Vakatakila e Vola o Joni 18:1-24

  • Bale o “Papiloni na Ka Levu” (1-8)

    • “Kemuni na noqu tamata, ni lako tani vua” (4)

  • Lolositaki na bale nei Papiloni (9-19)

  • Marau e lomalagi ni bale o Papiloni (20)

  • Kolotaki o Papiloni e wasawasa me vaka na vatu (21-24)

18  Oti kece qo au qai raica e dua tale na agilosi ni lako sobu mai lomalagi, e agilosi kaukaua sara, e vakararamataki vuravura na nona lagilagi.  E qai kacivaka yani ena domolevu: “Sa bale! Sa bale o Papiloni na Ka Levu,+ e sa nodra itikotiko na timoni, e nodra vanua tale ga na yalovelavela, na ka dukadukali kece, kei na manumanuvuka sevaki kece!+  Era rawai na veimatanitu+ ena vuku ni waini ni cudru, na waini ni nona veiyacovi tawadodonu,* era veiyacovi tawadodonu kei koya na tui kei vuravura,+ era vakavutuniyautaki na dauveivoli e vuravura ena levu ni nona iyau, na iyau e sega sara ga ni maduataka.”  Au qai rogoca e dua tale na domo mai lomalagi ni kaya: “Kemuni na noqu tamata,+ ni lako tani vua, ke oni sega ni via vakaivotavota kei koya ena nona ivalavala ca, ke oni sega tale ga ni vinakata me yacovi kemuni na nona rarawa.+  Ni sa bini cake na nona ivalavala ca me yacovi lomalagi,+ e qai nanuma na Kalou na nona cakacaka tawadodonu.+  Me saumi vua na nona ivalavala,+ io, me vakaruataki vua na ka e cakava,+ ena loma ni bilo+ e vakarautaka kina o koya na gunu, vakaruataka na levu ni mena gunu.+  Me vaka ga na levu ni nona vakalagilagi koya kei na levu ni nona iyau e sega sara ga ni maduataka, me va tale ga qori na levu ni nona rarawa kei na nona lolosi. Ni kaya tiko ga e lomana: ‘Au sa dabe toka qo ena noqu idabedabe vakaranadi, au sega ni yada, au na sega vakadua ni raica na lolosi.’+  Oya na vuna ena yaco vata mai kina ena dua ga na siga na nona rarawa, na mate, na lolosi, na leqa ni kakana, ena qai vakamai vakadua ena bukawaqa,+ ni o koya e tauca na kena lewa e kaukaua, o Jiova* na Kalou.+  “O ira na tui kei vuravura era veiyacovi tawadodonu* kei koya, ra qai bula vata kei koya ena levu ni nona iyau e sega sara ga ni maduataka, era na tagi qai tavimabu ena levu ni nodra rarawa, nira raica na kena kubou ni sa kama. 10  Era na tu ga vakayawa nira domobulataka na nona vakararawataki ra qai kaya: ‘Isa, isa, o iko na koro levu,+ Papiloni, o koro kaukaua, o sa lewai ena dua ga na aua!’ 11  “Era tagicaki koya era osivaki koya tale ga na dauveivoli e vuravura, ni sa sega ni dua me volia na nodra ibinibini ivoli, 12  na ibinibini koula, na siliva, na vatutalei, na mataniciva, na lineni matailalai, e lokaloka, e silika, e kulakula, na veimataqali kau boivinaka, na veimataqali iyaya e caka ena kau boivinaka, na veimataqali iyaya e caka ena kau talei, e caka ena kopa, kaukamea, kei na mapolo, 13  na sinamoni tale ga, na isaluaki ni Idia, na ka boivinaka, na waiwai vakaisaluaki, na drega boivinaka, na waini, na waiwai olive, na falawa vinaka sara, na witi, na bulumakau, na sipi, na ose, na qiqi, na bobula, kei na tamata. 14  Sa na yali vei iko na vuata vinaka o dau taleitaka, sa na yali tale ga na veika talei kei na veika totoka, era na sega ni qai kune tale. 15  “O ira na dau volitaka na ka kece qo ra qai vutuniyau ena vukuna era na tu mai vakayawa nira domobulataka na nona vakararawataki, era na tagi ra qai lolosi, 16  nira kaya: ‘Isa, isa, na koro levu, e vakaisulu ena lineni matailalai, na isulu lokaloka, kei na isulu kulakula, qai ukutaki ena iukuuku koula, na vatutalei, kei na mataniciva,+ 17  nira vakarusai kece na iyau levu qori ena dua ga na aua!’ “Era tu ga mai vakayawa na kavetani kece ni waqa, o ira kece na dau veisokoyaki ina veivanua, o ira na kaimua, kei ira kece na volitaka na ka e tu e wasawasa, 18  era qolou nira raica na kena kubou ni sa kama ra qai kaya: ‘Na koro cava e tautauvata kei na koro levu qo?’ 19  Era ceburaka ina uludra na dravusa, era qolou, era tagi, era osi, ra qai kaya: ‘Isa, isa, na koro levu e vakavutuniyautaki ira na vakawaqa e wasawasa ena vuku ni iyaya saulevu e taukena, ni sa vakarusai ga ena dua na aua!’+ 20  “Mo marau lomalagi+ ena ka e sa yaco vua, moni marau tale ga na yalosavasava,+ na yapositolo, kei na parofita, ni sa tauca na kena lewa na Kalou ena vukumuni, qai totogitaki koya!”+ 21  E qai laveta e dua na agilosi kaukaua e dua na vatu e vaka na vatuniqaqaqi levu, e kolotaka sara i wasawasa qai kaya: “Ena va qo na totolo ni nona kolotaki sobu o Papiloni na koro levu, ena sega ni kune tale.+ 22  Ena sega ni rogo tale vei iko na domodra na daulagasere era qiria na api, o ira na daunivakatagi, o ira na dau uvu bitunivakatagi, kei ira na dau uvu biukila. Era na yali tale ga na kenadau ena cakacaka kece ga, ena sega ni rogo tale vei iko na vatuniqaqaqi, 23  ena sega ni laurai tale vei iko e dua na rarama ni cina, ena sega ni rogo tale na domo ni taganevou kei na yalewavou, nira tamata vakaitutu e vuravura o ira na nomu dauveivoli, era vakacalai tale ga na veimatanitu ena nomu dau vakatevoro.+ 24  Io, e laurai vua na nodra dra na parofita, o ira na yalosavasava,+ kei ira kece era vakamatei e vuravura.”+

iVakamacala e ra

Kirisi, por·neiʹa. Raica na iVakamacala ni Vosa.
Raica na iKuri A5.