacalai ira na veimatanitu ena tutu i vuravura vava, o Koki kei Mekoki, me soqoni ira vata ina ivalu. Na kedra iwiliwili e vaka na nuku ni matasawa.
9 Era lakova yani na vuravura raraba ra qai wavokita na nodra keba na yalosavasava kei na koro lomani. Ia e lako sobu mai lomalagi na bukawaqa qai yameci ira.+
10 E qai kolotaki ina drano bukawaqa e caudre tu ena sulifure na Tevoro e vakacalai ira tiko, na vanua erau sa tiko rawa kina na manumanu kila+ kei na parofita lasu,+ eratou na vakararawataki ena siga kei na bogi me tawamudu.
11 Au qai raica e dua na idabedabe vulavula levu vakaturaga kei koya e dabe tiko kina.+ Erau dro tani mai matana o vuravura kei lomalagi,+ e sega tale ni dua na vanua me rau laurai kina.
12 Au qai raici ira na mate, na vetaicake kei na vetaira, nira duri tu ena mata ni idabedabe vakaturaga, qai dola eso na ivolavivigi. Ia e dola e dua tale na ivolavivigi, na ivolavivigi ni bula.+ Era lewai na mate ena veika e volai tu ena ivolavivigi me salavata kei na ka era cakava.+
13 E qai solia mai o wasawasa na mate era tu kina, e solia tale ga mai o mate kei na iBulubulu* na mate era tu kina, era qai lewai yadua me salavata kei na ka era cakava.+
14 E kolotaki tale ga ina drano bukawaqa+ o mate kei na iBulubulu.* Qo na ikarua ni mate,+ na drano bukawaqa.+
15 Kena ikuri, era kolotaki ina drano bukawaqa+ o ira kece era sega ni volai ena ivola ni bula.+
iVakamacala e ra
^ Kir., “vakamatei ena matau.”
^ Se “Etesi,” oya na ibulubulu ni kawatamata. Raica na iVakamacala ni Vosa.
^ Se “Etesi,” oya na ibulubulu ni kawatamata. Raica na iVakamacala ni Vosa.
